¹ A wai jʊwiwe, jɨn bətə nyʊiyəm, tə ne grate nəbbə barəm ba jɨnnəm. Tə nəngnga nyang, bəraki ka bagi nəbbə barəm bə me bə ne gratə bwanəm ki, kai ki bən no wʊ dʊr da jiyən a gwa yobi ya nyʊiyəm ba jiyəmmi. ² Bəraki na ba chu yobi kweterrei ya jɨnnʊ tən səgtang ka dʊrəng. ³ Masi a nəngnga bwi me bərə jɨni yəlli ya tariyʊ; kəssitang ka dʊrəng, wetəttə kəlchə-kəlchi, kən dʊttəttə məksai ki. ⁴ A nyangngi, masi a yʊllo jɨni yəlli ya niya mʊra fʊriyʊ, tən nyiyar də me bə jɨrən, na səgtangnga dʊr, rə we sauwi,wʊ gən nyagʊ a kak ka Niyajiyʊwʊng. ⁵ Nən nyang nyʊiyəm bə yʊlgoiyəm a nəngnga jɨni yəlli ya jiyʊ nyang. A chi dʊr a sissiya Niyajiyʊ, ne gratə nəbbə barəm ba jiyəm. ⁶ A wai jʊwi we Saratʊ ka ne grate Ibrahim bərə go nigrang gʊ. Kʊ tən bətəm ba gəm nyəngkə tə nəngnga swiyer də nyanəng, na bo tə nwi bə tata kʊnnangngi ki. ⁷ Nyəngkən sotən gra nyʊiyəməng, jɨn nəbbə barəm tə chi rə nyʊiyəm rə yəmtang, nyəra ba yarmən-yariyəm, nyʊi. Tə ne gratəttə grai, nyəra kagəm ba fʊllam ba nəttəta yuumummiyəm. Tə nəngnga nyang kari bən kwilla nyini rʊwanan jɨnnʊ. ⁸ A jitang, waringəm ba jɨnnəm, tə chi rə yobi kwan, rə bʊmte, yodai nyəra chətte, rə furni lattətiyʊ, rə segtangnga dʊr. ⁹ Kari bətə yamən bwiran rə bwiran, na bo, kəbbar rə kəbbar. A jiya nyangngi, tə jaukak rə dəgtang a kang, bəgənne bərarə nyang nyəngke, na ba tə jau fʊlla dəgtang a kangngi. ¹⁰ Wʊnə ni farə go gə nwi ləmmang a yuumummi na bo gə chu kotə nyai yʊ, a tau langngər da gən a sʊtangnga jɨni bwirai rə bəltənyəi tangʊ sʊtangnga jʊllai. ¹¹ A ne yəlli jɨni bwirai na nəngnga ji nya. Masi ya fau chimbə ləmmangngəm na fʊng. ¹² Kəmta Nigrai bə chu nəbbə rə yəmbə nyaməm, mənni sunang gʊ ka nwi chəllan da jiyən.Mənni kak ka Nigrang bə nəngnga kak rə bə nəngnga jɨni bwiraiyəm." ¹³ Wʊnə gəbba nəngnga gəmən yarri nyəngki tə nəbbən dʊr a nəngngnatang a ji nyang? ¹⁴ Mənni tə no kʊnang bərə nəngngatang a ji nya ki, kən dəgmən kang. Kari tə nwi tate a ji hanjim nwi tattan gʊwi. Kara da gənne. ¹⁵ A nyəngngi, tə ti Nigra Kristi a mʊra furna jɨnnʊ nyəra yʊlgoi. Jʊtəkwang tə chi rə kʊratangnga bwiyən nyəngkə bətə ngatənna wʊ ba gʊlgən jiya nəngnga ki tə si dʊr a sissi a mʊra Niyajiyʊwi. Tə nəngnga nyang rə səgtang a dʊr rə netangnga grate. ¹⁶ Tə chi rə kəmmarang kə nyang, bəra nəbbə sʊra jɨnɨ bwirai a jɨni a mʊra Kristiyʊ a nwi bujiiri bəraki bə sʊ yəm kak nən jɨn da tə nəbbə nəngnga jɨni bwirayəm. ¹⁷ Kali nyagʊwi, fautang ka Niyajiyʊwʊng ki go no kʊnang bərə nəngngatangnga swiyer də nyan, ki ba chiya swiyer də bwiranəng. ¹⁸ Kristi ya no kʊnang kali kin bwigi bərə jɨni bwirai. Gə wʊ nyai a no kʊnang bərə nən nən bə me bə nəngnga jɨni nyaiyəm, na gə be nənnən a gwa Niyajiyʊwi. Kən ju a mʊra bwi, mənni kən dəg a gʊn rə yuum a mʊra we. ¹⁹ A gwa Wei, ka yɨgi a wau yəm bə ləmmanggəm a weni ya mʊra jarəmmi. ²⁰ Hanjim ka nəngnga bʊnnai ya nwi tangnga yəmmi,fʊlla wʊ mitang ka dang ka Niyajiyʊ yamre a kotan Nuhuwiyəng, a kotən sʊl bonbtəlong ka hiyəngngi, kə Niyajiyʊwa jəg nəb baniyəng- nəb narʊ-a mʊra hi. ²¹ Waiwe gən wʊllo nəngngatanga batisma wʊ jəgənə kʊwi-me nyəra tʊməntang ka neməra bwiyəng, mənni nyəra chəllatang ka Niyajiyʊwʊng rə kəmmarang kə nyang- a gwa gʊntang ka bwiyatəng ka Yesʊ Kristiyəng. ²² Wʊ ka kangkə nyang ka Niyajiyʊwʊng. Ka gwiya mʊra ji. Weni təmri, na dʊʊte, tən kʊmni, a chi kwak a nəbbən dʊr a hangʊwi.