¹ Bərarə nyəng, a chi nən dəmənbə nən midang kənə kəma no ka dautən we dʊbən a bug a Atina, ² Kə nən təm Timoti, chiya nənʊ tən chʊgo swiyeri ya Niyajiyʊwi a mʊra yəm bə ləmangəm ba Kristiyəm, na yɨgɨmən kumni na bo sɨggəmən furnan jɨnnʊ warigʊ a chimba nəbbəntang ka yəmbə nyaməm. ³ Nən nəngnga nyang kari gʊ ba nəngnga latiti bərarə kʊnang. Bəra kə jɨn ri butəjɨni kətə yəm to bəbbən bəri nyang. ⁴ Bə nyam, a fʊlla nən ka kini, kənən sʊgəmən no me ba wʊrə sʊn bənən no kʊnang, ka nəngnga nyang, nyəngkə tə yəm rəgəng. ⁵ Bərarə nyang dəmən bə midang, kən nəngnga gəmən təmrang naki yəm nyəngke nəbbəntang a yəmbə nyam ba jɨnʊ ka rəgəng. Kai ki Ni bɨngori ka bɨngogən, ki ba chi kʊnang ka nənəng ka chi rə kʊn. ⁶ Mənni Timoti a kauwe bwiya gwan jɨniyəng, ka bebəmən rə yəmbə ləmangəm a jiya nəbbəntanga ka yəmbə nyam ban jɨnəm rə yodaiya jɨnʊ. Ka sʊbəmən go kəmmarang kan jɨnnəng a jiya nənni nən nyagʊ, na bo tə fau tə chubən nyəngkə nən farə no nən chugən gərəng. ⁷ Bərarə nyang, chətətta miyʊ, kə nən nya səntang a fʊri a gwan jɨniyʊ bərarə nəbbəntang ka yəmbə nyam ban jɨnʊ a mʊra fur də yuumlluwʊn da nənʊ tən kʊnang. ⁸ Kʊ nən kanən nən yuumum, ki sim ba jɨnəm ba chi rə kumni a mʊra Nigra ki. ⁹ Gən dənə wʊnnan də bənən ne Niyajiyʊ bəra nən jɨnəng, bəraki fur də kwawʊn warigʊ də nən ka rə ga a gwa Niyajiyʊwi bəra nən jɨni? ¹⁰ Kum rə ko nən rʊwa nyini deni na ki nən chu katəttan jɨnʊ na bo nən rigəmən jə ni tə bʊna a mʊra nəbbəntang ka yəmbə nyam ban jɨnəməm. ¹¹ Masi Niyajiyʊ tən Tə nənʊ rə bwigo, na Nigra nənʊ Yesʊ, a nʊng bən jʊwi nənʊ yɨgira jɨni. ¹² Masi Nigra dəggən tə yɨgtən bwi tə chi a yodai a sətənni tan jɨnʊ yɨgira nəb warigʊ, nyəngke nən nəngnga gəmən gərəng. ¹³ Masi a yɨgtən kumni a furna jɨnʊ na tə chi me bwiran we a mʊra yʊlgoi a kak ka Niyajiyʊwʊng na Te nənʊ, a betang ka Nigra Yesʊwʊng rə bə yʊlgoiyəm ba gəm warigʊ.