¹ Sobab, doan hondak kolai tohu seje boratnye perjuangan an dah doan kerejean ngkai kolai, wan ngkai sidak an di Laodikia, wan ngkai semue urang an olom peronah betomu muke juan doan. ² Tujuan doan adelah supaye hati sidak tehibor wan dipersatuan dalam kaseh sehingge sidak memiliki segale kekayean an beasal nggai jaminan akan pengertian wan pengetehuan nggai rahasie Allah, yaknen Kristus seurang. ³ Dalam Nyee, tesembunyi segale harte nggai hikmat wan pengetehuan. ⁴ Doan mengetean hal inen ngkai mulan urang an bakal menipu kolai juan perdebotan an kedengaiannye mansok akal. ⁵ Sobab, sekali bai bukang jasmani doan cade besesame kolai, tetapi doan besesame dalam roh, wan doan besukecite meliat kedisiplinan kolai an boyek wan keteguhan iman kolai dalam Kristus. ⁶ Jadi, kerne kolai dah menerime Yesus Kristus sebagai Tuhan, hidop am toros dalam Nyee, ⁷ beakar wan bangonlah di'i dalam Nyee, teguhan iman kolai, sebagaimene dah diajoran ke kolai, wan melimpah lah juan ucopan sukor. ⁸ Behati-hati bah ngkai gowok ade seurang bai an menjorat kolai juan filsafat an puang wan menyesotan, an beasal nggai tradisi mendesie wan asas-asas roh dunie, wan ukan prinsep-prinsep Kristus. ⁹ Sobab, dalam Nye-e bediam seluroh kepenuhan keilahian an hidop dalam bontok jasmani. ¹⁰ Kolai dah menjadi ponoh dalam Nye-e, an adelah kepale atas semue pemerintah wan penguase. ¹¹ Dalam Nye-e, kolai bai disunat, ukan juan sunat an dikerejean leh kukot mendesie, tetapi juan sunat an dikerejean leh Kristus, yaknen juan menungkong bukang kedagingan an beduse. ¹² Dalam baptisan, kolai dipasar sesame juan Kristus, wan dibangkitan sesame juan Nye-e melalui iman kolai dalam kuase Allah an membangkitan Nye-e nggai antare urang mati. ¹³ Sekali bai lohok kolai mati dalam penggoran-pelanggoran kolai wan dalam kedagingan kolai an cade besunat, Allah meulah kolai hidop sesame juan Nye-e sekali Nye-e meampuni semue pelanggoran kite. ¹⁴ Nye-e dah membalangan surat hutang wan aturan-aturan tuntutannye an mehalangi hubungan antare Allah wan kite. Nye-e dah meutek juan memakuannye di pucok kayu saleb. ¹⁵ Nye-e melucot pedangan pemerintah wan penguase, lalu menjadian sidak tontonan an memaluan leh kerene kemonangan-Nye di pucok kayu saleb. ¹⁶ Kerne onan, gowok bioran seurang bai mehakimi kolai juan masalah wan minuman atau ari raye keagamean, perayaan bulan baru atau ari sabat. ¹⁷ Semuenye onan ngkah bayangan tentang hal-hal bakal datang, tetapi wujud an sesunggohnye adelah Kristus. ¹⁸ Gowok dibioran urang sonang juan kerondahan hati an palsu wan penyembahan ke malaikat-malaikat mehakimi kolai. Sidak adelah urang-urang an suke juan peliotan hal-hal detail sehingge meulah pikiran sidak sombong kerne gagosan-gagosan duniewi. ¹⁹ Urang an macam inen cade bepogang togoh pade kapele. Kepale adelah an menopang seluroh bukang, wan seluroh bukang dipersatuan leh sendi-sendi wan otot-otot, semuenye betumboh juan pertumbuhan an beasal nggain Allah. ²⁰ Jike besesame Kristus kolai dah mati tehadap asas-asas dunie, meape seolah-olah kolai agek menjadi milek dunie, tundok wan aturan-aturan macam: ²¹ "Gowok menggohap, gowok meyesei, gowok menconggam"? ²² Aturan-aturan inen bakal binase sekali dah dipegi'i kerene aturan inen diulah bedasoran pade perintah wan ajoran mendesie. ²³ Aturan-aturan macam onan memang keliotannye bijaksana juan menonjolan ibadah an bepusat pade di'i wan kerendahan hati an palsu serte penyiksean bukang. Namun semuenye onan mulan nilainye selain ngkai memuasan kedagingn.