¹ Tǝ fau yodai rǝ fumtang a nǝbǝntang a yobiya wei, nyǝra kǝ bǝ tǝ nǝngnga yǝm yuwerǝm rəgəng. ² Bǝrǝki wu surre yǝm rǝ Langti me bǝ sutǝna nǝb bǝ sutǝna Niyajiyuwi. Bǝra kǝ merǝ wu jiggari hanguwi bǝrki bǝ su jiya bara-barai bwi a wei. ³ Mənni wʊ surə yəm yuwerəmmi bə sotəna nəb ba na hanjim a gra, na yigtǝn kumni tən singtangnga fura hanjimi. ⁴ Wu sure yǝm rǝ tagi langti, bǝ mu durda gǝn, mǝnni wʊ surə yuwerǝmi bǝ mu Ekklisiya. ⁵ Kʊ mə fau mo na tǝ sʊ yǝm a mura langte. Mənni kə na ba li nyang ki, kən fau mo natə su yəm yuwerəm. Wʊ sʊrə yəm yuwerəmi ka li wʊ sʊrə yəm rə langti (a chi ka rə wu jiggari na Ekklisiya gra). ⁶ Mənni kʊ, chitte, n'be gwan jiniyu mən sʊrə yəm rə langtə ki, bətə yigtən bwi nən wulai? Me ba nəngnga bwi, bumni sugumǝn yǝm rǝ churang, rə yǝmtang, rə yəm yuwerəm, na mǝsarang. ⁷ Ki jɨnni buktərə me rə yumi ka jig jir ki- nyira suyang, letǝ - mənni na jig bə jir tə dan-dang ki, ba nəngnga go nyəni ki gʊ a jigga jir da suyang tən lete guri? ⁸ Mǝnni gu jum rǝ jir dǝn jigga bǝn ki, ba nǝngnga go nyəni ki gʊ a yǝm fulla bən kura bwi gəra kuni? ⁹ Nyang nǝn jin, tǝ sʊ yǝmbǝ merǝ finiyǝm ki, bǝ nǝngnga mo nyǝnnə ki gʊ ba jǝgga ji tǝ suwei? Bǝ chi sʊ yǝm mǝnni merə wuba jǝggai. ¹⁰ Me buri we ka langtǝwe dan-dang a gʊsǝte, mǝnni merǝ dǝ mǝrǝ finiyǝn. ¹¹ Mǝnni na jǝgga bǝ langǝrhən ki, bǝn yullo ni fuwe a wu surǝ yǝmi, mǝnni bo ni surǝ yǝmmi ba yulo nifuwi a gwa miyu. ¹² Nǝn nyang a gwan jǝniyu. Bǝrǝ gǝrǝ nyang, a chi tǝ katǝ farə chutang ka Weng, tə fumbur a swer da mutang a Ekklisiya. ¹³ Mǝnni bo wu surǝ yǝm rǝ langnti a ruwa nyini na dǝman nyəngkə ba jigga gǝrǝng. ¹⁴ Bǝn ruwa nyini rǝ langər ki, we miyu ka ruwa nyini, mənni yəmtang ka miyəng a yigtən bə bwi. ¹⁵ Bǝn nǝngnga wulai? Bǝn ruwanyini rǝ we miyu, mənni bən ruwa nyini rə daa miyu. Bən ma fiyang rǝ we miyu, bǝ ma fiyang rǝ daa miyu bo. ¹⁶ Me nyang ki, tǝ wer Niyajiyu rǝ we ki, go nyəni ki, bǝn nǝngnga nyinne ki ba tariyǝm a nga go, “A chi nyang” a fula mǝn nəngnga wunanni na yəmbə ji mən suweri? ¹⁷ Bərki me jʊgʊrwe kǝn nǝngnga wunnan nyangu, mǝnni bo gʊ yǝgtǝn bə bwi. ¹⁸ Kǝn wunna tǝn na Niyajiyu bǝrken mǝn kamǝn sʊre langte a ligǝn warigʊ. ¹⁹ Mənni a mura Ekklisiya kǝn li fautang sʊgəmən bwantə tə nu rə yəmtang ka miyəng na nya yəngna bəgai, a li netə kwau rə langngər. ²⁰ Chitte, karbǝ tǝ yulo bǝttǝbi a mura kǝmmarang ka jɨnnəng. Mənni ji ya chi wu bwirai, tə chi rə yoba bətəmbə kətəl-kətəlləmi. Mənni a kəmmarang kan jinəng a chi kə grang. ²¹ Kən mula mura sori, “Bǝn sotǝn yǝm a nǝb bambe rə langtətta nəb berəmmi rə bəltənyai ta nəb berəmi bən sotən yəm