¹ Mǝn nǝngnga kǝmarang mo bǝtǝ mida nǝn me a mura mɨtǝ bani. Nǝn kwini ka tǝ mirǝ dah nǝn me! ² Bǝraki kamǝn nwi nugun bǝri nǝn jǝn. Ka mǝnǝ nugun da nyan bǝri nǝn jǝn, na kǝn buggǝmǝn yǝm a nata nibari kwani. Kǝ bugǝmǝn yǝm mo bǝn nǝbǝn jǝn nyǝra bwiwiya yǝmbǝ bweliyu yulgoi a gwa Kristiyu. ³ Bǝraki tatǝ ka mairǝ a kagi kǝng mo nyǝngkǝ so julla Hauwa'u a gwa bǝrsan dǝ bwiran da gǝnǝng, ki karǝ kǝmarang ka jǝnǝng ba nyǝgǝlmǝnna juwi wu nya wu mutan a ji a Kristiyu. ⁴ N'suwe mo gu ka be a sigǝmmǝn finang ka gu Yesu dangǝn rǝ wu nǝn wagǝmǝn yǝmba gǝmmǝng. Mǝnni bo na suwe bo mo kǝtǝ yu gu we dang rǝ wu nǝn yuwi. Na bo suwe mo kǝtǝ yu bagi yǝmbǝ lǝmmangngǝm dang re bǝ nǝn yuwum. Kǝ tǝ ngatangnga yai jǝni yaiyǝ deni! ⁵ Bǝraki mǝn nǝngnga kǝmmarang mo yarmǝn ba bǝ bǝrǝ dutǝttan jiyu go tǝn nǝb tǝmrǝm bǝ kuntam. ⁶ Mǝnni ki mǝsaimǝn be sutang a yǝm ki, me mǝnnǝ bunai a yǝmtangngi a jutǝ warigu bo a jǝni yaiyǝ warigu kǝnǝn nungǝn yai jǝni yaiye. ⁷ Nǝngnga bwiran kǝn sǝg dur da miyǝn na ba guggǝnǝng ga? Kǝn wau gǝmǝn yǝmbǝ lǝmangngǝm ba Niyajiyuwum a nitte. ⁸ Kǝn yǝmǝn jǝni a bagi ba Ekklisiyam kǝ nǝngngamǝn swiyer. ⁹ A fulla tǝnǝn ka kini bo kǝn chi rǝ bunai, ne bǝ nǝnggǝnni gu ni. Bǝraki chǝttǝtta miyu ta Makidoniyai ka mǝri mǝn bunai ya miyu. A mura wunǝ ji kǝn dǝbmǝn dur da miyǝn a nǝgǝntang a nǝggǝnni, bo bǝn jaukak rǝ nyang. ¹⁰ Nyǝngkǝ yǝmbǝ nyamba Kristiyǝm ka mura miyǝng, me bǝn mǝrai nyi a gugtang ka durǝng ka miyǝn a mura gana tǝmba Akayam warigu. ¹¹ Bǝri wulai? Bǝraki yogǝmǝn bǝ da ga? Niyajiyu ka yǝm. ¹² Mǝnni ji mǝn nǝngnga ri, bǝn jaukak rǝ nǝngngatang, bǝn nǝngnga nyang na ba mwe kakka bǝ farǝ sǝr nyǝra nǝn nǝn a jiya jiyǝ hanjim mǝksa rǝgi. ¹³ Bǝraki bam nǝb nǝb tǝmrǝm ba nyatǝm bǝ julla nǝbbǝm. Bǝ fulga bwi nyǝra nǝb tǝmrǝm ba Kristiyǝm ¹⁴ Wai wu men jiya mǝnatang a buniyu, bǝraki Chetan ka fulga bwi kika chi nyǝra we tǝmri kwetǝrei. ¹⁵ Me jiya mǝnatang a buniyu nyǝngkǝ kewetangu ba fulga biyanka jiyǝng nyǝra bwiranǝm ba yǝm bǝ nyamǝm. Mwatǝnta jiyu ba yullo janggǝmiya ji hanjim a nǝngngai. ¹⁶ Mǝn yǝgtǝn mǝn suwe: kari ba ti go mǝn mɨ. Mǝnni tǝ nǝngnga ki ki, tǝ dǝbbi to mǝn mɨ hi nan ba bau furi bani. ¹⁷ Ji mǝn suwera a jiya gugtang a duri me ji Nigra nga rǝgi, mǝnni mǝn su yǝm nyǝra mɨ. ¹⁸ A chi nǝb mwam bǝ gug dur bǝra bwiyǝng, mǝrǝ kinang bǝn gug dur. ¹⁹ Mǝnni kǝtǝ yǝrǝ mɨtǝ rǝ bwilǝmri. Jǝn tǝn nǝbba bǝrsam. ²⁰ Kǝtǝ nǝngnga mitangka dang rǝ wu dǝggǝnna keweti, a te gǝn ki, bǝ nǝngnga fini nǝn jǝn bǝri nyatang ka gǝng, a dǝb dur da gǝn a ligǝn ki, ba buktǝgǝn a kattǝ. ²¹ Kǝmǝn suwerǝ rǝ bujǝri a kullo nǝnnu kǝnǝn nǝngnga latǝtti rǝ nyang. A nyangngi ki gu ba bau furi ki-mǝn su yǝm nyǝra mɨ-mǝ rǝ ki bǝn bau furi. ²² Hanjim Yahudawa ga? Mǝnnǝ nyang. Hanjim Isra'ilawa ga? Mǝnnǝ nyang. Hanjim sur a Ibrahimǝn ga? Mǝnnǝ nyang. ²³ Keweta Kristiyu ga? (Mǝn su yǝm da mǝn me yobiya miyu) Kǝn li bo. Kǝn nǝngnga swiyer a li hanjim warigu, dǝggitang a jarǝm kǝn li warigu, baurang me bǝnggotangwe, chutang a bwiyate kak rǝ kak kali mwam. ²⁴ Kali tǝ nu kǝn yu sǝmbite ''Furtǝ gwar me kwan we a kang ka Yahudawang. ²⁵ Kali tǝ bwanbi kǝ bugti rǝ damte. Mǝngngoi rǝ wete kali kin. Kalitǝ bwanbi bwantǝlong ka hiyǝng ka busa nǝn me. Kǝn nǝngnga kum rǝ ko kwan a jugǝr da wimangngǝn. ²⁶ Kǝn no yomni, a mura kwewiya laati, kwewiya mura kube, kwewiya nǝbba miyǝm, kwewiya mura nǝbbǝ me Yahudawam, kwewiya bɨr, kwewiya mura sei, kwewiya mura wimang, kwewiya mura chǝtǝtta miyu ta nyati. ²⁷ Kǝn nya dur da miyǝn a kwewi a swiyǝri na kwewi a bwiyu, a mura bunai dumi kotǝ mwam, a mura jun tǝn hi kugri, a mura sotang ga hi jǝtǝkwang, a mura kǝtǝrǝn tǝn bwi rǝ kun. ²⁸ A bukka jǝni yaiyǝng warigu, ka nǝggǝni a dur da miyǝn jǝtǝkwang bǝrarǝ kǝmarang a jiya Ekklisiya warigu. ²⁹ Wunǝ gu kungngǝr kungngǝri,na mǝn me kungugǝr-kungngǝri? Wunǝ gun dǝg a tǝl nai, na nwi bǝ jwagǝrri? ³⁰ Ki bǝn bau furi ki, bǝn bau furi a jiya nung yarmǝntang ka miyǝngngi. ³¹ Niyajiyu bo tǝn Te Nigra nǝnnu Yesuwi, wa lau wertang kurǝkwangngi, ka yǝm ti bǝ nyar! ³² A Dimaska, nigra nǝngnga dʊta tǝm nǝn nidu Aritasi ka dǝg gon torǝ bɨrda Dimaskan go na ban tai. ³³ Mǝnni sǝggiye wa fugang ka sǝmbang a mura kǝlǝn a kulli ya bɨrhǝnni, kǝn jǝrmǝnna kangka gǝngǝng.