¹ Disoon, ade bebeyepe urang an memberektohu Yesus tentang urang-urang Galilea an darahnye dicampuran Pilatus juan kurban persembahan sidak. ² Jawab Yesus ke sidak, "Apekah kayen mengire urang-urang Galilea inen lobeh beduse nggai urang-urang Galilea an layen kerne sidak menderite macam nonan? ³ Doan betutor ke kayen, cade. Akan tetapi, jike kayen cade betobat, kayen semue bai bakal mati. ⁴ Atau tentang kedelapan bolas urang an mati, ketike menara di hampeng kolam Siloam garak wan meninggang sidak, apekah kayen mengire adelah penduse an lobeh burok nggaibsemue urang an bediam di Yerusalem? ⁵ Doan betutor ke kayen, cade. Akan tetapi, jike kayen cade betobat, kayen semue bai bakal mati. ⁶ Yesus bai menceritean perumpamaan inen: "Ade seurang an ade sebatang kayu ara an ditanam di kobon anggurnye. Akan tetapu, wayahnye menjuhak ngkai meontang buah kayu nontai, nyee cade mendapat pe. ⁷ Jadi, nyee betutor ke tukang kobonnye, 'Dah tige bulan doan keseen meontang buah kayu ara inen, tetapi doan olom kale mendapat sebigek bai. Tobang am kayu nonan! Meape haros menyie-nyean tanah ngkai kayu onan?' ⁸ Akan tetapi, tukang kobon nontai menjawab, 'Tuan, enjii kayu inen kesempotan lagek tohon oyen ngkai bebuah. Mbak am doan mengali tanah di sekitarnye wan meenjiinye pupok, ⁹ mungken kayu onan bakal mehasilan buah tohon dopan. Jike cade bebuah bai, Tuan dapat am menobangnye.'" ¹⁰ Sekali tai, Yesus meajar di sebutek sinagoge pade ari sabat. ¹¹ Disoon ade seurang betine an kerasukan roh sehingge meulahnye saket selambat delapan bolas tohon. Belikat betine nontai bungkok sehingge cade dapat bediri togak. ¹² Ketike Yesus meliatnye, Nyee menalau betine nontai wan betutor, "Oi betine, kayen dah dibebosan nggai penyaket." ¹³ Kemudian, Yesus menumpangan kukot-Nye ke betine nontai wan waktu nontai bai, betine nontai bediri togak wan memuji Allah. ¹⁴ Akan tetapi, pemimpin sinagoge nontai menjadi goram kerne Yesus menyombohan pade ari sabat. Nyee betutor ke urang banyak, "Ade onam ari ngkai bekereje. Kerne onan, datang am ngkai disombohan pade ari-ari nontau, ukan pade ari sabat." ¹⁵ Namun, Tuhan menjawab urang nontai, "Kayen urang munafik! Ukannye kayen semue melepasan sapi atau keledai milek kayen an terikat di kandang wan menuntunnye keluar ngkai minom pade ari sabat? ¹⁶ Kerne onan, cade ai betine inen, seurang keturunan Abraham an dah dikobat selambat lapan bolas tohon leh setan, bai haros dileposan nggai belonggunye onan pade ari sabat?" ¹⁷ Ketike Yesus betutor macam oyen, semue lawannye dipermaluan, wan urang banyak besuke cite atas segale perbuotan ajaib an dah dikerejean-Nye. ¹⁸ Kemudian, Yesus betutor, "Macam apekah kerejean Allah nontai? Juan apekah Doan dapat meumpameannye? ¹⁹ Kerejean Allah nontai macam bigek sensambi an diutek urang wan ditanam dilakaunye; bigek nontai tumboh menjadi kayu, wan burong-burong di udare besayang di dohan-dohannye." ²⁰ Juan lagek Nye-e betutor, "Juan apekah doan meumpamean bakal kerejean Allah? ²¹ Kerejean Allah onan macam ragi an diutek seurang betine wan dicampurannye dalam tige sukat topong sampai seluroh adonan onan mengombang." ²² Yesus menyusuri kute-kute wan dise, nyee meajar wan toros bejalan menuju Yesrusalem. ²³ Lalu seseurang betanyak ke-Nyee, Tuhan, apekah hanye sediket urang an diselamotan?" Yesus betutor ke semue urang, ²⁴ "Bejuang am ngkai dapat mansok lawang sompet; sobab Doan betutor ke kayen, banyak urang bakal beusahe mansok ke soon, tetapi sidak cade bakal dapat. ²⁵ Jike tuan rumah bediri wan menukop lawang rumahnye, sedangan kayen bediri di luar wan menggodor lawang sambel betutor, 'Tuan, tulong bukak an urang koai lawang.' Nyee bakal menjawab, 'Doan cade tohu nggai mene asal kayen.' ²⁶ Lalu kayen bakal menjawab, 'Urang koai dah makan wan minom sesame wan Koam. Koam dah meajar di jalan-jalan kute urang koai.' ²⁷ Namun, Nyee bakal menjawab, 'Doan cade mengonal kayen wan cade tohu nggai mene asal kayen. Pogi am nggai hadopan doan, kayen semue pelaku kejehotan.' ²⁸ Kayen bakal menangis wan mengeretakan gigi ketike meliat Abraham, Ishak wan Yakub, beserte semue nabi bediam di dalam kerejean Allah sementare kayen ditikoman ke luar. ²⁹ Kemudian, urang-urang bakal datang nggai timur wan barat, wan nggai utare wan selatan. Sidak bakal dudok wan makan dalam kerejean Allah. ³⁰ Sesunggohnye, urang-urang te akhir bakal menjadi an pertame wan urang-urang an pertame bakal menjadi an teakher." ³¹ Wayah nontai, bebeyepe urang Farisi menjuhak ke Yesus wan betutor, "Pogi am, tinggolan tompat inen kerne Herodes hondak membunuh kayen." ³² Yesus menjawab sidak, "Pogi am wan pedahan ke rubah onan, 'Hari inen wan kolam, Doan bakal meuser roh-roh johat wan menyembohan urang, wan pade ari ketige, Doan bakal menyelesoian kereje-Doan.' ³³ Akan tetapi, Doan haros melanjutan pejalonan ari inen, kolam, wan luse kerne cade mungken seurang nabi pogat nyawe di luar Yerusalem. ³⁵ Yerusalem, Yerusalem! Kayen membunoh pedangan nabi wan merajam urang an diutos kekayen! Beulang kali Doan tegonang mengumpulan anak-anak kayen, same macam indok manok mengumpulan anak-anaknye di babah sayapnye. Akan tetapi, kayen cade hondak. ³⁴ Sekarang rumah kayen bakal dipuangan wan menjadi kangot. Doan betutor ke kayen, kayen cade bakal meliat Doan lagek sampai tibe wayahnye kayen bakal mengatean, 'Diberekotilah Nyee an menjuhak dalam name Tuhan!"'