¹ Bulus, monngǝ Yesu ɗaŋnǝ ɓorghǝnnia te fighǝn Cogn, nǝ kǝ zarsǝ ghǝ ndzǝkni kǝ Cogn ɗaŋ ci Afisa gya gyo ɗaŋ citǝ caaghǝn raa a Yesu ɗaŋ nǝ ɓorghǝnni. ² Gyal tǝ naa ɓaski, tǝ wusni a lǝǝɓ Cogn Dawopm tǝ Daadǝnwopm Yesu ɗaŋ nǝ ɓorghǝnni. ³ Luughǝn tǝ naa a Cogn Daaghǝ Daadǝn wopm Yesu ɗaŋ nǝ ɓorghǝnni. yaan ghǝn a gǝmmi mbuuni mǝn a giɓkǝ mbuuni ggǝ zhipti ɗaŋ ci tsogn a giɓkǝ gi ɗaŋ nǝ ɓorghǝnni. ⁴ Ɗaŋ tǝ fi ɗǝgn, Cogn ta bwaami myaani ɗaŋ mǝ caa raa a giɓjǝ Yesu. A bwaami nǝ duryo tu mǝ fi tsǝtnngǝn ndzǝkkǝn tǝ tsǝtnngǝn yo ɗaŋ citǝ kuskǝn a kenwos hŋ. ⁵ A giɓkǝ suughǝn Cogn suu tǝ mbiimi mǝǝ naai nǝ mǝǝriwos a te Yesu ɗaŋ nǝ ɓorghǝnni. A fi gi nǝ polghǝn wos tu tǝ fi cik. ⁶ A bamves yan ci tu Cogn tǝ kaɓ zǝghǝghǝn nǝ durghǝ luughǝn ngǝ gyalwos. Gin yan ngǝn ci ngǝtn yo ɗaŋ a vǝrmi nǝ kǝ sǝriɗi a te murghǝ suughǝnwos. ⁷ A te murghǝ suughǝnwoshes tǝ vuumiwopi a te voraŋwos, tǝ dlaaghǝn loŋsǝ kusǝŋsǝ ngǝtn a te tughǝnngǝ gyalwos. ⁸ A vǝr gya bakdas a giɓkǝ ɓuruk saghaɗken tǝ yisǝŋngǝn. ⁹ Cogn giɗ mi jom jomni ghǝ ngǝrshi gya gon ɗaŋ tǝ watarmi kǝ ngǝtnngǝ fighǝnwos, a te gyo ɗaŋ ca suu tǝ giɗ a giɓkǝ gi ɗaŋ nǝ ɓorghǝnni. ¹⁰ Ǝŋ kiles yafi kǝ banngǝn fighǝnwos, Cogn wo lǝǝr ɓuruk ngǝrshi gya gi ɗaŋ ci gaami tǝ yatl a giɓkǝ gi ɗaŋ nǝ ɓorghǝnni. ¹¹ Tǝ bwaami a giɓkǝ gi ɗaŋ nǝ ɓorghǝnni mǝǝ naa nǝ mǝn duul ghǝ Cogn. A fimi ngǝrshi gin mǝnɗi bannɗǝŋ a giɓkǝ fighǝnwos, cinǝ murghǝ fighǝn ngǝtn ɓuruk a dekkǝ ɓitalghǝnwos. ¹² Cogn fi cik nǝ duryo tu mǝ fuuɗi nǝ durghǝ zǝghǝrghǝn ngǝ luughǝnwos. Myaani ghǝn mii keni ɗaŋ mǝ tu caaghǝn raa a giɓkǝ gi ɗaŋ nǝ ɓorghǝnni. ¹³ A giɓkǝ gi ɗaŋ nǝ ɓorghǝnni kǝnnda tǝ tu wumngǝn vik jom jomni, vik wusni ghǝ vuumngǝnwan a te Yesu. A giɓiwos ghǝnnda kǝ caa raa tǝdlǝpmki waani tǝ zhipti var kǝ ndzǝkkǝn gyo ɗaŋ tǝ mbi ɗa raai. ¹⁴ Zhipti vares ghǝnnda cin giɗkǝn duulwopm kǝnnda mǝ tu yelghǝnwos. Gin ǝnnda cin zǝghǝrghǝnngǝ luughǝnwos. ¹⁵ Nǝ durghǝ cik, a kiliyo ɗaŋ mǝ wum vik caaghǝn raa waan a giɓkǝ Daadǝn Yesu tǝ suuggǝn waan a te ɓuruk gya gyo ɗaŋ tǝ gaashi nǝ durwos. ¹⁶ Ma ga ɓitalghǝn waan hŋ migha karaghǝn nǝ dur waan a giɓkǝ karaghǝnnetn. ¹⁷ Mya kara tu Cogn ghǝ Daadǝnwopm Yesu ɗaŋ nǝ ɓorghǝnni, Daa luughǝn, wo vǝrki zhipti var kǝsaghaɗkǝn tǝ giɗkǝn ghǝ yisǝŋngǝnwos. ¹⁸ Mya kara yirghǝ raawaan tǝ ɗǝrǝi nǝ duryo tu a yisǝŋ dekkǝ cimngǝnwaani. Mya kara nǝ duryo tu a yisǝŋ tughǝnngǝ guŋndǝ kǝ duulwos a giɓkǝ gya gyo ɗaŋ tǝ gashi nǝ durwos. ¹⁹ Mya kara a yisǝŋ vartǝwos kǝ luughǝn ɗaŋ ɓanngǝn ghai hŋ ɗaŋ yi ɓaski gyo ɗaŋ mǝ caa raa ɗa. Luughǝn gin yi ate laaghǝ tlyaaghǝn kǝ vartǝwos. ²⁰ Gin kǝnnda ci vartǝ yo ɗaŋ a fi laa a giɓkǝ gi ɗaŋ nǝ ɓorghǝnni kiliyo ɗaŋ Cogn shishertǝ a giɓkǝ mǝn mǝǝskǝn a ga tǝ a taaghǝ zaariwos gaami. ²¹ A ga tǝ a daan gaami ghǝ ɓuruk guŋndǝ, vartǝ, tlyaaghǝn, tǝ ɓuruk sǝmndǝ. A ga gi ɗaŋ nǝ ɓorghǝnni nǝghǝ wusuli gin kurum hŋ beɗ tǝ wusuli yo ɗaŋ wo man. ²² Cogn ga ɓuruk ngǝrshi gya gi a daɗkǝ yasǝŋ ghǝ gi ɗaŋ nǝ ɓorghǝnni. A gatǝ nǝ munvar ghǝ ɓuruk ngǝrshi gya gon a giɓkǝ Ikilisiya. ²³ Ikilisiya nǝ dliiwos, yungarghǝn gyo ɗaŋ a yugn ɓuruk ngǝtn a giɓkǝ tǝpm ɓuruk.