¹ Bərakə jɨn rə buttə jɨni kətə yəm, chətte, betang ka nənnəng a gwa jɨniyʊ me kərə kʊnəng. ² Kətə yəm to kənən no kʊnang kʊni, kən nəbbən bujiiri Filibi. Kənən bau fʊri a mʊra Niyajiyʊ nən sʊgəmən yəmbə ləmmangngəm ba Niyajiyʊm a mʊra kʊnang deni. ³ Bautang ka jiirəng ka nənən me a gwa letangngi, ki a gwa sərəmmi ki, na a gwa jullai yuum. ⁴ A nyangngi nyəngkə Niyajiyʊ a nga nənnən na nəbmən wʊtang ka yəmbə ləmmangəm, nən su nyang. Me nən sʊwerə no na ki nəb ba nwi ləmmang ka nənnəng, mənni na Niyajiyʊ a ni ləmang ka nənnən. Hangʊ gə bɨngo furna nənnʊ. ⁵ Me rə fʊlla nən nəngnga swiyer rə bwantəttə dəg nəbba seim nyəngkə tə yəm rəgəng, bo nyəra dɨlli a suwi, bəraki Niyajiyʊ ga fʊng buk ka nənən. ⁶ Nən famən bə grate bo a gwa nəbbi, bo a gwan jɨniyʊ, bo a gwa bagiyʊ. Na bənən fau da nyəra nəb təmrəm ba Kristiyəm. ⁷ A nyangə, nən chi ya jɨni nyərə nee wʊ səngtən fʊri a bətəmba gəmi. ⁸ Bərarə nyang tə ka furna nənnʊ. Me yəm bə ləmmangəm ba Niyajiwʊm gən kwan tənən sʊga re, nyang rə yuumum ba nənnəm. Bəraki kə tə dɨgiya furna nennʊ deni. ⁹ Kətə kəma chətte, swiyer da nənən rə gʊwʊr da nənnən kum tən ko nən nəngnga swiyer na kari bənən ne neggənni gʊwa jɨnʊ. A wai fʊlla, nən wagəmən yəmbə ləmmangəm ba Niyajiyʊwʊm. ¹⁰ Tən bə bʊbʊgəm na Niyajiyʊ nyang, a mʊra yʊlgoi, rə chim bə nyam, me kəbar we nən chi gra jʊgər da jɨnən jɨn bətə nəbbən yəmbə nyaməm. ¹¹ A wai jʊwi nyang, kətə yəm nyəngkə nən chi nən wʊna jɨnnʊ nyəngkə te chirə bətəm ba giyəməng, ¹² Kənən chəllagəne, nən nəggən kumni nən nəngnga buwong tə yoyom ba dautəna Niyajiyʊ, gʊ wa bəgəne yɨgira dʊʊtəttang gʊ na gratətangʊwi. ¹³ Bərarə wai jiwe kənən da wʊnnan na Niyajiyʊ jʊtəkwang. A fʊlla tə yʊ yəm ba Niyajiyʊwʊm a gwa nəniyʊ, tə yʊbə nyəra rə bwanda niyin. A nyangngi kətə yʊ nyəngkə ka rə gəng, bwan da Niyajiyʊwʊm. Dan bwan də bo gə də nəngnga swiyer a mʊra jɨn bətə nəbbən yəmbə nyaməm. ¹⁴ Bərakən jɨn, chəttə, kə tə chi məsarbə ba bən samənsawiyəm ba Niyjiywʊm bə ka Yahudiyam a mʊra Kristi Yesʊwʊm. Bəraki kətə no kʊnang nyəra nən nən, a kang ka nəbba jɨnəməng, nyəngkə hanjim a no rə ga kana Yahudawam. ¹⁵ Yahudawa jiya ju Nigra Yesʊ tən nəb yʊwerəm. Yahudawa jiya kabə na tari. Me bə ləmbwi Niyajiyʊ. A nyangngi, ka niga kak tən nəb warigʊ. ¹⁶ Hanjim ka dang bən kari bənən sotən yəm bə ləmangəm a ba kum a mʊriyəm naka nya yiyarang. Ji ya nəngnga bwiyʊ hanjim jʊtəkwang bə ri jɨni bwira yan jiyʊ. Jwagər da Niyajiyʊwʊn a chin kwak a səg bwi a ji mwatənta nga. ¹⁷ Kən wʊtəgo bən nən jɨn chətte a fʊlla bani, a mʊra bwi me mʊra fʊri. Kənən fau deni no nən chu katətang jɨnʊn. ¹⁸ Kənən fau no nən yɨga jɨni, me Bulus, me kali kin bo, Chetan ka dangbənə rəge. ¹⁹ Wʊllai ji nən titən da wa ji bera kaggi, fur də kwauwʊn, gʊrmʊng ka gugtang a dʊrəng a kak ka Nigra Yesʊwʊng a betang kagəng? Me jɨn nyəngkə bagi rəgəng ga? ²⁰ Jɨn tə gratətta nənnʊ na bwiləmriya nənnʊ.