¹ Bulus, buwong ka Kristi Yesuwung na ba yulo ni tǝmri a kǝmmarang ka Niyajiyuwung, na chiya nǝnnu Sastanisu, ² yigira Ekklisiya Niyajiyuwum bǝ ka Korintiyəm, yigira bǝn kawur rǝ yulgoyəm a mura Kristi Yesuwi bǝn buwe mo na chi nǝbbǝ yulgoyim. Kǝnǝn mulatǝnǝ bo a bǝ bǝra dunda Nigra nǝnnu Yesu Kristiyəm warigu a gani dang dang, Nigra jiyu na wuni. ³ Masi na nətəttə nən dabi na chimbǝ lǝmmangngǝm a be gwan jǝniyu agwa Niyajiyuwi Te nǝnnu na Nigra Yesu Kristiyu. ⁴ Jutukwang kǝmǝn wunatǝna Niyajiyu wa miyu bǝri nǝn jǝn, bǝrǝri nətəttə nən dabi ta Niyajiyu na Nigra Yesu a nǝngnga gǝmǝni. ⁵ Ka nǝggǝn jǝna kaniyu a jutǝ dang-dang a mura yǝm tən yǝmtang warigu. ⁶ Nyǝra bʊtang a bug a gwa Kristi a sǝitǝnna yǝmbǝ nyam a jʊgʊr da jǝnnǝn. ⁷ Bǝrǝrǝ nyang tǝ bunabe tagi nǝttǝta wei a jii wutǝ yammere betang ka Yesu Kristiyəng. ⁸ Ba yǝggǝmmǝn kumni bo yəgira jitang , na ba tǝ yulo bǝ merǝ bwirannǝm a kowa Nigra nǝnnu Yesu Ni Jǝgriyu. ⁹ Niyajiyu rii ji suweriyu wa bǝggǝne yəgira chimba murgatangnga durəm ba Yəlanguwum Yesu Kristiyu, Nigranənnu. ¹⁰ Kǝmǝn chilagǝnne , chittǝtta miyu, a mura dunda Nigranǝnnu Yesu Kristiyən, tǝ nga rǝ bwita jǝnnu, kari wutǝgotang a bwite a diga jʊgʊr da jǝnnǝn, kǝmǝn chilagǝnne tǝ chi rǝ furi kwan na rǝ kǝmmarang kiyǝn. ¹¹ Bǝraki nǝbba kaitang Kuluwi ka be rǝ yǝm go ka wutugotang a bwita jʊgʊr da jǝnnǝn. ¹² Mǝn nǝngnga kǝmmarang a jiya, wunan jənu ki bə suwe go, "Mə wa Bulusi," gu go "Məwa Affolosi," gu go "Məwa Kefasi," gu go "Məwa Kristiyu." ¹³ Kristi ya wutugo-wutugo bwi ga? Kən yuwa Bulus bǝri nǝn jǝnga? kǝn nəngnga gǝmǝn batisma rə dunda Bulusǝn ga? ¹⁴ Kǝn wunatǝna Niyajiyu bǝra ki nəngngatən bə batisma guwan jənu, a di mǝna Kirisfus tǝn Gayusi. ¹⁵ Nǝngnyang kari gu ba suwe go kǝn nəngnga gǝmǝn batisma mura dunda miyǝn. ¹⁶ (Kǝn nəngngatən batisma nǝbba kai tan Sitifanasi. A suməna nyangngi ki yǝmbe ki kǝn nəngngatən batisma bagi ki.) ¹⁷ Bǝrki Kristi a tǝmiye bǝ go nəngnga batisma mənni go wau yǝm bǝ lǝmmangngǝm. A tǝmiye bǝ go wau yǝmbǝ lǝmmangngǝm rǝ bwan tǝtta bǝrsan da nəbən. Kari yuwarang ka Kristiyəng ba chi merə kumni. ¹⁸ Bǝrki yǝmba riyang yuwarangngǝm swiyer dǝ rǝ kunnǝn a bǝ bǝttǝrorǝm. Mǝnni a mura bǝ Niyajiyu yiyarǝm, kumni ta Niyajiyuwi. ¹⁹ Bǝrki mula mo "Bǝn lukte yǝmtang ka bǝrǝ bǝrsanǝm. Bǝn lukro yǝmtang ka bǝrǝ dǝliyǝm.'' ²⁰ Wurǝ bǝrsani ka le? Wurǝ kerang kǝ wulolongngi? Wurə bura gʊsətiyu? Niyajiyu wa wulgabe yǝmtang ka gusitǝng a yulo kǝrǝ kunnəng ga? ²¹ Na chi gusitǝ a mura yǝmtang ka ngǝng a yǝmbǝ Niyajiyuwung, ka dautǝn na Niyajiyuwi a gwa mwʊtətta wautang nga yəmi a yiya ba nga rǝ gǝm. ²² Bǝraki Yahudawa bǝ nəngnga gulən da nʊngtang a jənna mǝnatang a bunniyǝng, mənni Helinawa bo bǝ fau bǝrsan. ²³ Mǝnni nǝn wau yǝmba Kristiyəm wǝn buro riyang yuwarangngi, wer da tǝltangnga nan a gwa Yahudawa na bo swiyer dǝrǝ kunnǝn a gwa Helinawai. ²⁴ Mǝnni a bǝ Niyajiyu wa buwem, Yahudawa na Helinawan nǝn wau yǝmba Kristiyǝm a nyira kumni tǝn yǝmtang a Niyajiyuwi. ²⁵ Bǝraki swiyer dǝrǝ kunnǝn da Niyajiyuwung ka suməna bǝrsan da nǝbbǝn, mǝnni bo bunnai ya kumni ta Niyajiyuwi ka li ta niyu rǝ kumni. ²⁶ Tǝ jǝga buwong ka jinǝng, chitte. Men warigu wa jǝnnu rǝ bǝrsan a mura yəmtang ka niyəng. Men warigu wa jǝnnu rǝ kumni. Men warigu wa jǝnnu rǝ buuwung ka dʊtǝng. ²⁷ Menni Niyajiyu ka samǝn jǝnni mwʊti ya gusǝtti go na gǝ ne bujiri bǝ rǝ bǝrsanǝm. Niyajiyu ka samǝn ji merǝ kumniyu a gusəti na gǝ ne bujiri wurǝ kumniyu. ²⁸ Niyajiyu ka samǝn ji merǝ nyiyarri na bo wu mamǝn dǝliyu a gusǝtti. Bo ka samǝn jǝniyǝn dǝbba nyiya gujiyu na gǝ lǝbtǝmǝn jǝnni a yǝn dǝbbərǝ nyiyari. ²⁹ A nǝngnga bəri gu ba nya jiya gugtang a duri a kak ka gǝng. ³⁰ Bǝrki ji Niyajiyu wa nǝngngai, kʊ tuwa mura Kristi Yesuwi wu ka chibǝmǝn bǝrsan da nənnən a gwa Niyajiyuwi. Ka yulo ji nya nǝnnu, yulgoi, na yuwerang. ³¹ A nyatang nyangngi, nyira kǝ nyai a suwe rǝgǝng, "Masi wu mǝgsari a mǝgsa mura Nigra."