¹ Dah ituk, Bale menak an, aku madah ik ka ikau Injil, ye aku ceritekan ka ikau, ye udah ikau terimak, ye dak dalapm e ikau bediri toguh. ² Oleh Injil inyak pan ikau dak salamatkan, asal ikau bepijakng toguh pada firman ye udah kuceritekan ka ikau, kecuali ikau pecayak jongan sie- sie. ³ Aku dah menyampaikan ka ikau, pertame- tame ye pontikng, ye dah aku terimak bahwa Kristus mati makai dose- dose kite sesuai jongan kitap suci, ⁴ Iye dah dak kuburkan, Iye dak bangkitkan pas ari ketige sesuai kitap suci, ⁵ tapi bahwa Iye udah menampakan diri e ka kefas, okak nyak ye kadue bolas inyak. ⁶ Okak inyak, Iye menampakan diri e lebih dari limak ratus bale menak an sekaligus. sebagian bosar dari bale insie agik idup sampai ituk, tapi beberopai udah mati. ⁷ Lalu, iye menampakan diri e ka Yakobus, okak nyak ka semue murid e. ⁸ Terakhir, same macapm ka anak ye lahir sebolupm waktu e, Iye pan menampak diri e ka aku. ⁹ Sak akulah ye palikng kocit dak antare bale murid e ngan cak layak dak sobut murid karne aku menganiayai jemaat Allah. ¹⁰ Tapi, karne anugerah Allah, aku adelah aku ye sekarang. ngan, anugerah-Iye ka aku cak sie- sie. aku bekeroje lobih giat daripada bale insie semue, tapi bukatn e aku, melaitnkan anugerah Allah ye menyertaik ku. ¹¹ Oleh karne inyak, baik olehku ataupan bale insie, okak nyaklah kami mengajar ngan okak nyaklah ikau udah pecayak. Kebangkit in dari Kamatian ¹² Man Kristus dak ceritekan dari kematian, imai beberopai dak antara ikau bekate bahwa cak ade kebangkit in dari kemati in? ¹³ Kalau cak ade kebangkit in dari kemati in, kristus pan cak kolak dak bangkitkan. ¹⁴ Man Kristus cak dak bangkitkan, sie- sielah pemadahan kami ngan sie- sielah ngan iman kau. ¹⁵ Lobih agik, kami pan dak dapat ik sebagai saksi dusta Allah karne kami munyuk ka saksian bahwa Allah udah membangkit ik Kristus, ye cak akan dak bangkitkan-Iye, kalau memang bonar iyakng mati cak dak bangkit ik. ¹⁶ Sak, man iyakng mati cak dak bangkit ik, Kristus pan cak dak bangkit ik. ¹⁷ Man, Kristus cak dak bangkit ik, sie- sielah iman kau, ngan ikau agik dak dalapm dose- dose kau. ¹⁸ Okak nyak, bale insie ye udah mati dalapm Kristus pan udah binase. ¹⁹ Man arapan kite dak dalapm Kristus hanya makai idup inyak jak, kite adelah bale iyakng ye palikng malang dari semue insie. ²⁰ Tapi dah ituk, Kristus dak bangkit ik dari antare iyakng mati, sebagai ye buah pertame dari semue iyakng pecayak ye dah mati. ²¹ Sak, same macapm kematian terjadi melalu ik sutik iyakng, maka melalu ik sutik iyakng inyak pan kebangkit in dari antare iyakng mati terjadi. ²² Karne dalapm Adam semue e mati, okak nyak pan dalapm Kristus semue e akan dak idupkan. ²³ Tapi, tiap- tiap iyakng menurut urut e: Kristus sebagai buah pertame, okak inyak bale insie adelah umpuk Kristus, pas kedatakngan-Ne agik. ²⁴ Okak nyak tibe ka udahan ne, inyak pas Iye menyorahkan kerajaan ka Allah Bapa, pas Iye udah dak binasekan semue pemerintahan, semue kekuasaan, ngan kekuatan. ²⁵ Sak, Iye arus nyuruh sampai Allah melotakan semue musuh e dak bobah kaki e. ²⁶ Musuh terakhir ye akan dak binasekan adelah kemati in. ²⁷ Sak, Allah udah mobahkan segale sesuatu dak bawah kaki e. Tapi, pas dak kate kan bahwa segale sesuatu udah dak obahkan dak bobah e, jelaslah bahwa iye cak termasuk Allah soyakng, ye mobahkan segale sesuatu dak bobah Kristus. ²⁸ Pas segale sesuatu dak obahkan dak bobah Kristus, okak inyak Anak soyakng pan akan menaklukkan diri ka Iye, ye menaklukkan semue e dak bobah Kristus sehingga Allah akan jadi segale- gale e dalapm semue. ²⁹ Man cak macapm inyak, opaikah ye akan dak lakukan oleh bale insie ye dak baptis makai iyakng ye mati? Man iyakng mati cak dak bangkitkan same sekali, lalu imai bale iyakng membaptis bagi bale insie? ³⁰ Ngan, imai