¹ A mwatənte, chətte, kənən yəgəmən kumni nən bagəmən jiir a mʊra Nigra Yesʊwi. Nyəngkə tə yʊ məssarang rə ga nəniyəng a jiya nyəngka chi kwak tə yoyom bə ba ləm bwi Niyajiyʊwʊng, nyang a wai jʊwi we tə nəngnga sumən a nyang. ² Bəraki kətə yəm məssartə tə nən nəggən a mʊra Nigra Yesʊwi. ³ Bəraki kang ke gən kəmarang ka Niyajiyʊwʊng, tʊməntang ka jɨnəng, go tə mwaməna taltə. ⁴ Wʊna jɨnʊ a yəm nyəngkə ba tau bwiyangʊ rəga a mʊra yʊlgoi rə netang a grate, ⁵ me mʊri a jəllən də bwiran (nyəra rə nəba yəmbə Niyajiyʊwʊm). ⁶ Kari gʊ ba le jʊwi a nəngngatən yari a chi a wai jʊwi we. Beraki Nigra gə nəngnga yarang a yai jɨni yaiye warigʊ, nyəngkə nən sʊgəmən na nən wʊgəmən su kʊniyəng. ⁷ Bəraki Niyajiyʊ a bəbən be bəra rə chim bə sirəməm, mənni bəra rə chimbə yʊlgoiyəm. ⁸ Bərarə nyang, wa kwila wai ji wi a kwila bə nəb, mənni Niyajiyʊ, wa nəggən We Yʊlgoi. ⁹ A jiya yodai ya chətti, a chi bən bwi gʊ a kaubwe a mʊla gəmən bəraki jɨn rə butəjɨni Niyajiyʊ ka məssagəmən yodai ya chətti. ¹⁰ Me jʊgər we, kətə nəngnga tən nyangnga chətətta nənʊ ta Makidoinyai warigʊ. Mənni nən Bagəmən jiir chətte tə nəngnga li nyang. ¹¹ Kənən bagəmən jiir chətte tə chi chimba tautangnga dʊttəm, tə tau kak ka jɨnəng, tə nəngnga swiyer rə kanan jɨnʊ nyəngkə nən sʊgəmən gərəng, ¹² na ba tə yo yom ba dautənwʊm a kak ka ba nəbbən bə yəmbə nyaməm, bo a chi tə me mʊra bʊnai a gʊjiyʊ. ¹³ Me nən farə no tə chi rə bʊnaiya yəmtnangngi, chətte, a jiya ba dara dumniyəm, bəra bə tə chi rə fur də yuumlluwʊn nyəra rə bə me rə nəbbəntang a fʊri a ji ka kəgiyəm. ¹⁴ Ki kənən nəbbən yəmbə nyam mo Yesʊ ka bwiya, ka gʊn bo, nyang bo Niyajiyʊ ba juwe nən Yesʊ waringəm tən ba daradumni a mʊra giyəm. ¹⁵ Bərarə wai jiwe, kənən sʊgəmən a mʊra yəmba Nigram no nən bə nən kanən rə yuumuməm, ba dʊtən a fʊlla betang ka Nigram, me jʊgər we me bənən lu ba dara dumni yəm. ¹⁶ Bəra ki Nigra rə bwi go ba suwe wa ji. Hangʊ ba be rə jiir da we təmri gran tən da risi a Niyajiyʊwi,ki ba bətəro a mʊra Yesʊwʊm ba gʊn rə jigʊ. ¹⁷ Ki nən bənə kanən rə yuumuməm, na bən dʊwʊm, nən kin bən dəbbən yɨgira korte bənən chiga nən Nigra a ji. Nyang bənən jau kag rə chim na Nigra. ¹⁸ Bərarə nyang, tə səngtən furni a dʊtəttan jɨnʊ rə tai bwantətte.