¹ Ɗaŋngǝni kǝ tayi nǝ mǝǝskǝn a giɓkǝ kusuŋsǝ ngǝtn waan. ² A tayi kǝ ta ya tsetn a giɓkǝ kusuŋsǝ ngǝtn waan ɗaŋ ngǝ mǝn ɗǝgn. Kǝ ta ya tsǝtn ɗaŋ ngǝ murghǝ guŋndu ghǝ vartǝ ghǝ Tsognvon, zhipti yo ɗaŋ ca fi laa a mǝni yo ɗaŋ caa wum kǝǝm hŋ. ³ A ta yi ɓurug maa ta tsǝtn a dlei mǝni gyagin, mǝ ta ya fi ngǝtn yo ɗaŋ wo pol raa wopm ngai ɗaŋ nǝ kusuŋshi. Mǝ ta yi ɓwaaghǝn wopm nǝ mǝǝri ghǝ jenndalghǝn ɗaŋ kǝ zarsǝ ɗaŋ. ⁴ Beɗ tǝ gii, Cogn nǝ murghǝ yelghǝn gwaanndǝ, nǝ durghǝ suughǝn wos ɗaŋ a suu mi monnda. ⁵ Ɗaŋ mǝ ta ti nǝ mǝǝskǝn a giɓkǝ kusuŋsǝ ngǝtn wopm, she a ta shishermi wopii tǝ Ɓorghǝn kǝ Coghǝi, nǝ durghǝ gyaal ghǝn kǝ tu kaɓkǝn. ⁶ Cogn ata shisher mi wopii tǝ Ɓorghǝn kǝ Cogn, Cogn a gaa mi mǝ tsǝtn cim tǝ a lǝɓ tsǝtnngǝn gaami Tsognvon a giɓkǝ Yesu Ɓorghǝn kǝ Cogn. ⁷ Durghǝ tu ɗuun a ken tǝ zhiɗ mi lǝǝɗkǝn gyaal wos monnda ɗaŋ a zhiɗ mi a ngǝtn ngǝ mbuni ɗaŋ a fimi mǝn a giɓkǝ Yesu Ɓorghǝn kǝ Cogn. ⁸ Nǝ durghǝ gyaal ghǝn tǝ kaɓki a te ghǝ caaghǝn raa, gin nǝ fighǝn waan hŋ, nǝ ngǝtn yo ɗaŋ Cogn a vǝr ɓem. ⁹ Gyaal a man nǝ laa hŋ, durghǝ gii gon tǝ ɗu gǝǝɓ hŋ ¹⁰ Nǝ durghǝ tu minǝ ngǝtn ngǝ laa ghǝ taas Cogn ɗaŋ ata ndǝr mi a giɓkǝ Yesu Ɓorghǝn kǝ Cogn tu mǝǝ fi laaghǝ mbuni ɗaŋ Cogn a ta gaa mi mǝn tu mǝǝ rii ghai. ¹¹ Nǝ gii ɓitalǝn tu kinǝ mǝn yo ɗaŋ kinǝ Yehudawa hŋ a dli, gya gyo ɗaŋ nǝ sereghǝn a dli ɗaŋ tǝ fi tǝ taas zaar tǝ ta ya cim ki tu, "Gagsǝmsǝ." ¹² Durghǝ tu a gii kǝ ta yi nǝ ɓǝǝlghǝni tǝ Ɓorghǝni kǝ Coghǝi. Kǝ tayi nǝ sǝmmbǝrsǝ a mǝn Isar'ila. Kǝ ta yi sǝmmbǝrsǝ ghǝ mbiighǝn ɗa raai. Kǝ ta ti tǝ gaaghǝn raa won nǝ ken hŋ. Kǝ ta yi tǝ Cogn hŋ ɗa ɗǝki. ¹³ Beɗ tǝ gii kyaani ɗaŋ kǝ ta yi ɗongai tǝ Cogn, taa lǝǝr ki ɗi mel a te voraŋ ngǝ Ɓorghǝn kǝ Coghǝi. ¹⁴ Durghǝ tu yaani ghǝn ci raa ghǝ wusni wopm. A sular mǝn mbǝtlǝmii namboŋ. A wuu kǝŋ ngǝ yaŋngaskǝn dlǝŋsǝ wopii ɗaŋ a ɓǝǝl mi wopii a te voraŋ wos. ¹⁵ Yan tu, a wuu mborki ghǝ Kaadii tǝ laaɓkǝn giir yaasǝŋ nǝ durghǝ tu tǝ ndǝr zaar namboŋ a giɓkǝ gamashi, tǝ cig tǝ lǝǝr tsǝtnngǝn wusni ɗi. ¹⁶ Ɓorghǝn kǝ Cogn sular zarsǝi ɗi ɓurug tǝ naai nǝ zaar namboŋ a Cogn a te hǝmmbǝli wos, ndǝr ɗu tsǝtnngǝn loŋsǝ tǝ dlǝŋsǝ wopeshii. ¹⁷ Yesu ata man gǝm vii tsǝtnngǝn ngǝ wusni ɓaski kyaani ɗaŋ kǝ ta yi ɗongai tǝ mǝni yo ɗaŋ tǝ tayi mel. ¹⁸ Durghǝ tu a te Yesu ɓurug wopm mǝ tu tǝpm tlǝghǝn a Dawopm a te zhipti namboŋ. ¹⁹ Nǝ gii, ɗaŋngǝnin kyaani ɗaŋ kinǝ Yahudawa hŋǝi kinǝ sǝmmbǝrsǝ tǝ mǝn yaatli gon ɗa hŋ. A bamvii gii, kinǝ mǝǝri yaatl kǝ zarsǝ Cogn kǝ ndzǝk ndzǝkki tǝ mǝn ngǝ dǝnngǝ Cogn. ²⁰ Tǝ nalki a dull daɗ viin ngǝ mǝn laaghǝ Cogn, tǝ mǝn shinngǝn Cogn, Yesu Ɓorghǝn kǝ Cogn gamashi ǝŋ a ta yi nǝ puus kǝ getle ghǝ dǝness. ²¹ A giɓi wos ǝŋ dǝnes ɓurug a ta tsǝtii, luui, naai nǝ dǝn ngǝ Cogn ngǝ Daadǝn. ²² A giɓi wos kǝn tǝ nalki vii namboŋ tǝ nal ki nǝ lǝɓ tsǝgnngǝn Cogn a giɓ zhipti.