¹ Nubuat ngan Bahasa Lidah Kojarlah kasih ngan onakkanlah jongan bonar- bonar karunie- karunie rohani, terutame makai ikau dapat bernubuat. ² Sak, sopai ye ngomong dalapm bahasa lidah, cak ngomong ka insie, tapi ka Allah; karne cak ade iyakng ye ngeroti, tapi iye mengatekan hal- hal ye rahasia dalapm roh. ³ Tapi, iyakng ye bernubuat ngomong ka insie makai membangun, nasihat, ngan penghiburan. ⁴ Bale iyakng ye ngomong dalapm bahasa lidah membangun diri e soyakng, tapi iyakng ye bernubuat membangun jemaat. ⁵ Aku arap ikau semue ngomong dalapm bahasa- bahasa lidah, tapi lobih agik makai ikau bernubuat. iyakng ye bernubuat lobih bosar daripade iyakng ye ngomong dalapm bahasa lidah, kecuali man iye pan meartikane sehingga jemaat dapat nerimak penoguhan. ⁶ Bale menakan, man aku datakng ka ikau ngan ngomong dalapm bahasa- bahasa roh, opai untuknge bagi kau, kecuali man aku ngomong ka ikau jongan penyataan, pemanaian, nubuatan, atau pengajaran? ⁷ Bahkan, bone- bone ye cak benyae, macapm sulikng atau kecapi ye ngeluarkan bungi, man cak mengeluarkan perbedaan dalapm bungi e, bopai iyakng dapat ngepanai ik alat opai ye sodakng dak mainkan, sulikng ngan kecapi? ⁸ Atau, trompet mengeluarkan suare ye cak jolas, sopaikah ye akan mempersiapkan diri makai beporakng? ⁹ Modal inyak pan ikau. Man jongan lidah kau, ikau mengucapkan kate- kate ye cak dapat dak ngaroti, bopai iyakng nak panai opai dak katekan? Seolah- olah ikau ngomong ka udara. ¹⁰ Mungkitn, ade benyak banyak jenis bahasa dak dunie ngan cak sikukng pan dari pada e ye cak bermakna. Tapi man aku cak panai ¹¹ arti bahasa inyak, aku akan jadi iyakng asikng bagi iye ye ngomong, ngan iyakng ye ngomong inyak jadi iyakng asikng bagiku. ¹² Modal inyak pan ikau, karne ikau bonar- bonar beusaha makai karunie- karunie rohani, beusahalah makai berkelimpahan makai membangun jemaat. ¹³ Karne inyak, hendaklah iyakng ye ngomong dalapm bahasa lidah berdoa makai iye dapat meartikane. ¹⁴ Sak, man aku berdoa dalapm bahasa lidah, rohku berdoa, tapi pikiranku cak bebuah. ¹⁵ Jadi, opaikah ye arus aku lakukan? Aku akan berdoa jongan rohku ngan aku pan akan berdoa jongan pikiranku. Aku akan menyanyi jongan rohku ngan aku pan akan menyanyi jongan pikiranku. ¹⁶ Man ikau hanya mengucap syukur jongan rohkau, macapm opai jongan iyakng, ye ade dalapm posisi cak ade karunie inyak, dapat bekate,"Amin," atas ucapan syukurkau inyak karne iye cak ngeroti opai ye ikau katekan? ¹⁷ Sekalipan ikau mengucap syukur ngan baik, tapi iyakng laitn cak dak bangkitkan. ¹⁸ Aku besyukur ka Allah bahwa aku ngomong dalapm bahasa- bahasa lidah lobih dari ikau semue e. ¹⁹ Tapi, dalapm jemaat, aku lobih baik ngomong limak kate jongan pikiranku makai aku pan dapat ngajar iyakng laitn, daripade sepuluh ribu kate dalapm bahasa lidah. ²⁰ Bale menak an inang jadi anak biak dalapm pemikiran kau. Jadilah bayi- bayi