¹ Jii wun be gwan jəniyu, chitte, bebə rə dəlta yəmi rə yəmtangngi nyəngkə si finang ka yəmba kulu-kuluwi bwiyəng jəgga a jiya Niyajiyuwung. ² Bǝrki kǝn dǝb a furiya miyu kari bǝn yǝm guji a ji wunə ka kini a diməna Yesu Kristiyu ngə wun yuwa riyang yuwarangngi. ³ Nǝn ka kin a mura yarmǝntang rǝ tate rǝ yartang ka kagngǝng mwam. ⁴ Yǝmba miyəm tən finang ka miyəng meri bwantǝta dǝlta bwantətta bərsani tǝ tarǝ kǝmarangngi. A jiya nyangngi, a be nǝn jiggatang ka yummǝng rǝ kumni, ⁵ nan ba nəbǝntang ka yǝmbǝ nyamǝm ban jinǝm ba yulo a mura yǝmtang ka nǝbbǝng, mǝnni a mura kumni ta Niyajiyuwi. ⁶ Kʊ nǝn su yǝmba bǝrsanǝm a mura nəbba bibiyǝm, menni me bǝrsan da gʊsǝtǝn, me da tangərdən, dǝ surǝn. ⁷ A nyangngi nǝn sʊ bərsan da Niyajiyuwʊn a kulu-kuluwi bwi, bǝrsan da kulu-kuluwi bwiyən da Niyajiyu a sʊwe rə langtangngən bǝra rǝ gratǝtta nənnʊ. ⁸ Merǝ gʊ wʊ nǝngnga dʊʊte a tangngǝr dande a yǝm kang yǝmtang ki, bǝrki na lʊng go a wai jii wʊre hanjɨm ka yǝmki na yʊwabə Nigra rə grati. ⁹ Mǝnni a nyǝnkǝ mula rəgəng, ''Jɨni kǝmta chubi, merǝ suna nwi yu, merǝ furiya nǝngnga kǝmmarang ka ngǝngngi, jɨni Niyajiyu wa yǝngna tǝna ba yotən daam. ¹⁰ Jɨni yaiye giye Niyajiyu a jǝgga bǝmǝn a gwa wei. Bǝrki We ka sǝnna wuniji warigʊ, na jɨni wululoi ya Niyajiyuwi. ¹¹ Mǝnni wune ga yǝm kəmarang ka niyeng, a diməna we ka mura nihiyʊki? Nǝn nyang bo, merə wa yǝm jɨni wululoi ya Niyajiyuwi mǝnna We Niyajiyuwi. ¹² Mǝnni nə yǝbbe we gʊsǝti, mǝnni We be agwan Niyajiyuwi, na ba yǝm jɨni Niyajiyu a nǝbbǝn a dati. ¹³ Nǝn sʊ yǝmba jɨni yaiye a mura bwantətta bǝrsan da niyən me ba dǝmǝn na mǝsatǝn na gʊwʊn, mǝnni bǝ We mǝsabǝmǝnnəm. We bǝ jǝgga bəmən bwantǝtta wei rǝ bǝrsani. ¹⁴ Ni mebǝ yora mura wei me ba yʊ jiya chi wa We Niyajiyuwi, a chi jɨni rə kʊni yangi. Me ba yǝm bǝraki we jǝggare. ¹⁵ Wu yora mʊra wei ka muya duuta jɨni warigʊ, mǝnni hangʊ me wa mura sʊtətta duutətta bagiyʊ. ¹⁶ "Wune gǝbba dǝmmǝn a yǝm furiya Nigrai, ki ba dǝmmǝn a sotən ji ba nəngngayuwʊng?" Mǝnni kanǝnnǝ kǝmarang ka Niyajiyuwʊng.