¹ Sementare onan, ketike ade ribuan urang bekumpol wan sidak saleng meneninjak, Yesus mulai betutor ke pedangan mured lobeh lohok, "behati-hatiam tehadap ragi urang-urang Farisi, yaitu kemunafikan ² Sobab, semue an tetutup bakal dibuka an wan semue an betapok bakal dinyatean. ³ Kerne onan, ape an kayen katean di dalam golap akan tedongai di dalam torang wan an kayen bisikan di dalam kamar bakal diberitean di pucok hatap- hatap rumah. ⁴ Doan betutor ke kayen, oi kawan-kawan-Doan, gowok golak wan sidak an dapat membunoh bukang, tetapi sekali jadi onan cade dapat bebuat lobeh jowoh lagek. ⁵ Namun, Doan bakal meingatan kayen tontang sape an haros kayen golaki; golak am wan Nye-e, an dah membunoh, juan bekuase menikoman kayen dalam nerake. ba'ai Nye-e am an haros kayen golaki. ⁶ Bukannye lime ikok burong pipet dijual ngkah seharge due kopeng jak? Namun, cade seikok bai nggai burong onan an dilupean dihadopan Allah. ⁷ Bahkan, jumlah rambot di kepale kayen bai cade tehitung. Gowok golak, kayen jowoh lobeh beharge nggai pedangan burong pipet." ⁸ "Doan betutor ke kayen, setiap urang an meakui Doan di hadopan uranf layen, bai bakal diakui leh anak mendesie di hadopan malaikat-malaikat Allah. ⁹ Akan tetapi, setiap urang an menyangkal Doan di dopan orang layen bai bakal disangkal di hadopab malaikat-malaikat Allah. ¹⁰ Juan, sape bai an mengatean sesuatu tontang an melawan Anak Mendesie dapat diampuni, tetapi sape bai an mehujat Roh Kudus cade bakal diampuni. ¹¹ Ketike sidak meumbai kayen ke sinagoge wan ke hadopan pedangan pemimpin wan penguase, gowok kuater tontang macam ape kayen membele urang kayen atau ape an haros kayen pedahan, ¹² sobab wayah nontai bai Roh Kudus bakal meajari kayen tontang ape an haros kayen pedahan." ¹³ Seurang nggai antare urang banyak nontai betutor ke Yesus, "Guru, siyuh am dulor doan membagi warisan juan doan." ¹⁴ Akan tetapi, Yesus betutor ke nyee, "Dulor, sape an meangkat Doan menjadi hakem atau peentare atas kayen?" ¹⁵ Sekali tai, Yesus betutor ke sidak, "bejage-jage wan waspada am atas segale bontok keserakahan kerne hidop seseurang cade begantong wan banyaknye harte an nye miliki." ¹⁶ Lalu, Yesus menceritean sebutek perumpamean ke sidak, "Ade tanah milik seurang an seje kaye an mehasilan banyak asel menggontam. ¹⁷ Jadi, urang onan bepikir dalam hatinye, 'Ape an haros doan kerejean kerne doan mulan tompat lagek ngkai meneyohan asel doan menggontam?' ¹⁸ Juan, nyee betutor, 'inen an bakal doan kerejean. Doan bakal membungkar penggagak-penggagak wan meulah an lobeh bosar. Di soan, doan bakal meneyohan semue gondom wan barang-barang doan. ¹⁹ Lalu, doan betutor ke jiwe doan, 'Oi jiwe doan, di'i ade banyak barang an disimpan ngkai betohon-tohon; istirahat am, makan, minum wan besonang-sonang am!' ²⁰ Namun, Allah betutor ke urang onan, 'Oi, urang bodoh! Malam inen bai, jiwe kayen bakal di utek nggai kayen. Lalu, sape bah an bakal memiliki barang-barang an kayen simpan onan?' ²¹ Demikian am an bakal tejadi ke urang an meneyohan harte bagi di'i seurang, tetapi cadelah kaye di dopan Allah." ²² Yesus betutor ke mured-mured-Nye, "sobab onan Doan betutor ke kayen, gowok kuater tontang hidop kayen, tontang ape hondak kayen makan. Atau, kuater tontang bukang kayen,tontang ape an bakal kayen pakai. ²³ Sobab, hidop lobeh ponteng nggai pemakan wan bukang lobeh ponteng nggai pakoian. ²⁴ Liat am burong-burong gagak. Sidak cade menabor atau menuai, sidak bai mulan gudang atau penggagak, tetapi Allah meenjii sidak makan. Kayen jowoh lobeh beharge nggai burong-burong onan. ²⁵ Sape bah diantare kayen kerne kuater dapat menambah sehasta jak pade umur hidopnye? ²⁶ Jike kayen cade dapat mengerejean hal-hal an kocet inen, meape kayen kuater juan hal-hal an layen. ²⁷ Perhatian nam bunge bakong, macam ape sidak tumboh. Bunge-bunge onan cade bekereje koras atau memintal, tetapi Doan betutor ke kayen, bahkan Salomo dalam kemulieannnye bai cade bepakoian sebagas salah sebutek nggai bunge-bunge onan. ²⁸ Jike Allah mehias guron di lakau, an ari inen tumboh wan kolam dibuang ke dalam apu, cade ai Nye-e bakal mehiasi lobeh nggai guron nontai? Oi, kayen an kurang percaye! ²⁹ Jadi, gowok am kayen meontang ape an bakal kayen makan atau ape an bakal kayen minom, wan gowok am mencomasannye. ³⁰ Sobab, bangse- bangse di dunie meontang onan semue, tetapi Apang