¹ Kʊ a jiya yəmba fʊllam, chətte, a chi bən bwi mʊla gəmən gʊji a jiya nyangngi. ² Bəraki jɨn rə butəjɨni kə tə yəm nyagʊ to ko Nigra ka berə nyəra nikʊ rə kum. ³ A fʊlla sʊwe go "Chim bə ləmangəm rə bwiləmri" kə bwiran da kəmmabən betəna hanjimi. Ba chi nyərarə nyʊi rə furri a ko buwongi. Hanjim me rə jʊwi ba kamən rəgi. ⁴ Mənni jɨn, chətte, tə me mʊra kum wʊ bən sʊwe mo wai ko we ba tɨggən nyərarə nikʊwi. ⁵ Bərakə waringəm ba jɨnəm tən bətəm ba kweterəm tən bətəm ba kom. Nən me nən bətəm ba kuməm. ⁶ Bərarə nyang, kari bənən dadum nyəra rə bagi. A nyangngi, masi tənən chi rə yəmtang. ⁷ Bəraki nəbbə da duməm bə da nən kum, bə chʊwa ka juwʊm bə nəngnga nən kum. ⁸ Naki nən nən bətəm ba kom, masi tənən chi chim rə yəmtang, masi tənən dʊ dagla nəbbəntang a yəmbə nyaməm, tən yodai na dala yiyarang ka nənəng wa kagi. ⁹ Bəraki Niyajiyʊ wa tibən ba yʊtanga jwagər da gən a tibən a nyatang ka yiyarang a mʊra Nigra Yesʊ Kristiyʊ. ¹⁰ Hangʊ ga bwiya bəra nən nən go kinəng kanən yuumum ki,bo ki nʊ wa dum ki bə nən chi nən hangʊ. ¹¹ Bərarə nyang tə səngtən furni a bwitan jɨnʊ tə tʊga bwita jɨnʊ nyəngkə tə nəngnga rəgəng. ¹² Kə nən chəllagəne, chətte, tə ne grate bə nəngnga swiyer a səttəni ta jɨnʊwʊm tən bə ka jiya jɨniyəm a mʊra Nigra na bo bə nəngnga gəmən məssartəm. ¹³ Kə nən chəllagəne bo a jiya hanjim tə yogo date tə nga nən hanjim bəra swiyer da jiyən. Tə chi ləmmang rə bwita jɨnʊ. ¹⁴ Kənən bagəmən jiir, chətte, tə wʊtən suni a bə me bə nwi yəməm, tə ne furni nəbbə furniya yarmənyariyəm, tə tʊga bə me ri kumniyəm, tə mida rə nəb warigʊ. ¹⁵ Kari bətə nga gʊ a yamən bwiran rə bwiran. A nyangngi, tə fʊng ji nya a bwitan jɨnʊ warigʊ. ¹⁶ Tə nəngnga fur də kwauwʊn jʊtəkwang. ¹⁷ Tə rʊwa nyini me dʊtang we. ¹⁸ A wʊnə ji warigʊ tə chi rə wʊnnan. Kangke gən kəmarang ka Niyajiyʊ a mʊra Yesʊ Kristiyʊ bəra nən jɨn. ¹⁹ Kari bə tə dum We. ²⁰ Kari bə tə nəngnga yʊte rə yəm yʊwerəm. ²¹ Tə bɨngo jɨni warigʊ. Tə tau ji nya. ²² Tə mwaramən a wʊni ji bwira. ²³ Masi na Niyajiyʊwa chim bə ləmmangəmi a ri gən rə yʊlgoi. Masi we jɨnʊ warigʊ, yuumum rə bwi, a chi me rə ji a kəbari bərarə betang ka Nigra Yesʊ Kristiyəng. ²⁴ Hangʊ wʊ rə yəmbə nyami ga bəgəne ngə ba nəngngai gəmən. ²⁵ Chətte, tə rʊwa bəmən nyini nyang. ²⁶ Tə sʊ chətte warigʊ rə kʊmtang kə yʊlgoiyəng. ²⁷ Kəmən chəllagəne bərarə Nigra mo kettən wanghəng a chəte warigʊ. ²⁸ Masi nətte tənən dautənbəwi ta Nigra nənʊ Yesʊ Kristiyʊ a chi nən jɨn.