¹ Bulus, Silvanus tən Timoti yɨgira nəbbən samənsawiyəm bə ka Tassalonikam, a mʊra Niyajiyʊ Te tən Nigra Yesʊ Kristiyʊ. Masi nəttətən dautən bəwi na chimbə ləmmangngəm. ² Jʊtəkwang nʊ wa wʊnnan a Niyajiyʊ bəra nən jɨn warigʊ a fʊlla nən rʊwa nyiniyʊ bəra nən jɨn. ³ Ka nən kəmma nən jɨn dəgi we a kakka Te nənnʊ Niyajiyʊwʊng bo rə swiyer da jɨnən da nəbbəntang ka yəm bə nyaməm ba yodaiyən, rə mitang ka dang ka tautang a fʊriyəng a ji wʊ bera kaggi a mʊriya Nigra nənnʊ Yesʊ Kristi. ⁴ Chəttətə Niyajiyʊ a yotəndai kənən yəm no hangʊ ka sagəmən, ⁵ bəraki yəm bə ləmmamngəm ba nənnʊ a be gəmən ba mʊra sʊtang a yəm gən kwani, mənni nyang mʊra kumni, a mʊra We Yʊlgoi, tən ngatang. A jʊwi kwani, kə tə yəm yəm ba chimba nənnəm a səttənita jɨnʊ bɨra nən jɨn. ⁶ Kətə chi məssarəm ba nənnəm na ba Nigram, nyəngkə tə yʊ bwanda rə kʊnang deniyəng na fʊri kwauwi a gwa We Yʊlgoiyʊ. ⁷ Ji ya fʊngngə kətə yʊllo jiya məsarangngi a mʊra Makidoniya na Akaya a gwa ba nəbbən yəmbə nyaməm. ⁸ A mʊra jɨni bwan da Nigran ka nəngnga bwiyəng, me mo a mʊra Makidoniya tən Akaya dang nən ji. A nyangngi bo a gani dəndang nəbbəntang ka yəmbə nyam ba jɨnʊwʊng a gwa Niyajiyʊwʊmi ka jɨr tari. Bərarə wai ji, me fautang ka sʊtang ka gʊjiyəng. ⁹ Bəraki hanjim rə butəji ka sʊwe jiya nəngnga bwi a fʊlla nən yɨgi a səttənitan jiyʊwʊng. Ka sʊwe nyəngkə tə dʊ jibani natə fʊlgatən bwi a Niyajiyʊ rə yuumumi na yəmbə nyammi. ¹⁰ Hanjim ka sʊwe jiya nəngnga bwiyʊ go katə yamrə kautang ka bwiyəng ka yəllangʊwʊng a jiyəng, wa gug a mʊra ba bɨtɨro-bɨtɨroiyəm. Waiwe nən Yesʊ, wʊ ba jig bəna jwagər da berəni.