¹ Jike kolai dah dibangkitan sesame Kristus, ontang am hal-hal an dipucok, tompat Kristus bediam, dudok disebolah kanan Allah. ² Pikiran hal-hal an dipucok, ukan hal-hal an di bumi. ³ Sobab, kolai dah mati wan hidop kolai ditapokan sesame Kristus dalam Allah. ⁴ Ketike Kristus, an adelah hidop kolai, menyatean di'i-Nye kolai bai bakal dinyatean dalam kemuliean sesame juan Nye-e. ⁵ Kerne onan, matian sifat ape bai an beasal nggai sifat duniawi kolai, yaknen percabulan, hawe napsu, kehondak an johat, wan keserakahan, an adelah penyembahan ke berhala. ⁶ Hal-hal ninamlah an menyebapan murke Allah tengah datang. ⁷ Lohok, kolai bai mengerejeannye ketike kolai gek hidop didalamnye. ⁸ Namun, inen, buang am semue onan: kegodian, kemurkean, kebencikan, fitnah, wan betutor kotor nggai bibir kolai. ⁹ Gowok ngkah saleng mengeramputi kerne kolai dah menanggalan mendesie lambat kolai besesame juan perbuotan-perbuotannye. ¹⁰ kene an nam mendesie baharu, an toros menoros dibagosi dalam pengtehuan sesuai juan gambar nggai penciptenye. ¹¹ Dalam hal oyen, mulan lagek urang Yunani atau urang Yahudi, urang an besunat atau urang an cade besunat, urang Barbar atau urang Skit, kuli atau urang mardeka, tetapi Kristus adelah semue dalam segale sesuatu. ¹² Jadi, sebagai urang-urang pilihan Allah, an kudos wan an dikasihi, kene an nam ke kolai bolas kaseh, keramahan, kerendahan hati, kelembutan, wan kesaboran. ¹³ Sabar am seurang tehadap an layen, wan saleng meampuni am jike ternyate ade seurang an besalah tehadap an layen. Same macam Tuhan dah meampuni kolai, make kayen bai haros saleng meampuni. ¹⁴ Di pucok semue onan, kene an nam kaseh, an menjadi pengobat an sempurne. ¹⁵ Mbak am damai sejahtera Kristus mengendalian hati kolai kerne memang ngkai nonam kolai dipanggil menjadi sebutek bukang, wan besukor am. ¹⁶ Mbak am tutor Kristus bediam di dalam kolai juan melimpah, juan segale hikmat kolai meajar wan menesehoti seurang tehadap an layen, nyanyian nam mazmur, lagu-lagu pujian, wan nyanyian-nyanyian rohani, semuenye juan ponoh ucopan sukor di dalam hati kolai ke Allah. ¹⁷ Ape bai an kolai kerejean, dalam perkatean wan perbuotan, kerejean semue onan dalam dame Tuhan Yesus, sambel meucap sukor ke Allah Apang, melalui Nye-e. ¹⁸ Bini-bini tundok am ke laki kayen macam seharosnye dalam Tuhan. ¹⁹ Laki-laki, kasihilah bini kolai wan gowok bekelekuan kasar tehadap sidak. ²⁰ Bebiyak, tootilah urang tuhe kayen dalam segale hal kerne hal inen menyenangan Tuhan. ²¹ Apang-apang, gowok menyiyoh anak-anak kayen godi ngkai sidak cade pogat semangat. ²² Pedangan kuli tootilah tuan kayen an ade di dunie inen dalam segale hal. Kerejean onan ukan jak pas sidak meliat kolai wan ngkai menyenangan sidak melainan juan tulus hati kerne golak akan Tuhan. ²³ Ape bai an kayen kerejean, kerejean juan segonap hati macam untuk Tuhan wan ukan untuk mendesie, ²⁴ sobab kolai tohu bahwe nggai Tuhan kolai menerime warisan sebagai upah kolai. Kristus Tuhan nam an tengah kolai kayoni. ²⁵ Sobab, urang bebuat salah bakal menerime balosan atas kesalahan an dikerejeannye wan mulan an dikecualian.