dalapm kejahatan, tapi dalapm pemikirankau jadilah dewasa! ²¹ Macapm tertulis dalapm Ukupm taurat, " oleh bale iyakng ye ade bahasa asikng ngan oleh mulut bale iyakng asikng, Aku akan ngomong ka bangsa inyak, tapi bale insie cak akan meningaikan Aku, firman tuhatn. ²² Jadi, bahasa- bahasa lidah adelah tane, bukatn makai iyakng ye pecayak, tapi makai iyakng ye cak pecayak, sodakngkan bernubuat adelah tane, bukatn makai iyakng ye cak pecayak, tapi makai iyakng ye pecayak. ²³ Man seluruh jemaat bekumpul besame dalapmt tompat inyak, ngan semue e ngomong jongan bahasa- bahasa lidah, lalu ade bale iyakng ye cak ngeroti atau bale iyakng cak pecayak masuk, cek e bale insie akan mengatekan bahwa ikau udah gile? ²⁴ Tapi, man semue e bernubuat, okak nyak ade iyakng ye cak pecayak atau iyakng ye cak ngeroti masuk, iye akan dak sadarkan oleh semue e ngan dak nilai oleh semue e. ²⁵ Rahasia dalapm ati akan nyate, iye akan tesungkur, ngan menyembah Allah, ngakuk ik bahwa sesungguh e Allah ade dak antare ikau. Aturan- Aturan dalapm Batomu Jemaat ²⁶ Jadi, selanjut e macapm opai, bale menak an? Pas ikau bakumpul, masikng- masikng ade mazmur, pengajaran, penyataan, bahasa lidah, atau sebuah penafsiran. Biaram semue inyak dak lakukan makai membangun. ²⁷ Man ade ye berbahasa lidah, biaram hanya due atau palikng banyak iyakng tige, ngan masikng- masikng secare begantian, ngan arus ade iyakng laitn ye meartikane. ²⁸ Tapi, man cak ade iyakng ye meartikan, iye arus diapm dalapm jemaat ngan biaram iye ngomong ka dirik e soyakng ngan ka Allah. ²⁹ Biarlah hanya due atu tige nabi ye ngomong ngan ye laitn mempertimbangkane. ³⁰ Tapi, man penyataan dak buat makai iyakng laitn ye duduk dak dituk, iyakng ye pertame arus diapm. ³¹ Sak, ikau semue dapat bernubuat sikukng demi sikukng, makai semue e dapat belajar ngan semue e dapat dak kuatkan. ³² Roh- roh bale nabi tunuk ka bale nabi. ³³ Sak, Allah bukatnlah Allah dari kekacauan, melaitnkan, damai sejahtera, same macapm dalapm semue jemaat bale iyakng kudus. ³⁴ Batinak arus totap diapm dalamp jemaat karne bale insie cak dak izinkan makai ngomong, melaitnkan arus tunuk macapm opai Ukum taurat mengatekane. ³⁵ Man ade sesuatu ye ingin bale insie pelajarik, biaram bale insie betanyak ka laki e dak umah karne adelah hal ye memalukan bagi betinak makai ngomong dalapm jemaat. ³⁶ Opaikah firman Allah berasal dari ikau? Atau, opaikah hanya ka ikau jak firman inyak dak sampaikan? ³⁷ Man ade ye bepikir bahwa iye adelah iyakng nabi atau iyakng ye rohani, biaram iye mengonalik bahwa hal- hal ye aku tulis ka ikau adelah perintah Tuhatn. ³⁸ Man ade iyakng ye cak mengonalik inyak, iye cak dak konalik. ³⁹ Jadi, Bale menak an ku, usahakanlah jongan bonar- bonar makai bernubuat, ngan inang ngidah iyakng ngomong dalapm bahasa- bahasa lidah. ⁴⁰ Tapi, semue e arus dak lakukan jongan sopatn ngan teratur.