¹ Kʊ kǝmǝn kǝmmangǝmǝne, chitte, a yǝmbǝ lǝmmangngǝm bǝn nǝngnga gǝmǝn finang ka gǝmǝng, bətə yuwʊm na tə si wa jiyəm. ² Yiya gǝn bǝra ban yǝmbǝ lǝmmangngǝm be, ki bǝtǝ tau yǝmbǝ lǝmmangngǝm bǝ sugǝmǝnnǝm rə kumni ki, me da tǝ nǝbbǝn yǝmbǝ nyam nǝn kunki. ³ Bǝraki kən nəgǝn jirǝ finiyu rǝ jigʊ nyəngkə yʊwe gərə rə kinəngngəng: mo Kristi ka bwiya bǝra rə jɨnni bwirai ya nənnʊ nyəngkə rə ga wangngəng, ⁴ go kǝn dǝg Hangʊ, mǝnni bo kən guk a mura ko bwanbiyu nyǝngkǝ wang a suwegrǝng. ⁵ Kristi ka nʊng durdangǝn Kefas, tǝn bǝ kʊw a jǝr bǝsuwʊm; ⁶ ka jirtǝna chittətta li betǝ tǝ nuwiyən a fulla kwan. Mwami yan jiyu ka rə yum berə tən kʊ, mənni bǝgai ka lubǝn a duum. ⁷ Ka jirtǝna Yakubuwiyǝng, ka mǝnna yɨga gwa nəb tǝmrǝmiyəng. ⁸ A jitang warigʊwʊng, kən Hangʊ a jirimǝneng, nyǝra bweng bu a labǝ fulla guwi. ⁹ Bǝraki a mura nǝb tǝmrəm məmmʊ wʊ kǝttəlegʊwi. Mənna dautən bəwe m’bi mo nitəmri bəraki kən ne kunang Ekklisiya Niyajiyuwʊn. ¹⁰ Mǝnni a gwa nǝttən dautǝn bǝwi ta Niyajiyuwi kə yu ni nyǝngkə chui rəgəng, nəttəttangʊ tǝn dautən bəwi a gwa miyu mə təri kʊnni. A bukka nyangngəng, kən nǝngnga swer rə kumni a li hanjim warigʊ. Rə nyang hi, me mə mən nəngnga, mǝnni n'nəttəttən dautən bəwi ta Niyajiyuwi tə ka miyu. ¹¹ Bǝra rə nyang, ki nə məki ki nə hanjim ki, nə wau yəm nyang kə tə nəbbən yəmbə nyam wʊng. ¹² Kʊ ki kǝn si finang ka Kristiyǝng mo ka gunmənne wa ba bətəro bətəroiyəm ki, ba nəngnga go nyənəki bagi ban jinəm sʊwerə go me guntang ka bwiyatəngwe? ¹³ Mǝnni kǝ me guntang ka bwiyatəng wʊki, a chi Kristihi gəma gukbe; ¹⁴ A chi Kristihi gukbə ki, wautang ka yǝməng ka nənəng ka chi kərə kʊnəng, nəbəntang ka yəmbə nyaməng kan jənəng ka yulo kərə kʊnəng. ¹⁵ Nyang bo, kǝn nyabǝn rə nyata tiyattang a jiya Niyajiyuwi, bəraki nən bʊ buk ka nyatənga Niyajiywi, nən sʊrə no ka guk Kristi a buk ka gukbəng. ¹⁶ Bǝra rǝki gukbə nəb a bwiyatəki, Kristi rə kəggang gukbe; ¹⁷ mənni gukbə Kristi ki, nǝbbǝntang a yǝmbǝ nyam ba jǝnnəm ka chi bərə kʊnəm, nyang bo tuwa mura jənni bwirai yan jənnu. ¹⁸ Ba bǝtǝro mura Kristiyəm rə kəgiyəng ka kiya. ¹⁹ Ki titang a da nənnʊ a mura Kristiyu a siya ban yum bə ki, a mura nǝb warigʊ bǝn li nwitang a kʊnang ka nənəng rǝ kwani. ²⁰ Mǝnni kʊ kǝn guk Kristi