¹ Kolam arinye, Yesus pogi bekelileng ke kute wan desa engkai memberitean wan meyeteaan Injil Kerajaan Allah. Kedue bolas rasul ade besame juan Nye'e, ² wan beyepe betine an udah disembuhan Yesus tanggai segale roh johat juan bebagai penyekt. Tanggai sidak ade Maria,an disobot Magdalene, an dibebodan Yesus tanggai tujoh roh johat. ³ Ade Yohana bini Khuza bendahara Herodes, Susana, wan agek banyak betine an memakai kekayeaan sidak seurang engkai mendukong Nye'e. ⁴ Ketike urang banyak bekumpol wan urang tanggai bebagai kute datang ke Yesus, Nye'e beromong ke sidak juan sebutek perumpamaan: ⁵ "Seurang petani pogi menabur boneh. Ketike nye'e mnabor boneh ade sebagian an garak di sisi jalan wan tetinjak, wan dimakan uleh burung di udare. ⁶ Sebagian lagek garak di pucok tompat bebatu, wan ketike boneh nontai mule tumboh, boneh nontai mejadi koreng kerene cade ade ayek ⁷ Sebagian laenye garak di tongah-tongah somak duri wan tumboh besamenye sehingge somak nontai mengocoknye. ⁸ Sisak boneh laennye garak di tanah an subor wan betumboh sehingge menji'i hasel seratus kali lipat banyaknye." Selopas meahiri perumpamaan nontai Yesus beseru, "Nye'e an ade kelindang engkai mendongai, hondak am mendongaian baoyek-boyek'' ⁹ Selopas nontai, mured Yesus betakon ke Nye'e tontang arti perumpamaan nontai. ¹⁰ Nye'e berromong "Ke kayen diberektohu ranasie Kerajaan Allah, keliagak ke urang laen diberketohu dalam perumpamaan supaye, 'Sekalipon menapai, sidak cade meliat, wan sekalipon mndongai sidak cade meheroti.' ¹¹ Inen am arti perumpamaan nontai: "Boneh nontai adelah firman Allah. ¹² Boneh nontai garak di sisi jalan adelah sidak an mendongai firman Allah. Lopas onan datangam sitan wan meutek firman nontai tanggai hati sidak supaye sidak gowok pecaye wan diselemotan. ¹³ Boneh an garak di pucok tanah bebatu adelah urang an mendongai friman Allah wan menerimenye juan sukecite, tetapi cade keakar. Sidak hanye pecaye sebontar, tetapi ketike kesuletan datang sidak ocak bebalek tanggai Allah ¹⁴ Boneh an garak di anater semok beduri adelah urang an mendongai firman Allah, tetapi semntare sidak betumboh, sdiak dikocokuleh rase comas, kekayean serte kesoangan hidop sehingge sidak cade mehasilan buah an mansak. ¹⁵ Sedangkan boneh an garak di tanah subor nontai adelah urang an mendongai firman Allah wan menyempoyannye dalam hati an jujor wan boyek, serte bebuah dalam ketekunan.'' ¹⁶ "Mulan seurang pon an udah menyaleaan pelite, lopas onan menutupinye juan gantang wan meletaaanye di babah tompat idok. Sebalekny pelite nontai di pucok pehe pelite supaye urang an masok ke dalam rumah dapat meliat cahayenye. ¹⁷ Sobab, cade ade hal an tesembunyi an cade bakal dinyateaan, wan cade ade rahasie an cade bakal diungkap wan diumabi ke torang. ¹⁸ Kerene nontai, lioatan am macam ape kayen mendongai kerene sape an ade bakal di enji'i lobeh banyak lagek. Kaliagak, sape an cade ade tanggainye bakal diutek, bahkan ape an nye'e kire anunye." ¹⁹ Lau, umak wan dulor Yeusu datang menemuiNye'e, keliagak sidak cade dapat mehampingiNye'e kerene kerumunan urang. ²⁰ Jadi, diberketohuam ke Nye'e "Umak wan dulor Koam gek di luar, sidak hondak betomu juan Koam." ²¹ Keliagak, Yesus mejawab sidak, "Umak Doan wan dulor Doan adelah sidak am mendongai firman Allah wan melakuanye.'' ²² Waktu ari nontai Yesus noyek kedalam perohu besme muredNye wan Nye'e beromong ke sidak," Ayom kite menyeborang ke seborang danau inen." Make, berangakatam sidak ke seborang. ²³ Namon ketike sidak belayar, Yesus teidok. Lalu, angen ribot di danau nontai wan perohu sidak dimansoki ayek shinge sidak beade dalam bahaye. ²⁴ Lopas onen pedangan mured datang ke Yesus wan membangunan Nye sambel beromong, "Guru! Guru! Kite bakal binase!" Lalu, Yesus pon bangun wan membontak angen ribot wan gelombang an begelora nontai. Angen ribot pon behonti wan danau mejadi tonang. ²⁵ Wan Nye'e beromong ke sidak, "Dimene am imankayen? Sidak mejadi kegolakaan wan hampal sambel beromong ke tambanye an laen, "Sapebah urang inen? Nye'e bahkan menji''i perintah ke angan wan ayak sidak mematuhiNye.'' ²⁶ Lalu sampaiam Yesus wan muredNye di wilayah Gerasa, di seborang Galilea. ²⁷ Waktu nontai Yesus turon ke darat, nye'e ditemui uleh seurang lelaki tanggai kute an dirasuki uleh roh johat. Urang nontai udah lambat cade mengenean pekoyan wan cade bediam di rumah malaian di pesoran. ²⁸ Ketike