¹ Selopas Yesus mejadian semue peromongan-Nye di dopan urang banyak, Nye'e mansok ke Kapernaum. ² Di so'an ade seurang Perwira Romawi an ade budak dihergeinye. Budak nontai tonggak saket uyoh sehingge hamper mati. ³ Ketike perwira nontai mendongai tontang Yesus, nye'e meutos bebeyepe tuhe-tuhe Yahudi menemui Yesus wan meungap Nye'e datang engkai menyembuhan peleyonannye nontai." ⁴ Saat urang nontai datang ke Yesus sidak seje memohon ke-Nye,e. Kate sidak, "Urang inen layak mendapat petulungan Koam, ⁵ sobab nye'e mengasihi nangse kite wan nyeam an meulah sinagoge bagi kite." ⁶ Pogiam Yesus besame sidak. Ketike Nye'e udah hampeng rumah perwira nontai, perwiran nontai meutos bebeyepe tambahnye engkai beromong ke Yesus, "Tuan, gowok Koam meuyohan diri engkaidoan sobab doan cade layak menerime Koam di rumah doan. ⁷ Nontaiam sobabnye doan surang merase cade layak engkai datang ke Koam. Kaliagak, ucapanam sepatah kate jak, make peleyonan doan pasti bakal somboh. ⁸ Sobab, doan seurang bawahan an membawahi prajurit. Jike doankatean ke seurang prajurit, "Pogiam! 'nye'e pon pogi. Jike doan katean ke prajurit an laen, 'Datangam!' nye'e pon datang. Wan jike doankatean ke budakdoan, 'Lakuan am ninen! 'budak doan pon bakal melakuanye." ⁹ Ketike Yesus mendongai hal nontai, Nye'e merase hampal akan perwira Romawi nontai. Sambel bepaleng ke urang banyak an memegi'iNye'e, Yesus beromong "Doan beromong ke kayen, bahkan di antare urang Israel pon doan olom peronah menemuan iman sebosar inen." ¹⁰ Saat rombongan an diutus ke Yesus beulang ke rumah perwira nontai, sidak mendapati budaknye udah somboh. ¹¹ Kolam arinye, Yesus pogi ke sebutek kute bename Nain besame pedangan mured-Nye wan romobongan urang banyak an memegini Nye'e. ¹² Ketike Nye'e mehampengi lawang gerbang kute, ade bangkai seurang lelaki an diusung keluar.Urang an mati nontai anak tunggal tanggai umaknye an udah jande. Wan, ade banyak urang tanggai kute nontai an besame betine nontai. ¹³ Ketike Duate meliat betinen nontai, Duate bebolaskaseh ke nye'e wan beromong "Gowok menages." ¹⁴ Keliagak, Nye'e mehampingi wan menconggam tandu jenazah nontai.Urang an memikoltandu nontai pon behonti. Lalu, Yesus beromong "Oi anak mudak, Doan beromong ke kolai, bangketam!" ¹⁵ Keliagak, urang an udah mati nontai dudok wan mule beromong. Yesus pon memulangannye ke umaknye. ¹⁶ Semue urang an meliat hal nontai diponohi rase golak lalu mule memuji Allah wan beromong, "Seurang nabi bosar udah mucol di tongah kite!" wan "Allah udah melawat umat-Nye." ¹⁷ Wan, berite tontang Nye,e menyobar ke seluroh Yudea wan ke semue tompat laen di sekitarnye. ¹⁸ Mured Yohanes memberektohu ke Yohanes tontang semue hal nontai. ¹⁹ Lalu, Yohanes menalau due urang murednye wan meutos sidak ke Duate engkai betakon, "Koam an bakal datang ? Atau, haroskah urang koai menantek an laen?" ²⁰ Ketike sidak datang ke Yesus, sidak pon beromong, "Yohanes Pembaptis menyiyoh urang koai engkai datang ke Koam wan betakon, 'Koam an bakal datang?Atau, haroskah urang koai mehantek an laen?"'' ²¹ Waktu nontai, Yesus tongah menyembuhn banyak urang tanggai bebagai penayket, wabah, wan roh johat. Nye,e mengerunaikan peliyotan ke banyak urang bute. ²² Jawab Yesus ke due urang nontai, "Pogi wan ceritean ke Yohanes tontang ape an udah kayen liat wan dongai: urang bute dapat meliat, urang lumpoh dapat bejalan, urang an saket kusta ditahiran, urang tulek dapat mendongai, urang mati dibengkitan, wan ke urang misken dienji'i kabar boyek. ²³ Kerene nontai, bebahagiam nye'e an cade tesndung uleh Doan.'' ²⁴ Selopas utusan Yohanes pogi, Yesus beromong ke urang banyak tontang Yohanes, "Engkai meliat apebah kayen pogi ke padang belentara? Meliat buluh an diciyop angin? ²⁵ Namon, apen an kayen pogi liat? Urang an bepekoyan