¹ Wayah nontai ari sabat, Yesus menjuhak ke rumah salag seurang pemimpin urang-urang Farisi ngkai makan roti sesame wan nyee wan semue urang meawasi Yesus. ² Wayah nontai, ade seurang an menderite busung aek dihadopan-Nye. ³ Yesus betutor ke urang-urang Farisi wan ahli-ahli Taurat, "Apekah dapat meubati urang pade ari sabat?" ⁴ Akan tetapi, sidak cade menjawab-Nye. Kemudian, menconggam urang saket onan meubatinye lalu menyiyoh urang nontai pogi. ⁵ Yesus betutor ke sidak, "Sape bah nggai antare kayen an jike anaknye atau sapi lelakinye garak ke dalam sumor pade ari sabat, cade seocaknye menareknye ke luar?" ⁶ Make, sidak bai cade dapat membantah peekatean-Nye. ⁷ Kemudian, Yesus menceritean sebuah perumpamean ke tamu-tamu undangan ketike Nyee meliat macam ape sidak memileh tompat-tompat dudok an tehormat di sekitar meje, uji-Nye ke sidak, ⁸ "Jike kayen diundang leh seseurang ke sebuah pesta perkawinan, gowok kayen dudok di tompat tehormat kerne tuan rumah onan mungken dah meundang urang an lobeh terkemuka nggai kayen. ⁹ Lalu, tuan rumah nontai bakal mendatangi kayen wan betutor, 'Onjok gak tompat di'i ke urang inen!' Juan, kayen bai haros pindah ke tompat an paleng rondah juan meyese malu. ¹⁰ Namun, apebile kayen diundang, dudok am di tompat paleng belikat ngkai ketike an meundang kolai datang, nyee bakal betutor ke kayen, "Sahabat pindah am ke tompat an lobeh tehormat.' Juan macam onan, kayen bakal mendapat penghormatan di hadopan urang-urang an dudok makan besesame wan kayen. ¹¹ Sobab, semue urang an meninggian di'inye bakal direndahan, tetapi nyee merendahan di'inye bakal ditinggian." ¹² Lalu, Yesus betutor ke urang an meundang-Nye onan, "Bile kayen meadean jamuan makan siang atau makan malam, gowok meundang tambah-tambah, dulor-dulor, kaum keluarge, atau tetangge an kaye kerne sidak bakal membalas kayen wan meundang kayen ngkai makan sesame wan sidak. ¹³ Akan tetapi, jike kayen meadean pesta, undang am urang-urang miskin, urang-urang cacat, urang-urang lumpoh, wan urang-urang bute. ¹⁴ Juan, kayen bakal berekoti kerne urang-urang inen cade dapat membalas kayen gek: kayen bakal mendapat balosannye pade wayah kebangkitan urang-urang bonar." ¹⁵ Ketike salah seurang an makan sesame wan Nye-e mendongai tutor inen, urang nontai betutor ke-Nye-e, "Diberekoti am urang an bakal makan roti di dalam kerejean Allah." ¹⁶ Akan tetapi, tutor Yesus ke urang nontai, "Ade seseurang an meadean jamuan makan malam an bosar wan nyee meundang urang banyak, ¹⁷ dan ketike wayah makan malam dah datang, urang onan menyiyoh hambenye ngkai betutor ke pedangan tamu an dah di undang nontau, 'Datang am, kerne semuenye dah siap.' ¹⁸ Namun, semue tamu undangan onan mulai meulah alosan-alosan. Urang pertame betutor, 'Doan hayu memboli sebutek lakau wan doan haros pogi meliatnye. Terimelah permimtaan maaf doan.' ¹⁹ An layen betutor, 'Doan hayu memboli lime pasang sapi wan doan haros memerikse sapi-sapi onan. Terimelah permintaan maaf doan.' ²⁰ Sementare an layen lagek betutor, 'Doan hayu bejadiam. Kerne onan, onan doan cade dapat datang.' ²¹ Lalu, pelayan onan bai beulang wan memedahan semuenye ke tuannye. Make, majikannye onan menjadi godi, lalu betutor ke pelayannnye, 'Ocak am! pogi ke jalan-jalan wan setiap gang di kute inen. Umbaiam ke doan urang-urang miskin, urang-urang lumpoh, urang-urang bejingkot, wan urang-urang bute.' ²² Kemudian pelayan nontai betutor ke-nyee, 'Tuan, doan dah mengerejean ape koam perintahan, tetapi gek ade tompat puang.' ²³ Tuan onan betutor ke pelayannye, 'Pogi am ke jalan-jalan raye wan setiap gang. Umbaiam urang-urang di soon ngkai datang ke seen ngkai rumah doab menjadi ponoh. ²⁴ Doan betutor ke kayen, cade seurang bai nggai kayen an doan undang seolomnye nontai bakal menikmoti makanan sajian doan.'" ²⁵ Banyak urang bejalan sesame juan Yesus. Kemudian Yesus membelikat ke sidak wan betutor, ²⁶ "Jike seseurang menjuhak ke Doan tetapi cade boncek wan apang wan indainye, bini wan anaknye, dulor lelaki wan dulor betinenye, bahkan hidopnye seurang, nyee cade dapat menjadi mured-Doan. ²⁷ Sape bai an cade menyohan salebnye wan memogii Doan, nyee cade dapat menjadi mured-Doan. ²⁸ Sapekah diantare kayen an hondak meulah sebutek menare, tetapi cade dudok telobeh lohok wan mehitong biaye ngkai mengetohui apekah nyee ade cukop duit ngkai menjadiannnye? ²⁹ Jike beonan, ketike nyee meneyohan fondasi wan cade sanggop menjadiannye, semue urang an meliatnye bakal mentetaweannye. Urang-urang onan bakal betutor, ³⁰ 'Urang-urang inen mulai membangon, tetapi nyee cade sanggop menjadiannye.' ³¹ Atau, raje mene bah an bakal pogi beporang melawan raje layen tetapi cade dudok telobeh lohok wan mempertimbangan apekah nyee sesame 10.000 tentaranye dapat melawan munsohnye an ade 20.000 tentara? ³² Jike nyee dapat mengalahan raje layen onan, nyee bakal mengirim seurang utusan wan syarat-syarat perdamoian ketike pasukan lawannye onan gek jowoh. ³³ Beonan bai juan kayen manseng-manseng, mulan seurang bai diantare kayen an dapat menjadi mured-Doan jike nyee cade menyerahan semue mileknye." ³⁴ "Garam boyek, tetapi jike garam onan dah kehilangan yese mancennye, macam ape meulahnye mancen lagek? ³⁵ Garam onan bahkan cade lagek digunean ngkai lakau atau pupok sehingge urang ngkah bakal membuangnye. Sape an ade kelindang ngkai mendongai, mbak am nyee mendongao!"