¹ Po u Yesu akalongoshiwa nu mbepo mmatengele, ukuti aye agheliwe nu setano. ² Mwo afungite ifyakulya amashiku 40 pamusi napawushiku ,isala yikamubaba. ³ Po u setano akisa kukwake nukumughela akati, ''Pala we mwana wa chala sanusha imabwe agha ukuti chibe chakulya,'' ⁴ umwene u Yesu akamwamula akati, ''lisimbiwe ilyakuti umundu atangawa nu bwumi ni fya kulya fyene, lole nilishu lyo likufuma m'mulomu wa Chala.''' ⁵ Po u setano akamwegha nukuwuka nawe mu kaya akaghindikiwa aka Yerusalemu akaya amubika pa mwanya pakasale pa nyumba ya Chala, ⁶ akamuwula akati, ''Pala wemwana wa Chala, wiponie pase, pakuti lisimbiwe ilyakuti 'Tise ababule abandumi bake ukuti bakwangile mutukono twawo, ukuti manye wise wifulashe akalundi kako pibwe.''' ⁷ U Yesu akayugha nawe akati, ''Lisimbiwe ilyakuti, 'Manye umughelaghe u Malafyale u Chala wako .'' ⁸ Sona, u setano akamwegha nukuwuka nawe kwighamba itali po akamulangisha ubunyafyale nu wukabi bwoshi ubwa chisu chapase, ⁹ Po akamuwula akati, ''Fyoshi fifi tingupe pala kundambila une.'' ¹⁰ Po u yesu akamuwula akati, "Tilapo uwe setano! pakuti kulembiwe ilyakuti, 'Umulambilaghe u malafyale u chala wako, sona umuwombelaghe yuyo mwene.''' ¹¹ Po u setano akamuleka, abandumi ba chala bakisa nukumuwombela. ¹² Mwo u yesu apulika ukuti u yohani apinyiwe, po akafumapo nukubuka mu chisu cha Galileya. ¹³ Akafumamwo mukaya ka nazaleti nukuya ukwikala mukaya ka kapernaumu pambali panyanja mu chisu cha Zebuloni ni cha Nafutali. ¹⁴ Ukutimwo shikwanilishiwe shisho akayugh umusololi u Yesaya, po akati ¹⁵ "Ichisu cha zebuloni ni chisu cha Nafutali,fyo fili pasila iyakuya ku nyanja, kwisila kwa lusoko lwa yorodani ku galileya, ichi chisu cha ba panja. ¹⁶ Abandu bo wikile mu chisi babubweni ubwelu ubukulu nabo wakikala mu chisu cha mu chifwani cha bufwe, ubwelu bukababalira." ¹⁷ Ukufuma akabalilo kala u Yesu akanda pakulumbilila akati, ''Pindukagha pakuti ubufumu ubwa kumwanya buli pipi.'' ¹⁸ Mwo u Yesu akwenda kulubafu lwa nyanja ya Galileya, akabaketa abana mundu babili, u Simoni yo akitishiwanga ilya Peteli, u Andileya umukeke kukwake, mwo bakuponia ichakukolela iswi mu nyanja, ukuti bakaba balobi. ¹⁹ Akayugha nawo akati sakuno mungongaghe, mbasanushe ukuba balobi babandu. ²⁰ umwalubilolubilo wakafileka fyo wakakolela iswi nukumukonga. ²¹ mwo apululila pala akabaketa abana mundu abangi babili, u Yakobu umwana wa Zebediya nu mukeke kukwake u Yohani bakaba mu boti pamupene nu wise u Zebediya, bakatendekeshanga ifya kulobela iswi akabitisha, ²² mwalubilo lubilo bakalileka i boti nukumukonga u Yesu. ²³ Po u Yesu akenda akashungulila mwoshi mu chisu cha galileya akamanyishanga mu nyumba shabo sho bakiputaghamwo, nukulumbilila amashu amisa aghabunyafyale bwa Chala akaposhanga imbina shoshi namabubine bwo bakaba nabwo abandu. ²⁴ Po ukafumukwa kwake kukamanyikwa mu chisu choshi icha siliya, bakisa nababine boshi kukwake, bo bakaba ni mbungo isha luko lyoshi bobakatamiwagha, nabambepo inyali, nabafishilishi, nabalemale, akabaposha. ²⁵ Ichilundilo ichingi chikamukonga ukufuma mu chisu cha Galileya , cha Dekaboli, kokuti cho chisu cha twaya teni(10), nakaya ka Yelusalemu sona ni chisu cha Yudeya, namwisila umwa lusoko ulwa Yorodani.