a mura ba bǝtəro bətəroyəm, bitang kərə jigʊwʊng a mura ba bətərom. ²¹ Bəraki a chi bwiyate a dɨgiye wa gwa ni kwaniyəng, guntang ka bwiyatǝng a be gwa ni kwani. ²² Bǝraki nyǝra ka mura Adamuwi nǝn bǝttǝro gǝrǝng, nǝn nyang bo a mura Kristiyʊ bənən yulo bərə yuuməm waringəm. ²³ Mǝnni wuniki rə nyəngkə swur rǝgǝng: Kristi, bitang kǝrǝ jigʊwʊng, rǝ ba chi ban Kristiyǝm bǝn ne yʊm a betang kan gǝng. ²⁴ A wai fulahi ki n'jitang, jii wʊn Kristi ba yagtən dʊʊtə gəra Te Niyajiyuwi. Ba chi bwi a fulla wʊ hangʊ ba dəbmən sori gəri tən gratə na rə kumni warigʊwi. ²⁵ Bəraki a chin bwi Hangʊ a nəngnga dʊʊte yǝgira fulawʊ bən deg nəbba kagǝm ban gǝm gǝra tǝmba nananguwumi. ²⁶ A jitang warigʊ chugo kakgi bǝn ləbti bwiyate. ²⁷ Bǝraki "hangʊ ka dəg jɨnni warigʊ a nanangʊ." Mǝnni a sʊwe go “hangʊ ka dǝg jɨnni warigʊwʊng," wa tari kwetəre go a murgabə rə wa dǝg jɨnni warigʊ a rutǝna hangʊwiyu. ²⁸ A fulla wu jɨnni warigʊ ba rutǝna hangʊwiyu, a wai jii ki Yəlli ba rutənna hangʊwi wa dəg jɨnni warigʊ a mura warigu a rutəni. Nyangki ba nǝngnga bwi nan ba Te Niyajiyu a yullo gǝn wunǝ jii warigi a mura jɨnni warigʊ. ²⁹ Me nǝn nyangki bən nǝngngatən batisma bərarə ba bətərom ba nəngnga go nyəne? Ba bətərom gugmən bəwʊ ki, wula ma ki nəngngatən batisma bəranən jiyəng? ³⁰ Wula ma bo ki nǝwa mura kunang jətəkwʊngngəng? ³¹ Wunə ko ki mǝn chu bwiyate! Gən yəmbə nyamhəm nyəra rə wertang ka durəng ka miyəng a mura jɨni, kankə mən ka mən gəra mura Kristi Yesʊwʊng Nigra nənnʊ ³² N'nya jirtang kə nyənəng, a sʊtang ka niyəng, nǝngnga bwigatə nən namta yiri a Afisa ki, ki gugbə nǝbba bǝtǝrom ki? ''Tǝ nǝn jau nǝn no, bǝrki rǝ sila ki bǝnǝng bətəro.'' ³³ Kar bǝng jʊlangǝng, "Bǝraki chim rə nǝbbǝ bwiram ka lugtə yobi nya.'' ³⁴ Tǝ tau dutǝ rə kumni! Tə chi chimbə nyam! Tə dʊ nəngngtang a jɨnni bwirai. Bǝraki bagi ban jǝnnǝm mǝrǝ yǝmtang ka Niyajiyuwʊng. N'sʊwe nyang ki mo bana hanjim ba nǝggǝn bujiri. ³⁵ Mǝnni bagi ba sʊwe go, "Bǝn guk ba bətərom mo nyǝne, ba be rə yənnə bwi giyə ba bɨrawʊ gəri?" ³⁶ Tǝ wa bunai ya yǝmtangngi deni! Dʊwum bətə wauwum me ba gəra na bwiyabəki. ³⁷ Ji bǝn wauwi me gən bwi yəbən chuwi, bəraki n'wau dʊwʊḿ gən kwan. Kaiki ba jiren nyangmi a chi me nən guji dang ki. ³⁸ Mǝnni Niyajiyu