¹ A jiya nəttətta yobiya Wei, chitte, me mən farə mo tə chi rə bunaiya yəmtangngi. ² Kǝtǝ yǝm to a jiwu tǝn nǝbba kumǝmmi, kǝ julagǝn yigira gwa yəttənatə me bə surə yəmmi, a jutə dan-dang hanjim a jula gən gəri. ³ Bǝrarǝ nyang mǝn fau mo tǝ yǝm me rǝ gu ba suyǝm rǝ We Niyajiyuwi wuba suwe go, “Yesʊ ni nǝngngatən nyiyu.” Mere gʊ ba suwe go, "Yesu Nigrai,” a dimǝnna We Yulgoi ki. ⁴ Kʊ ka nǝbbantangwu dang-dang, mǝnni We kwani. ⁵ Ka gana swerte wu dan-dang, mǝnni Nigra wu kwani; ⁶ Ka swiyer tǝ tǝmri wu dan-dang, mǝnni Niyajiyu ba nʊng nǝb nyǝra kǝba nǝngnga grǝngngi wu kwani. ⁷ Nə wuni ki karǝ swiyer da Wen tangsang na warigu a nyamən we. ⁸ Bǝrki gʊ kǝn ne bwanda bǝrsanǝn a gwa Wei, gu bo n'ne bwan da yəmtangngən a mura We kwan. ⁹ Mǝnni gʊ kǝn ne nǝbbantnag ka yǝmbǝ nyamǝn a gwa Wehiyu, gʊ kǝn ne nǝbbantang ka kwaratang ka nǝbbǝng a gwa Wehiyu. ¹⁰ Mǝnni gʊ swiyer dǝ re kumni gʊ yǝm yuwerəm. Gʊ kǝn ne nǝbbantang ka jǝgga weni gri, mǝnni gʊ langtə dang-dang, mǝnni gʊ jǝggatang a langtǝng. ¹¹ Warigu kangkə swiyerda We kwanǝn, ga wutogotən nyǝngka fau rǝ gǝng. ¹² Bəraki nyəngkə bwi kwan rə suni dan-dangəng, warigu sunibwi dan-dangngi ye wa bwi kwan, Kristi nən nyang. ¹³ A mura We kwan warigʊ gun nǝngnga bǝmən batisma rə gi yigira bwi kwan, ki Yahudaw ki , ki Helinawa ki, ki mənən chim ba durəm ki, ki buwa-buwanki, warigum ba nənǝm nobǝn nən We kwan. ¹⁴ Bwi me bǝ chirǝ gǝn kwan, a murga suni dan-dang mwam. ¹⁵ Kə na ba sʊwe go, ''Me mǝn kang, mǝn me mura bwi ki,” wai ji a mamǝn bǝ guji ya bwi. ¹⁶ Mǝnni suu a suwe go, "Bəraki me mǝn kǝmmiyəng ki, mǝn me mura bwi,” Suwetang nyǝngngi, wai ji a mamǝn bǝ guji a bwi. ¹⁷ N’sʊwe mo warigu a bwiyu kǝmte ki na bǝn nwi nǝn wullai? Na chi warigu a bwiyu suni ki na bǝn yunna ji nǝn waullai? ¹⁸ Mǝnni bo Niyajiyu a nǝngnga gani dan-dang a bwiyu a nǝngnga dautǝn dauwe gi. ¹⁹ Mǝnni bo na warigu wa bwiyu gǝng kwan ki, bwi na ba nuwa le? ²⁰ Chu ka suni bwi mwam, mǝnni bwi kwan. ²¹ Me dawe kǝmmi a sʊtǝnna kang go, “Me mǝn fanne.” Mǝnni dʊʊr me ba sotǝn na nani go, “Me mǝn fagǝnne.” ²² Mǝnni bo, sʊna bwiyu a chi da yarmən yariyu karə fini deni, ²³ mənni sʊni bwi nən kəmmarə da me rə grati, ka nǝn ne gratǝ deni, gani me mǝn nung nǝbbi karə gratə deni. ²⁴ Kʊ suni bwi nʊng nəbbi me bə farə tagi grate bərki karə grate. Mənni bo Niyajiyu rǝ bwigo ga murga bwihi ga ne grate gana yarmǝn yariyu. ²⁵ Hangʊ a nǝngnga nyang go na ba karbǝn nya wʊtʊgotang a mura bwi, mənni go na suni bwi a nya jəga bwitə rə yodai kwani. ²⁶ Mǝnni bo, suu bwi kwan wa kʊnnang ki; sʊni bwi warigʊ wa kʊnnang kin, na sʊwa bwiyu kwan wa mura gratə ki, sʊni bwi warigʊ ba nəngnga bwilǝmri kin. ²⁷ Kʊ tǝn bwiyan Kristiyu bǝra rǝ nyang wunan jənu ki n'sʊni bwiyangʊ. ²⁸ A mura a Ekklisiya Niyajiyuwʊn, Niyajiyu a samən nəb təmrəm rə jigʊ, bən suwʊm nəb yuwerəm, bən bwanbiyəm nəb məsarəm, tən bə nəngnga swer rə kumniyəm, rə bə kwara rə nəbbəm, na bə nəngnga tugarangngəm, na bə nəngnga sʊr swerəm, na bərə langtə dan-dangngəm. ²⁹ Warigəm ban jiyəm nəb təmrəm ga? Wargʊ nəbbə yuwe yəməm ga? Mǝnni bo warigu nǝb mǝsarǝm ga? Warigǝm nǝngnga swer rǝ. ³⁰ Mǝnni bo warigu rǝ nǝbbǝtang ka kwaratangǝm ga? Warigǝm surǝ yǝm rǝ langtǝ dan-dang ga? Mǝnni bo warigǝm a damǝn jǝggatang a langtə ga? ³¹ Tǝ fumbʊr a fautang a nǝbbǝntang kǝ grang. Mǝnni bo bǝn nungi juwe ya li nyagʊwi.