bagas? Liatam urang an memakai pekoyan bagas wan hidop dalam kemewahan adenye di istana raje. ²⁶ Jadi, ape an kayen pogi liat? Seurang nabi? Aok, Doan beromong ke kayen bahkan lobeh tanggai seurang nabi. ²⁷ Nye'eam urangnye,an tontangnye ade tutules:'Dongaiam! Doan menyiyoh utusan Doan melohoki Koam. Nye'eam an bakal menyiyopan jalan di hedoapan Koam.' ²⁸ Doan beromong ke kolai di antare semue urang an peronah dilahiran uleh betine, cade ade seurang pon an lobeh bosar tanggai Yohanes. Keliagak, an paleng kocet dalam kerajjan Allah, lobeh bosar tanggai nye'e.'' ²⁹ Ketike urang banyak wan pedangan pengumpol pajak mendongai hal inen, sidak semue meakuai keadilan Allah kerene sidak udah dibaptis juan baptisan Yohanes. ³⁰ Keliagak, urang Farisi wan hali Taurat menulak rencane Allah tehadap diri sidak kerene sidak olom dibaptis uleh Yohanes. ³¹ "Juan apeam Doan meumpemeaan urang an hidop pade generasi inen? Macam apeam sidak nontai? ³² Sidak macam bebiyak an dudok di pasar, an beseru satu same laen, 'Urang koai nenciyop suleng engkaikolai, tetape kayen cade menari. Urangkao menyani lagu pekabungan tetapi kayen cade menages.' ³³ Sobab, ketike Yohanes Pembaptis datang wan cade makan roti atau minom anggur kayen beromong, 'Nye'e kerasukan sitan.' ³⁴ Keliagak, ketike Anak Mendesie datang makan wan minom, kayen beromong, 'Liatam! Nye'e seurang an rakus wan peminom! Nye'e tambah pedangan pengumpol pajak wan urang beduse!' ³⁵ Keliagak, hikmat dibonaran uleh anak-anaknye. ³⁶ Pade suatu ketike, ade seurang tanggai golongan Farisi an meundang Yesus engkai makan besameNye. Yesus pogi ke rumah urang Farisi nontai wan dudok makan. ³⁷ Di kute nontai, ade seurang betine beduse. Ketike nye'e tohu bahwe Yesusu tongah makan di rumah urang Farisi nontati, nye'e pon memboli sebutek botol pualam an bisek minyak harom. ³⁸ Lalu, nye'e bediri di belikat Yesus, hampeng pehe Nye'e, sambel menanges wan mule mebasok pehe Yesus juan ayek matenye wan meusopan rambotnye. Selopas nontai, nye'e mencium pehe Yesus wan meuropinye juan minyak harom. ³⁹ Ketike urang Farisi an meundang Yesus meliat hal inen, nye'e beromong dalam hati,'' Jike urang inen seurang nabi, Nye'e tontu tohu sape wan betine macam ape an mengohapNye,e nontai sobab betine inen seurang penduse." ⁴⁰ Yesus menenggopi wan beromong, "Simon, ade an hondak Doankayean ke kolai. "Jawab Simon, "Romongan am Guru." ⁴¹ Yesus beromong, "Ade due urang an beuntong ke seurang pelopas duwet, an seurang beuntong 500 dinar wan an alenye beuntong 50 dinar. ⁴² Ketike keduenye cade sanggop membayar, si pelepas duwet nontai mehaops hutang sidak bedue. Bak sapeam di antare kedue urang nontai an bakal lobeh mengasihi si pelepas duwet nontai?" ⁴³ Jawab Simon, "Menurotdoan, urang an paleng banyak dibebosan hutangnye, "Yesus beromong kenye'e "Kayen menilainye juan bonar.'' ⁴⁴ Sambel bepaleng ke betine nontai, Yesus beromong ke Simon, "apekah kolai meliat batine ninen? Ketike Doan datang ke rumah kolai, kolai cade menji'i ayek kay membasok pehe Doan, tetapi nye'e membasok pehe Doan juan ayek matenye wan meusopan rambotnye. ⁴⁵ Kayen cade menji'i Doan ciuman, tetapi nye'e cade behonti mencium pehe Doan sejak doan mansok. ⁴⁶ Kayen cade meruropi kepale Doan juan minyak, tetapi nye'e meminyaki pehe Doan juan minyak harom. ⁴⁷ Kerene nontai, Doan katean ke kayen, dusenye an banyak nontai duah diampuni sobab nye'e menunjukan kaesh an bosar. Keliagak, urang an sekiekt diampuni sediket pule mengasehi." ⁴⁸ Lalu Yesus beromong ke betine nontai, "Dusekolai udah diampuni." ⁴⁹ Urang an dudok makan besame Yesus mule betakon dalam hati sidak, "Saoebah Urang inen sehingge Nye'e dapat meampuni duse?" ⁵⁰ Yesus beromong ke sidak betine nontai, "Iman kolai udah menyelemotankolai pogiam juan damai."