¹ Uwar kuwo timah zuwah u waska awara ku bangaskiya, a zuwah mavok nan Kasirih tuh rina uh Yesoh Kristoh. ² Tuh rina uh yhi na timah gura zugwa i suru makana nan mapes a tek na tiyezehm awar ka ritau ririp ruh bangaskiya uwuri. Tisi seri rigaoraoh nang Kasirih kama roh irhi ankusu mohn ka wana unirghanu nang tenka pokse inung unzaovaoh ku Sirih. ³ Zah kini nazik, tiseri rigaorao nang usezenu urere u wuri. Tiyao nan kuwo usezenu urereh oku renghey ukwakturuwonu. ⁴ Ukwakturuwonu oku gura yende a rivin, rivin rihn yende unirghanu a majagha ikusu ken ruva unzono. ⁵ Unirghanu uru na tiri ubege oku zaku roh irhi ugbor, awar kuwo ama wara iri usunu oh Sirih inung anasuwu na wurih turina uh Mazir Mavur, mami na ama roh irhi. ⁶ Awar ku ken na tih zaku siri, Yesoh imah kao adaor kami kamanihm awar kaya a zaku dorkoroni a Sirih. ⁷ Anang ami a wohn nagbing pirong uyaor irume akao awar ka piya matini. Watakila pirong enka suska uriseh a rambani a rumeh a kao awar ka piya matini. ⁸ Kasiri kama korone u sunu u kan nan a wurih, awar kuwo tirotu rhi aya ivang, Kristoh imah kao awar kawuri. ⁹ Balle a wuri neh kini, na tima zugwa usira a rikaozao reh Sirih. ¹⁰ Awar kuwo timah rotu rhe a vighani, ama sulhunta irh nang Kasirih tuh kao ku pivezene, balle neh kini na tima zugwa usuhu na tenka zugwa usira tuh yhi. ¹¹ A zakure tih kini nazik, tiseri rigaorao inung a Sirih tu rina uh Zonzo Yesoh Kristoh, umi na areh turina uyhi na tima zugwa sulhu uru. ¹² Awar tu ken, neh ken na ivang ima nighe urikuya tu rina u piyaor urao, ken na ku kao ko nighe awar kivang. ¹³ Awar kuwo amah rotoh roh a mateh, ivang imah rhi inung urikuya, zah uvaru ivang a tek na mateh ma zaman mihm. ¹⁴ Nan ken, ivang ima wura a teghe cette daor ka Adamu maka rava ka Musa, nan aya amah roto riseh ivang imuzi mi na ka Adamu kama riseh, uni ureh u misali u piya en ruva. ¹⁵ Tuken, ka piru kami ka zaku sighi ku chok awar kuwo inna areh tivang i piyaor urao uni, mapuk masi kizihm, ken na mapes mayhi nang u paru uyhi turina u piyaor uni Yesoh Kristoh, u paru umi uma gwakana maka rava mapuk mayaor. ¹⁶ Awar kuwo kapiru kami ka zaku sighi u sakamako u piyaro uni arise ivang iyieni. Tukine, mateh mahn mapiu mamah ruva awar kivang upiyaor urao. Neh ukeru, uparu u yanci uma ruva a tini kivang e yaor nagbwing. ¹⁷ Awar kuwo, nna areh awar kivang i piyaor urao uni, ku kao kuma korono, awar ken, aya ama sere a mapuk ma mapes nan uparu u matini tu rina uvoh kumi, Yesoh Kristoh. ¹⁸ Awar tuken, neh ken na ivang i piyaor urao ima uende mateh man ruva a natih nasang, ken na utuma u matini mapiyaor urao man yende u waska nang kuvoh nahn mapuk mayaor. ¹⁹ Neh kenna uzah umatini mapiyaor urao mamah rene a mapuk mayaor nagbwing ama wana aya ivang, ken nea tima tini ma piyaor urao mapuk mayaor nagbwing anka zuwa uwaska. ²⁰ Mateh mamah ruva a rene ivang in pirinuwohm. Katek na ivang e pirinuwohm, mapes maku pirka u pirinuwohm. ²¹ Anang ara ama wana ken awar kuwo ivang ima pirka a majagha ukao, kenna mapes mamah pirka a majagha a matini nang kuvoh kuza marara un Yesoh Kristoh Zonzo uwuri.