kayen togu bahwe kayen memerluannye. ³¹ Sebaleknye, ontang am lohok kerejean Allah, make semuenye inen bai ditambahan ke kayen." Kumpulan harte di seruge ³² "Gowok golak, oi kawanan kocet, kerne Apang kayen bekonan meenjii kayen kerejean onan. ³³ Juallam segale an kayen ade wan besedokah am. Ulah am bagi kayen kantong duet ac cade dapat rusak, yak nen harte di seruge an cade dapat hilang, an cade dapat diutek pengolet ataupun dirusak leh ngongat. ³⁴ Sobab, di tompat harte kayen bediam, di senonam bai hati kayen bediam." ³⁵ "Hondaklah punggung kayen totap bekobat wan pelite-pelite totap benyale. ³⁶ Jadi am macam urang-urang an mehantek tuannye pulang nggai pesta perkawinan ngkai sidak dapat membukak an lawang untuknye, ketike tuan onan pulang wan menggodor lawang. ³⁷ Diberekoti am hambe-hambe an didapoti tuannye besesiap, ketike nye menjuhak. Doan mengatean kekayen, sesunggohnye, nye bakal mengobat punggongnye ngkai melayoni wan mempersilean pelayan-pelayannye ngkai dudok makan. Nyee bakal menjuhak wan melayoni sidak. ³⁸ Jike tuan nontai menjuhak pas tongah malam atau dini ari wan mendapotan sidak tengah belaku macam onan, diberekoti am sidak! ³⁹ Namun ketohuiam, jike seurang pemilek rumah mengetohui jam beyepe pengolet bakal menjuhak ke rumahnye, nye pasti cade bakal membiaran rumahnye dibungkar. ⁴⁰ Oleh kerne onan, kayen haros selalu besiap sedie kerne Anak Mendesie bakal menjuhak pade wayah an cade kayen sangke-sangke. ⁴¹ Kemudian, Petrus betanyak ke-Nyee, "Tuhan, apekah Koam menceritean perumpamaan inen hanye ke urang koai atau ke semue urang?" ⁴² Jawab Tuhan,"Sape bah kepale pelayan an setie wan bijaksane an dipercayei tuannye ngkai meawasi pedangan hamba an layen, ngkai meenjii sidak pemakan pade waktu an topat? ⁴³ Diberekotilah hamba onan, an ketike tuannye menjuhak, mendapati nyee tengah mengerejean kerejenye. ⁴⁴ Doan betutor kekayen, sesunggohnye, tuan onan bakal memilehnye ngkai meawasi semue mileknye. ⁴⁵ Akan tetapi, jike hambanye onan betutor dalam hatinye, 'Tuandan cade bakal menjuhak,' dan mulai memungkal hamba lelaki wan hamba betine layennye, kemudian makan wan minom sampai mabok, ⁴⁶ ketike tuannye menjuhak pade waktu an cade disangke-sangke wan cade di ketohui leh hamba onan, sang tuan bakal membunoh hamba onan wan meneyohannye sesame juan urang-urang an cade setie. ⁴⁷ Seurang hamba an tohu keinginan tuannye, tetapi cade siap sedie atau mengerejean sesuai kehendak tuannye bakal dapat banyak pukulan. ⁴⁸ Namun, hamba an cade tohu ape an diinginan tuannye wan mengerejean hal-hal an pantas mendapotan pukulan, nyee bakal mendapotan pukulan an lobeh sediket. Setiap urang an dienjii banyak, dituntot banyak. Juan, sidak an dpercayei lobeh banyak bakal dituntot lobeh banyak lagek. ⁴⁹ Doan menjuhak ngkai menikoman apu ke dunie,vwan Doan beharap api onan benyale! ⁵⁰ Akan tetapi, ade baptisan an haros doan jaloni, wan Doan meyese seje tetokan sampai hal onan digenopi. ⁵¹ Apekah kayen menyangke bahwe Doan menjuhak ngkai meumbai perdamaian di pucuk bumi? Cade, Doan betutor ke kayen, melaenan perpecahan! ⁵² Mulai oyen, lime urang dalam satu keluarge bakal dipisahan. Tige urang bakal melawan due urang wan due urang bakal melawan tige urang. ⁵³ Sidak bakal dipisahan; Apang bakal melawan anak lelakinye, wan anak lelakinye abakl melawan apangnye. Indai bakal melawan anak betinenye, wan anak betinenye bakal melawan indainye. Mentuhe bakal melawan benantu betinenye, wan benantu betinenye bakal melawan mentuhenye." ⁵⁴ Lalu, Yesus betutor ke urang banyak, "Ketike kayen meliat awan bekumpol di sebolah barat, kayen betutor, 'Hujan bakal turon,' wan hujan bonar-bonar turon. ⁵⁵ Ketike kayen meyese ribot betiup nggai selatan, kayen betutor, 'Ari inen bakal podek torek,' wan hal onan bonar-bonar tejadi. ⁵⁶ Kayen urang munafik! Kayen dapat menafsiran rupe langet wan bumi, tetapi meape kayen cade dapat menafsiran zaman oyen?" ⁵⁷ "Meape kayen seurang cade dapat memutusan ape an bonar? ⁵⁸ Ketike kayen pogi sesame wan munsoh ngkai mehadap pemerintah, usahean ngkai menjadian masalah kayen dalam pejalonan ngkai nyee cade meiret kayen ke hakem bakal menyerahan kayen ke pengawal, wan pengawal onan bakal menikoman kayen ke dalam penjare. ⁵⁹ Doan betutor ke kayen, kayen cade bakal keluar nggai soon seolom kayen membayar hutang kayen sampai peser an teakher."