¹ Bitrus, ni təmriya Yesʊ Kristiyʊ, yɨgira ba chi fʊbəm, bə ka wʊssəlawʊsəlai bwi, samənsawiyəm, na ka wʊssəlabwiya mʊra Bʊntus, Galatiya, Kappadokiya, Asiya na Bitiniyam. ² A jiya yəmtang ka Niyajiyʊwʊng, Te, a mʊra kawʊrtang a gwa Wei, yɨgira nwitangnga yəm, na bo wʊssatang ka dʊgʊm ba Yesʊ Kristiyəm. Masi nəttetən dautən bəwi, na datang ka fʊriyəng a yɨgtən bwi. ³ Masi,Niyajiyʊ n'Te Yesʊ Kristiyʊ a nya dəgtang a kang. A mʊra bʊmtangʊ tə grai ka nəbən buwʊng kə fiyəng yɨgira a dʊr fʊlla dʊra sissi. Wai fʊlla we nya bərarə gʊntang ka Yesʊ Kristiyəng a mʊra ba bɨtɨrom. ⁴ Waiwe gən fʊlla wʊ me bə kiyari, me bə chi rə nemər, na bo, me bə jɨrməne. Kən tiya ji bəra nən jɨn. ⁵ Kən kawʊrgən rə kʊmni ta Niyajiyʊwi a mʊra yʊtangnga yəmbə nyam, bəra yiyarang kən ti bən nʊngbən a jitang ka gʊsətəngəng. ⁶ Kətə nəngnga fur də kwauwʊn a nyangnyəngke, Nən kwini ba chi gəmmən kwak tə nwi fur də yʊlluwʊn a jʊttə dəndangngi ya kʊnanəngngi. ⁷ Kangkə ka bɨngotang ka nəbbəntangnga a yəmbə nyam ba jɨnnəməng, yəmbə nyam ba li wetəttə kəlchə-kəlchi nyagʊ na kiyari, nən kwini kən bɨngo rə kərang. A nəngnga bwi nyang go na nya yəmbə nyam ba jɨnnəm rə wertang, na grate, rə netangnga grate a betang ka Yesʊ Kristiyəng. ⁸ Tə chube hangʊ, mənni kətə yotən da. Me tə churə hangʊ kʊ nyangnyəngke, mənni kətə yʊ yəm bə nyam, mənni katənə fur də kwauwʊn deni a li ji bən sʊwei, rə bwiləmri deni. ⁹ Tə yʊ nəttəta yʊtang ka yəm bə nyam ba jɨnnəmi, yiyarang ka yuumum ba jɨnnəməng. ¹⁰ Nəb yʊwerəm ka fau a nəngna gʊllən den a jiya a kang yiyatang ke, a jiya nətəttən dautən bəwi tə ba yullo nən tiniyʊ. ¹¹ Ka fau go tə yəm wʊne na wʊni ji wʊ Wen Kristiyʊ ka mʊra ji sotən yəmma hanjimiyʊ. Waiwe a nəngnga bwi a ji wʊ hangʊ wa sotən yəmma hanjim a jiya kʊnang kən Kristi ba no kaggəng na rə, jɨni rə grati ya bukkan gəngngi. ¹² Kən jəggatən na hamjimi mo me bə nəngngatən swiyer a dʊttəta jiyʊ, mənni jɨn, a fʊlla wʊ hanjim a sʊ yəm a jiya jɨniyən hanjim a sʊgəməni a gwa bə wagəmən yəm bə ləmmangngəmi a gwa We Yʊlgoi təme wa jiyʊ- Jɨniye weni təmri a lang farə go tə chuwi. ¹³ Bərarə nyang tə bʊ furnan jɨnnʊ. Tə tau dʊr. Tə ti furnan jɨnnʊ dʊra sissi a nəttətən dautən bəwi a jiya bətang ka Yesʊ Kristiyəng. ¹⁴ Nyəra bətəm bə nwi yəmməm, kari tə fʊngtəna jəllən də bwiran da jɨnən də kʊniya mɨtəm. ¹⁵ Mənni nyangkə wa bəgənnei wʊ Yʊlgoiyəng, jɨn, rə kəniyəng, tə chi rə yʊlgoi a mʊra yobiyan jɨnnʊ warigʊ. ¹⁶ Bəraki kən mʊla, "Tə chi yʊlgo, bəraki mənnən yʊlgo." ¹⁷ Kə tə bu to "Tai" wʊ nəngnga duute me bə samənni, a jiya swiyer də wʊnə nəngngan, tə chi chiyəm ba yom ba jɨnəməm rə netang a grate. ¹⁸ Tə yəm to yəggənne bərə kweyəlga kiyari tən wetəttə kəlchə-kəlchi a gwa yobiya mɨti tə jauwe fʊlla rə ga tebəba jɨnnənmi. ¹⁹ A nyangngi, yəgənne rə dʊgʊm bə kalʊriyəm ba Kristiyəm, wʊ nyəra be bəngla wʊ nerə bwiran tən dələndei. ²⁰ Kristi n'samən lambə nəngnga gʊsəte, mənni kʊ kən nʊngən a mwatəntta fʊllai. ²¹ A gwan giyʊ kətə ne yəm bə nyam Niyajiyʊ, wa gug hangʊ a bwiyatə kali kinni, na bo ne grati na ba yʊtang a yəm bə nyam ba jɨnnəm na titangngan ka dʊrəng ka jɨnnəng a sissi a chiya mʊra Niyajiyʊ. ²² Kə ti yuumum ba jɨnnəm rə kalʊri a gwa nwitangnga yəmmi yɨgira yəmbə nyam. Waiwe bərarə yodai nya wa chətti; tə yogodate rə furni nyai. ²³ Kən kaubwi bəgən, me gwa dʊwʊm ba kiyakiyaiyəmi, mənni bo a mʊra yuumum na chim a bwanda Niyajiyʊwʊn. ²⁴ Bəraki "nəb warigʊ nyəra rə yir, na nyiyar da gən warigʊ nyəra rə filən da yirrən. Yir ka kʊse, mənni filən hən ka yar, ²⁵ mənni bwanda Nigran ka chi bwi kʊrəkwang. "Dan də gən yəm bə ləmmangngəm bən sʊgəmənəm.