urang nontai meliat Yesus,nye'e pon mendorok wan sejud di hedopan Nye. Juan suarean kuat nye'e beromong,"Apebah urusan antareKoam wan doan,oi Yesus,Anak Allah An Mahetinggi? Doan memohon ke Koam,gowok sikse doan!'' ²⁹ Hal tejadi kerene Yesus menyiyoh roh johat keluar tanggai urang nontai. Sitan seje yopat meiret urang nontai sehingge nye'e dirantai,diborgol,wan dijage urang, tetapi nye'e dapat memegotan rantainye wan diumbai uleh sitan ke tompat an sunyek. ³⁰ Lopas onan Yesus betakon ke urang nontai, "Sape namekolai?" Jawab urang nontai, "Legion" kerene ade banyak sitan an merasukinye. ³¹ Sitan nontai memohon ke Nye'e agar Nye'e gowok menyiyoh engkai pogi ke jurang maut. ³² Di tompat nontai, ade sekawanan bosar babi an gak meontoti mekonan di buket. Sitan memohon ke Yesus engkai membiyaran sidak mansok ke dalam kawanan babi nontai, wan Yesus meizian sidak. ³³ Make, sitan nontai pon keluar tanggai urang nontai wan mansok ke dalam babi, lalu kawanan babi nontai belari menuruni lereng buket an curam menuju ke danau wan tenggolam. ³⁴ Ketike pedangan pengembala babi meliatnye,sidak melarian diri wan menceritean kejadian nontai di kute wan di kampong sekitarnye. ³⁵ Jadi,urang banyak datang engkai meliat ape an tejadi. Sidak datng ke Yesus wan mendapati urang an udah dibebosan tanggai sitan-sitan nontai gek dudok di hampeng pehe Yesus,dah bepekoyan,wan dah waras pikirannye. Hal inen meulah sidak kegolakan. ³⁶ Sidak an meliat menceritean keurang laen bahwe kurang kerasukan seitan disembuhan. ³⁷ Lalu, semue urang an bediam di derah sekitar Gerasa memungap Yesus engaki meninggalan sidak sobab sidak dicekam uleh kegolakaan an bosar. Kerene Yesus noyek ke perohu wan beulang ke Galilea. ³⁸ Keliagak urang an udah dibebosan tanggai sitan nontai memohon ke Yesus supaye nye'e dapat besame jaun Yesus. Namon,Yesus menyiyohnye pogi,kateNye, ³⁹ "Pulangam ke rumah kolai wan ceriteaan hal bonar an udah Allah pebuat bagikolai.'' Urang nontai pon pogi ke seluroh penjuru kute wan menceritean ape an udah Yesus pebuat bainye'e. ⁴⁰ Ketike Yesus beulang ke Galilea, urang banyak menyambotNye kerene sidak semue udah mehantekNye. ⁴¹ Di so'an ade seurang bename Yairus an datang ke Nye'e, nye'e adelah seurang kepale sinagoge. Sambel sujod menyobah di pehe Yesus, Yairus memohon supaye Nye'e datang ke rumahnye ⁴² kerene nye'e ade seurang an betine tunggal an kire-kire beumor due bolas tohon, wan anak nontai hamper mati. Ketike Yesus ke so'an, urang banyak bedosak-dosakan di sekelilengNye. ⁴³ Di so'an ade surang betine an udah menderite pendarahan borat selambat 12 tohon, wan cade seurang pon an dapat menyembuhannye. ⁴⁴ Betine nontai mehampingi Yesus tanggai belikat wan menculet hujong jubahNye, make seketike pendarahanye behonti. ⁴⁵ Lalu Yesus beromong "Sape an menyentuh Doan?" Kerene semue urang manyangakl, Petrus beromong, "Guru, urang banyak bekumpol disekelileng Koam wan bedosak-dosakan juanKoam!" ⁴⁶ Akan tetapi, Yesus beromong," Seurang menculet Doan keren Doan merase ade kuase an keluar tanggai Doan." ⁴⁷ Ketike betine nontai meliat bahwe nye'e cade dapat menapokan diri nye'e datang ke Yesus juan begogar wan besujud di hedopan Nye. Di dopan semue urang nye'e menceritean meape nye'e menyentuh Yesus, wan macam ape nye'e juan seketike disembuhan. ⁴⁸ Lopas Yesus beromong ke nye'e, "Anak Doan, imankolai udah menyembuhan kolai. Pogiam dalam damai seahtera," ⁴⁹ Ketike Yesus gek beromong, seurang tanggai rumah kepale sinagoge nontai datang wan beromong ke Yairus, "Anak kolai udah mati. Gowok lagek meuyohi Guru." ⁵⁰ Keliagak, mendongai hal nontai Yesus beromong ke Yairus, "Gowok golak. Percaye jak wan anakkolai bakal selamat." ⁵¹ Ketike Yesus tibe di rumah Yairus, nye'e cade memperbolehkan sape pon mansok besameNye kecuali Petrus, Yohanes, Yakobus, wan apang wan umak anak nontai. ⁵² Semue urang menanges wan meratapi anak betine keliagak, Yesus beromong "Gowok menanges, nye'e cade mati tapi idok." ⁵³ Urang banyak nontai pon meneteweannye'e kerene sidak tohu anak betine nontai udah mati. ⁵⁴ Keliagak, Yesus menjujot kukot anak nontai wan menalaunye, "Bungunam, nak!" ⁵⁵ Make, bebalek am roh anak nontai wan seketike nye'e bediri. Lalu Yesus menyiyoh agar anak nontai dienji'i jejolu an dimakan. ⁵⁶ Kedue urang tuhe anak nontai takjub, keligak Yesus melarang sidak engkai memberektohu sape pon tontang ape an udah tejadi.