a nəb bambe. Warigʊ rə nyang hanjim me ba nwi," ji Nigra suwei. ²² Bəra rə nyang langte jiya nungtangngi, me bǝri nəbba nǝbbǝn yǝmbǝ nyaməm, mənni bǝra rǝ Ekklisiya. Mənni yǝm yuwerǝm bəri nungtang, me bəri ba nəbbənbə yəm bə nyaməm mənni bəra ba nəbbən yəmbə nyaməm. ²³ Mənni gi, kulmor a kʊra bwi warigʊ na wunan jiyu sʊrǝ yǝm rǝ langtǝ ki, na gʊ wa tariyu tən wa nǝbbǝnbǝ yǝmbə nyami a diggiyeki, me ba sʊwe go jɨna talgən ga? ²⁴ Mǝnni ki warigʊ na ba sʊ yǝm yuwerǝm ki na gʊ wa nǝbbənbǝ yǝmbǝ nyammi tən ni-beri a dɨgiye ki, bwirandan gən bəri ji ya nwiyʊ. Bǝn nǝngngatən duute rə warigʊ yǝm bən sʊwem. ²⁵ Jiya mǝrra-mǝrrai a furangʊwi ba jǝg bwi a tari. Bəra nyangngi, ba dəg dʊra təm a ruwatən nyini ya Niyajiyuwi. Ba sʊwe go jumbə nyam ka Niyajiyuwe a muran jənni. ²⁶ Ji ba fʊngngei wulaigi, chitte? A fula tǝ kura bwiyu, wunan jǝnʊ ki karə fiyang, gʊ ka rǝ mǝsarang, gu karǝ chutang kǝ furereng, gʊ langte, mǝnni gʊ nǝn jǝggatang. Tǝ nǝngnga wuni ji bǝrarǝ mutangnga Ekklisiya. ²⁷ Kǝ bǝ nya kwan ba suyǝm rǝ dagi langngəri ki, masi nan nya nǝb bǝsu a nənngnga mwamki nya bǝ bǝ bwanbi, na wunan jiyu ki a sʊ yəm a bʊkkə gʊ a mwarmənnəng, nan nya gʊ wʊba wʊlga jin sʊwei yu. ²⁸ Mǝnni a chi merǝ ni ba wʊlgai ki, wunan jiyu ki a məra nyi a mura Ekklisiya. A chi wuni ki bə sotən yəm a dur da gən tən Niyajiyu. ²⁹ Masi na nǝbbǝ yuwe yǝmmǝm bǝsu yigira bə bwanbi a suweyǝm, na bǝgai ya kautən suni rə jǝggatang a ji suwei. ³⁰ Mǝnni kǝn ne chutang kə wulʊlong gʊ wʊka chi mura nyiniruwaniyu ki, wʊ ka surə yəmi a masi. ³¹ Bəraki warigǝm bajənnəm bǝtǝ dǝmən tǝ su yǝm yuwerǝm kwan rǝ kwan nan ba wʊnə ki a məssamǝn we na warigʊ wa jənu a nya kumni ta furiyu. ³² Bəraki wena nǝbbǝ yuwe yǝmməm wa nǝbbǝ yuweyǝmǝmi. ³³ Bǝraki Niyajiyu me Niyajiyu wa tǝrtangngi, mənni wa chim ba lǝmangngiyu. Wai we gən sori a mura a kʊləntətta Ekklisiyai warigʊ. ³⁴ Jiya chi go nyiyu a masi sau a mura Ekklisiya. Bǝraki ngatǝn ba hanjimi mo a sʊ yǝm. A dimǝnna nyangngi, hanjim a chi nǝbbə nəbən durəm, nyǝngkǝ sori ya sʊwe gərəng. ³⁵ Kǝ karǝ ji hanjim ba fau yǝmtangngi ki, hanjim a gʊl nǝbbə barǝm ban jiyǝm a kai. Bǝrǝ ki jiya bujiriyu nyi a sʊyǝm a Ekklisiya. ³⁶ Yǝmba Niyajiyuwum a be gwan jiniyu ga? Dang nǝ jin gəbə yəm a lawum ga? ³⁷ Kǝ gʊ bǝ dəb dʊrdan gən go gǝn ni-yuwe yǝmmi ki, ki bǝ dǝb go gənnən yobi ya wei ki, a nga go jɨnni mulaiye n'soriya Nigrai. ³⁸ Kǝ karǝ wuba kwila bambi ki, kǝn gǝmma kǝn kwila. ³⁹ Bǝri rǝ nyang, chitte, tǝ fumbʊr na tə nya tǝ sʊ yəm yuwerəm, na kari tǝ dang gʊ re sʊtang a langte. ⁴⁰ Mǝnni wʊnə ji ki nengnga nyagʊ a mura mǝsatang a jiwa dautən wi.