ba nen bwi nyǝngka chu a dautǝnwʊ rəgəng, bǝnǝ dʊwʊmki rə bwiyangʊ. ³⁹ Me bwitə warigʊ yǝ kwani. Mǝnni, yagi bwite ya nəbbi, yagi ya ra ya namti, yagi ya kǝlleti, na rǝ ya laati. ⁴⁰ Nyang bo ka bwita jiyuwe ka ya tǝmmi we. Mǝnni gratǝtta bwita jiyu ka dimən dang a ta gratətta tǝmi. ⁴¹ Tagi grate ta koi, tagi ta sʊngngi, tagi ta betə-sʊngngiyu. Bǝrki gʊ be sʊngngi ka dimən dang a gʊ besʊngngi rə grate. ⁴² Nǝn nyang bo rǝ guntang ka bwiyatəng, ji wauwi ji kiyari, mǝnni bo wung guggi men ji kiyari. ⁴³ Wau nən yaksir; gug nǝn grate. Wau nən bwi latəttiyu; gug a mura kumni. ⁴⁴ Wau nǝn bwiya gʊsəti; gug nən bwiya we yulgoiyu. Ki ka bwi ya gʊsətiyu wʊ ki, nyangbo ka bwi ya We Yulgoiyuwi. ⁴⁵ Nǝn nyang bo mula-mulai, "Ni rə jigʊwi Adamu ka chi wulo rǝ yuumi." Adamu wa balei ka chin we wʊ nəbən yumi. ⁴⁶ Mǝnni wa yobi ya wei a baltənne bale a wa bwiya gʊsəttə. ⁴⁷ Ni rǝ jigʊwi wa gʊsəti, nǝngnga nən tǝm. No ni sʊwi a jire wa ji. ⁴⁸ Nyǝra kǝ ni rə jigʊwi a jire wa tǝmmǝng, nǝn nyang rə nǝbbə nǝngnga rǝ tǝmmǝm, nyǝra kǝ ni wa jiyu ka gǝrəng, nən nyang rə nəbbə ka jiyǝm. ⁴⁹ Nyǝnkǝ nǝn dǝb bwi ya niya tǝmi rǝgǝng, nyang go bǝnǝn dǝb bwi ya ni wa jiyu. ⁵⁰ Kʊ chitte, mǝn sʊwe mo, namtə tən dʊgʊm merə kulla a mura dʊʊtatta Niyajiyuwi. Ji kiyari merə kulla a ji me bǝ kiyarǝyu. ⁵¹ Chu! Mǝn sugəmǝn yǝmba kǝlu-kǝluwi bwiyəm bə nyam: Me bənən bǝtǝro warigʊ, mǝnni bǝn wulgabǝn bwite. ⁵² Bǝn wulgabǝn bwite a mura fulla bani rəgʊ, nyǝrǝ rǝ bautang ka kǝmiyəng, a gutang ka jʊmməng. Bǝraki a gutang ka russiyəng a mwattəne, ba bətərom ba guno rə bwi me bə kiyari, bǝn wulga bən. ⁵³ Bəraki yə bwi kiyari ye a chin kwak a mai yə mebə kiyari, na no bwi bwiyari a dəb yə me bə bwiyari. ⁵⁴ Mǝnni a fula yai bwiyati ba dəb yə me bə kiyari ki, na bwi bwiyari ye ba də yə me bə bwiyariyu ki, yǝmbə mulam ka suwe go, "Bwiyate kən jau rə kun." ⁵⁵ ''Bwiyate, kwelta mʊ wa le? Bwiyate, səmba mu wa le?'' ⁵⁶ Kumnita bwiyatǝn jɨnni bwirai, kumni ta jɨnni bwirayu n'sori. ⁵⁷ Mənni wunnan yəgira gwa Niyajiyuwi, n'ga nǝbǝn jautang a kun a gwa Nigra Yesʊ Kristiyu! ⁵⁸ Bǝra rə nyang, chəttǝtta miyu, tǝ si rə kumni me mǝggatanga bwi we. Tə jarǝ kak a swer da Nigran, bǝraki kǝtə yǝm to swerda jənən a mura Nigrai me dǝrǝ kʊnǝn.