¹ Umwene U Yesu mwo akwika kwi ghamba Po ifilindilo fifingi fikamukonga. ² Popapo Umundu wa mbungo ya wukoma akisa kukwake, akamubungulukila, akayugha nawe akati, "We malafyale, linga wighanite abaghile ukunosha". ³ umwene U Yesu akagholosha akakono akamupalamasha, akamwamula akati,"Nighanite Noshiwa". popapo na papapo imbungo ya bukoma yikawuka. ⁴ Po u Yesu akamubula akati, "Koma ukumubula nayumo umundu, lole bukagha uye wiboneshe ku muputi, uye bike ifyabupe fifyo alaghile u Mose, chibe chimanyikisho kukwawo. ⁵ Mwo ingile mukaya ka kaperenamu, u sarigenti yumo akisa kukwake akamusuma u Yesu akati, ⁶ "We malafyale, umubombi wangu alambalile kukaya ali ni mbungo ya kutetema, yimunyashishe leka". ⁷ Umwene u Yesu akamwamula akati." ngwisa tise imuposhe." ⁸ Umwene u sarigenti akamwamula akati. "We malafyale, ndabaghile ukuti uwe wise wingile muchitembe changu, lole uli yughagha nalyo ilishu lyesne bo umubombi wangu tiapone. ⁹ Namanga nune indi mundu yuyo abikiwe pase pabamaka, sona nune indi nabashikali pase papangu; nandi ngumubula yumo nguti bukagha, "akubuka, sona nandi nguyugha kuyungi nguti, "Isagha, akwisa; nakumuwombi wangu nandi nguti, bombagha iyi, akubomba". ¹⁰ Umwene u Yesu mwo apulika shishishi akaswigha, akababula bo bakamukongagha akati, "Naloliloli ngubabula une nguti, namu isilayeli ndalwaghite nalumo ulwitiko ngati ulu. ¹¹ Une ngubabula nguti, bingibotibakisaghe ukufuma kuko kukufumila isuba nakolikwingilira, tibakikalaghe pamupenenu Abrahamu, nu isake, nu Yakobu, mubunyafyale ubwa kumwanya; ¹² Lole abana ba malafyale tibakataghiwaghe kuse mu chisi, Mwo timukabe muywegho nakusha a mimo. ¹³ Umwene u Yesu akamubula u sarigenti yula akati. "Bukagha! shibe isa Mwo uwe witikile." Po umubombi wake akapola papapo na papapo. ¹⁴ Po u Yesu akingila mu nyumba ya Peteri. Mwo akamwagha u malafyale wa Peteri alambalire ali ni sekema. ¹⁵ Akamupalamasha pakakono, po isekema yikaleka, akanyatuka, nukumuwombela. ¹⁶ Lole ukufika namasuba, bakamwisila nabandu abingi aba mipepo iminyali, akafumisha imipepo nishu lyene, nukubapposha boshi bo babinite. ¹⁷ Ukuti shikwanilishiwe shisho shikayughiwa nu musololi u Yesaya, ukuti, "Umwene abweghite ubutolwe bwitu," anyamwile nububine bwitu nimbina shitu. ¹⁸ Umwene u Yesu mwo aketa ifilundilo fimubungatile, akababula abafundiwa bake akati, "Bambukagha." ¹⁹ Akisa kukwake yumo umumanya ndaghilo, akati, Manyishi Tingukongaghe koshi ko ukuya. " ²⁰ Umwene u Yese akamubula akati, " abokambwe bali namina, nifiyuni ifya kumwanya fili nififumbo, lole umwana wa mundu atanapakughoneka mutu wake. ²¹ Lole uyungi mubafundiwa wake akamubula akati, "We malafyale uli nyitikisha ukuti imbuke tashi inje ishile utata." ²² Lole Umwene u Yesu akamubula akati, "Ngongagha, baleke abafwe bashilane abafwe bene." ²³ Popapo u Yesu akingila mu boti, abafundiw bake bakamukonga. ²⁴ Bakagha inyanja yisambukite ngani, po amayigha ghakalifukilagha iboti, umwene u Yesu akaghona utulo. ²⁵ Po bakisa kukwake nukumulamusha, bakati, "We malafyale, tupoke, tukwibila." ²⁶ U Yesu akababula akati. "Koni ko muli bogha, Mwe balwitiko ulupepe umwe? Akanyatuka akayikisha imbepo ni nyanja, o pakabashe mye. ²⁷ Abandu bakaswigha ngani bakati, mundu yuki yuyuyu uyu yo imbepo ni nyanja fikumupulika? ²⁸ Umwene u Yesu mwo afika isila lira, mu chisu chaba Gadala, akakomana na bandu babiri abamipepo iminyali, bo bakafuma mumapumba, abakali ngani, Nayumo umundu yo akendagha isila yila. ²⁹ Awene wakakolela bakati, "Tuli buki utwe nuwe, we mwana wa Kyala? Ngimba wisile kuno ukuti utufunde mwo akabaliro kakali?" ³⁰ Popo walipo pautalipo umutimo wa nguluwe shonyingi shisho shali kululisho. ³¹ Popapo imipepo iminyali yikasuma yikati, "Linga kututisha po ututume twingile mumutimo wa ngulube ghula." ³² Umwene u Yesu akashibula akati, "Bukagha." Ishene shikafuma nukwingila mu ngulube; popo keta umutimo ghoshi ghukakindila mu chibwina nu kwiponia mu nyanja nukufwila mumishi. ³³ Lole abalishi bakakinda nukubuka kukaya bakaya bafumusha shoshi, nishabamipepo iminyali bala. ³⁴ Popo abandu boshi mukaya, bakafuma nukuya pakukomana nawe u Yesu. Bwo bamubweni, bakamusuma ukuti afumemwo mu chisu chabo.