¹ Anreh nku reghe inung achara kuraom ka itiwomoh, ku nyakari ama nyakara inung unpette kozohn nang ko tini. Amah wura nang uwuranu apivi'ah zohn. ² Anreh nku reghe unyenku ko Sirih kun sin miseh arinyhi ngwaki, wammi enka suska uwonoh unyakara agura gwekpe uwuranu ukun?" ³ Zah pirong izoh vah ajhaos vah inung unrikuya uma inka suska uwonoh u nyakaru kumi vah uteze kun. ⁴ Mmak magha na pang awar kuwoh zah piya na amazuwa yhi ivur uwoh iwonoh u nyakaru vah uteze kun. ⁵ Anreh pirong inung ana reveh ami iverun nang, "kasu nagha. Tirkiri! ku zaki kuti vervene ti Yahuza, ku naok ku Dawuda, kuma sisa. Konka yika u wonoh unyakaru nang uwuru apivi'ah pizohn." ⁶ Anreh nku reghe akonoh ku gam kun ma yaohzi atek katiwomohh nang manarah ma whar manas inung ana reveh ami. Isighi kinne anku ma wuna yhi. Irih atuma apivi'ah-pizohn nang ayizi api vi'ah-pizohn; ani areh mazir api vi'ah-pizohn ma Sirih kama tun, man inung urikuya. ⁷ Anreh iku jarayhi ako sere unyakaruh kumi a chara kayhi kuraom ka piya mi izohm ararah katiwomoh. ⁸ Adhaor kami nang konoh ku gam kama zika unyakaru kumi, manara ma wharsi manas nang areveh akiri-avah-amanas inung unyhaon antukuzuwoh ati ayhaon anyen muyhi. Kowammi inung unyhaon iyaop utatung nang kasep kuzinariya kankori nang uyhaor urentu, umi ureh adu'a aya rumeni. ⁹ Anreh anku sipsa usiva kupas: "Pighi piruwoh pizika unyakaru kumi anreh agura wonoh uwunnu ukun. Awarkuwoh ama cheske vuh, anreh amannyo mapuh pimah zemine ayhaor amaruvah nang Kasirih inung ati verveneh nasang, ayhaor nang marho. ¹⁰ Pimah rene yhaon atiwomoh nang Firist asa anriseh Asiri kawuri utumah, anreh anka zonzonoh inung unrikuya." ¹¹ Anreh nku tirkiri agura pokoro ama rinih mana nyenku anma girkiri ararah katiwomoh nang manara mawarsi nang areveh. Ama ravah ama dubuh rikiri mamma dubuh rikiri nang mamma dubuh ama dubuh. ¹² Anreh anku vereh ari nyi rigwaki, "pihimi akonoh kugam kami na ama cheske asa kan ser usiru, tikarma, kuyaoh, usisazu, tiwomoh, nang uchanghu. ¹³ Anreh nku pokoro ankusu mumi na ama napsa mumi muri izoh nang kurikuya nang inung unrikuya nang inung amani-masir koyemmi inung inku vereh "Amajaghari nang piya izohmi ararah katimowoh nang amajaghari nang konoh kugam, ucha'u, timowoh, nang usiru utimowoh amaruvah unraosi amaka ravah awuri. ¹⁴ Manara ma wharsi manas man vereh "ken!" Anreh areveh ami anku tukuruwon anatih ayhaon anreh anku tutuyhi.