¹ Bəri nyang tə jamən jɨni bwirai, nyattə warigʊ, fʊri bwira, rə nʊggən, na yəmni bwirai warigʊ. ² Nyəra bətəm bə buwe kʊwʊm, tə fau yiim ba wem bə kalʊriyəm. Bəraki a gwan giyʊ bətə gra yɨgira, ³ ki kəttə məbra to Nigra nən ni nya. ⁴ Tə be gwa giyʊ, gə wer dərə yuumummən də nəbba kwilan, mənni də Niyajiyʊwa samənsauwiyən, nyagʊ a gwan giyʊwʊn. ⁵ Jɨn rə kəgniyəng nyera rə wetəttə rə yuumummi, tə mʊweri na yʊllo kaiti wə chiwi, na ba tə yʊllo bə tung jɨnna chəriya Niyajiyʊwi yʊlgoiyəm, na ba tə tung jɨni rə yuumummi yʊlgoi yə Niyajiyʊ ba yʊwi a gwan Yesʊ Kristiyʊ. ⁶ Bəraki wang ka sʊwe go "Chu, mən ti wer da kɨngngən a mʊra Sihiyona, dən samənsauwi rə finiyən. Wʊnə wa yʊ yəm bə nyam a gwa giyʊ me ba nwi bujərri." ⁷ Gratəttə wa jɨni bətə yʊ yəm bə nyamməm. Mənni wer də bə mʊrra kantəm a kwillan, dan de ka chi wer da jɨngngən"- ⁸ mənni bo wer də təl na wʊn na rə laai təl na wi. "Kətə təlna, a yigtən sʊwa bwan, a jiwʊn titəna hanjimi. ⁹ Mənni jɨn tən nəbbən samənsawiyəm, tən nəbba dʊʊtəm bə tung jɨni ya chəriya Niyajiyʊwʊm, təmbə yʊlgoiyəm, nəbba Niyajiwʊm, na bətə sotən jɨniya mənatang a bʊniyʊ ya wa jəgənne wa mʊra kʊmmi, yɨgira kwetərrei yangʊ wa mənnatangnga bʊniyʊ. ¹⁰ Nattə nʊbə tən nəb, mənni bo kʊ tən nəbba Niyajiyʊwʊm. Tə yəbbe bʊmte, mənni kʊ kəttə yʊ bʊmte. ¹¹ Ba yodaiyəm, kən bəgən nyəra fʊbe bə yogorəm tə mwamənna jəllən da bwiyən, yə nəngnga kʊn rə yuumum ba jɨnnəmmi. ¹² Tə chi rə yobi nyai a mʊra nəbba kʊmməm, na ba, sʊ yəmma jɨnna ji da tə nəbbə nəngnga jɨni bwiramyəm ki, ba chu swiyetəttə nyai ta jɨnʊ, ki ba wer Niyajiyʊ a ko ba be gri. ¹³ Tə nwitən yəm a bənne nəbbə nəngnga dʊʊtəm bəra rə Nigra. Nwitən yəmma nidʊ nyəra bəksər, ¹⁴ na tən nəbba tau təməm, bən təm mo wʊng bə nəngnga jɨni bwiraiyəm, na wer bə nəngnga ji nyam. ¹⁵ Kang ke gən kəmmarang ka Niyajiyʊwʊng, a gwa nəngngatangnga swiyer də nyani bətə məramən nyi a nəbbə dang yəm ba mɨtəm ba nəbbə merə bərsannəm. ¹⁶ Nyəra bərə chimba dʊrəmməm, kari tə nəngnga fini rə chimba dʊrəm ba jɨnnəm a chi ji tə məra furni bwiraiyʊ, mənni tə chi nyəra keweta Niyajiyʊwi. ¹⁷ Tə ne gratə nəb warigʊ. Te chi rə yodai a chətti. Tə nwi tata Niyajiyʊwi. Tə ne grate Nidʊ. ¹⁸ Kewete, tə nəbbən dʊr a nwitangnga yəmma nəbbə gram jɨnnəm rə netangna grate warigʊ. Tə nəbbən dʊr me bə nyam rə yobiyəm, mənni rə bə bwiram. ¹⁹ Bəraki n'jiya wertangngi, kə karə wʊ ba bi fʊriya kwewiyʊ ki, a fʊlla nʊ kʊnnang a ji ya bʊnnai ya yəm bə nyammi bəri yəmtang ka Niyajiyʊwʊng. ²⁰ Wertang ki nyənnəng bətə nyang, nyəngkə ti nəngnga jɨni bwiraiyəng mənni bo tə bi fur fʊlla wʊngngənni? Mənni tə nənegnga ji nya na bo tə no kʊnnang a ji wʊ wʊngngənni ki, waiwe wertang deni a gwa Niyajiyʊwi. ²¹ A jiya nyangnyəngkə gʊ bəgənei, bəraki Kristi rə kəgang ka no kʊnnang bəra nən jɨn. Ka dʊgəmən məssarang go na tə fʊng bʊr da gən. ²² A nəngngamən bə jɨni bwirai we, nyamən bə jʊlai a nyiyangʊ. ²³ N'kəbba hangʊwʊng, a yamən be kəbbar. A no kʊnnangngəng, a sʊwe bə gʊji, mənni bo ka nəbbən dʊr da gən a gwa wʊ nəngnga duutəttə nyaiyʊ. ²⁴ Gə rə bwigo ka dəb jɨni bwirai ya nənnʊ a mʊra bwiyang gʊ a di gra ji ya riyang, na kari bən nya bən rə jɨni bwirai. Mənni bo na chi bərarə swiyer də nyan. A gwa detəttangʊwi kəttə kwara. ²⁵ Waringəm ba jɨnnəm kəttə lira tə yorore nyərarə maata lirai, mənni kʊ kəttə kauwe bwi a gwa yari tən wʊ to yuumum ba jɨnnəməm.