kami ade dalapm masalah setiap waktu. ³¹ Bale menak an, setiap ari aku mengadap ik kematian, demi kebanggaanku dalapm ikau, ye aku milik ik dalapm Yesus Kristus, Tuhatn kite. ³² Secare insie, opaikah untukng kau betarukng jongan bale binatakng buas dak Efesus? Man iyakng mati cak Dak bangkitkan," Ayuklah kite makatn ngan minum karne obuk kite mati. ³³ Inanglah tetipu: "pegaulan ye buruk menghancurkan kebiasaan- kebiasaan ye baik." ³⁴ Sadarlah agik ngan baik ngan inang berbuat dose. Sak, beberopai iyakng cak ade pengonalan akan Allah. Aku mengatekan inyak makai ikau malu. Kebangkit in Tubuh Rohani ³⁵ Tapi, insie akan betanyak," Bopai iyakng mati dak bangkitkan? jongan tubuh opaikah bale insie akan datakng agik?" ³⁶ Hai iyakng bodo! opai ye ikau tabur cak akan tumuh idup, kecuali iye mati lobih oluk. ³⁷ Lalu, opai ye ikau tabur bukatnlah tubuh tanaman ye akan tumuh inyak, melaitnkan bigik e ye cak bekulit macapm bigik ganupm atau bigik- bigik laitn. ³⁸ Tapi, Allah munyuk e tubuh bopai iye menghendak e ngan masikng- masikng bigik dak unyuk tubuh e soyakng- soyakng. ³⁹ Bukatn semue dagikng adelah dagikng ye same, tapi hanya sutik dagikng insie, ngan laitn ne dagikng bale binatakng, ngan laitn e dagikng bale burukng ngan laitn e dagikng ikan. ⁴⁰ Ade pan tubuh surgawi ngan tubuh duniawi, tapi kemuliaan ye surgawi inyak beda ngan kemulian ye duniawi inyak beda. ⁴¹ Kemuliaan mateari beda, kemuliaan bulatn beda, kemuliaan bale bintakng beda karne sutik bintakng beda jongan bintakng ye laitn dalapm kemuliaan. ⁴² Modal inyak pan jongan kebangkit in iyakng mati. Dak taburkan dalapm kebinasaan, dak bangkitkan dalapm cak kebinasaan. ⁴³ Dak taburkan dalapm ka hinean, dak bangkitkan dalapm kemuliaan. Dak taburkan dalapm kelomahan, dak bangkitkan dalapm kekuatan. ⁴⁴ Dak taburkan sebagai tubuh jesmani, dak bangkitkan sebagai tubuh rohani. Man ade tubuh jesmani, ade jam tubuh rohani. ⁴⁵ Macapm ye tertulis, " insie pertame, Adam, jadi jiwe ye idup."Adam ye terakhir jadi roh munyuk ik idup. ⁴⁶ Tapi modal inyak pan, ye rohani bukatn ye pertame. Ye pertame adelah ye jesmani, okak inyak baruk ye rohani. ⁴⁷ Insie pertame asal dari bumi, nyak tik dari dobu tanah. Insie kedue berasal dari saruge. ⁴⁸ Same macapm ye asale dobu tanah, okak nyak pan bale insie ye asale dari dobu tanah. Ngan, same macapm ye saruge, okak nyak pan bale insie ye saruge. ⁴⁹ macapm opai kite dak ciptakan dalapm rupe insie asale dari dobu tanah, kite pan akan makai rupe insie ye saruge. ⁵⁰ Aku mengatekan inyak ka ikau, bale menak an, bahwa dagikng ngan darah cak dapat mewarisik kerajaan Allah. Okak nyak pan ye dapat binase, cak dapat mewarisik ye cak dapat binase. ⁵¹ Dingailah! Aku mengatekan ka ikau ade rahasia, kite cak akan mati semue e, tapi kite semue akan dak ubah, ⁵² Pas inyak, dalapm sekejap mate jak, saat trompet terakhir: karne trompet akan bebungi, ngan iyakng mati akan dak bangkitkan tanpa kebinasaan, ngan kite akan dak ubah ik. ⁵³ Sak, ye dapat binase inyak arus mengonakan ye cak dapat binase. Ngan, ye dapat mati inyak, arus mengonakan ye cak dapat mati. ⁵⁵ Waktu ye dapat binase inyak mengonakan ye cak dapat binase, ngan ye dapat mati inyak mengonakan ye cak dapat mati, maka gonaplah firman ye udah dak tulis: " kemati in udah dak tolatn dalamp kemonangan." Yesaya 25:8 ⁵⁴ "Ooo kamati in dak monaikah ka monangankau? Ooo maut, dak monaikah sengatkau?"Hosea 13:14 ⁵⁶ Sengat maut adelah dose, ngan kuase dose adelah Ukupm taurat. ⁵⁷ Tapi, kite besyukur ka Allah ye munyukkan kite kemonangan melalu ik Tuhatn kite, Yesus Kristus. ⁵⁸ Jadi, bale menak an ku seiman ye kekasih, bedirilah kuat, inanglah goyah, melimpahlah selalu dalapm pakarojaan Tuhatn. Sak, ikau panai bahwa jorih lolahkau cak sie~ sie dak dalapm Tuhatn.