¹ Bwo u Yesu amala ukumanyisha fyoshi ifi akati kubamanyili bake, ² "Mumenye ukuti ulusekelo lya paska tilubeko nandi ghakindako amashiku mabiri, Po sona umwana wa mundu akuya pakubikiwa ukuti bamukomelele pa chipingika." ³ Popapo abaputi abosongo, abamanya ndaghilo nabosongo babayuda bakabungana mu nyumba ya muputi u songo ingamu yake kayafa. ⁴ Bakapangana namwo bangamukolela u Yesu muyuchefu ukuti bamughoghe. ⁵ Lole bakati manye tumukole pakabalilo kamluaekelo, papo abandu banganda ichongo. ⁶ Po u Yesu akaba mu kaya ka beteniya munyumba ya Simoni uwa bukoma . ⁷ Umukolo akisa kukwake nisupa ya lipwangasibwe yo yikisula namafuta ghakunungila agha pamutengu uwa pamwanya. Akapungulila amafuta agha pa mutu wa yesu. ⁸ Abamanyili bake bakati baketa ichi bakakalala bakati, "Mukukomania ghaki amafuta agha?" ⁹ Amafuta agha ghali ghakughulishiwanga pa ndalama inyingi ukuti babape abapina. ¹⁰ U Yesu akati ashimanya ishi akati kukwabo, "Koni ko mukumutamia umukolo uyu? Umwene ambombela ichindu ichisa . ¹¹ Pakuti abapina muli nabo amashiku ghoshi lol une tamube nune amashiku ghoshi nashiku. ¹² umukolo uyu apungulila amafuta agha pamubili wangu ukughunoshela ngani pakutamiwa kwangu . ¹³ Naloli ngubabula nguti koshi ko ubulumbili ubwisa tiye bulumbililiwe mu chisu chapase cho abomba umukolo uyu chope tichiye chiyughiwe ukuti bamukumbukaghe." ¹⁴ popapo yumo wa bamanyili tweluvu ingamu yake YUDASI sikaliyoti, akabuka ku baputi abosongo. ¹⁵ akabalalusha akati, "Ngimba timumbeki nandi uYesu na mubika mutukono twinyu?'' popapo abene bakamupa indalama isha siliva* amalongo matatu. ¹⁶ nukwanda akabalilo kalakala u yudasi akalondagha akabalilo akisa akakumubikila uYesu. ¹⁷ pishiku lya bwandilo Ilya palusekelo chibama ichisita chimela*, abamanyili bake bakisa kwa Yesu bakamulalusha bakati, "Ngimba mukulonda ukuti tuye tubatende keshele kwoki ichakulya cha pasa?" ¹⁸ UYesu akamula akati, "Bukagha mu mukaya kamundu yumo, iye mumubushe muti, 'Umumanyishi akuti, ''Akabalilo kangu kali pipi, ngulonda yako pamupene nabamanyili bangu." ¹⁹ Abamanyili bakaya babombo isamwo uYesu akababulila, po bakitendekesha ichakulya cha pasaka ²⁰ Namasuba, uYesu nabamanyili bake tweluvu bakikala nukulya. ²¹ Po bakalyanga uYesu akati, "Naloli ngubabula yumo uwa umwe tiambike mutukono twabalughu." ²² Abamanyili bakaba nichitima ngani, po yumo yumo bakanda ukumulalusha uYesu ukuti, "Ngimba nene malafyale?" ²³ UYesu akabamula akati, "Yo akubika akakono pamupene nune mumbale weyo tise ambike mutukono twabalughu. ²⁴ Naloli umwana wamundu akubuka ngati isamwo kwasumbiliwe nishake mumasimbo, lole shabutolwe kumundu yo akumubika umwana wamundu mutukono twabalughu! kwali kwisapo ngali atakapiwagha Umundu uyu. ²⁵ popapo uyudasi yo akumubika UYesu mutukono twabalughu akati, "Ngimba nene Mumanyishi?" UYesu akamubula akati, "Wewe wayugha bubwo." ²⁶ Po bakalyanga uYesu akegha ichibama, akiputa kwa Chala nukuchimenyula nubapa abamanyili bake akati, "Egha mulyange, ughu gho mubili wangu." ²⁷ Akegha sona ifinga akati, iputa kwa Chala akabapa abamanyili akati, "Ng'wanga mweshi. ²⁸ Pakuti ili lyolyo libanda lyangu ilya lwitikano, lyo likubakupukila bo bingi ukuti imbibi shabo shihobokeliwe. ²⁹ Ngubabula nguti tanise ing'we sona ifya museke shamafilu umupaka pishiku lyo tise ng'wange numwe ifipya mubunyafyale bwa Tata". ³⁰ Bakati bimba ulwimbo, bakafuma nukubuka kwighamba lya mishunguti. ³¹ Popapo uYesu akati kwabo, "Ubushu ubu umwe mweshi timwikinye mwangu nu kundeka nimwene isamwo lisimbiwe mumasimbo ikyakuti, 'Tinise imughoghe umutimi umutimo wa ng'oshi tighukanyambane.' ³² Lole nandi nashuka kubufwe tingabatangilile ukuya ku Galileya". ³³ UPeteri akamula akati, "Napo boshi bangikinya mwako nukuleka, une ndangikinya mundumbula." ³⁴ UYesu akamubula uPeteri akati, "Naloli ngukukubula uwe nguti, ubushiku bububu, bwo numukolwe atalilite, tiwise wingane katatu." ³⁵ Lole uPeteri akamula akati, napo chikaba chakufwa nuwe pamupene, pope ndangakukana uwe nashiku." Abamanyili abanine boshi bope bakayugha isa bunobuno. ³⁶ Popapo uYesu nabamanyili bake akabuka kubuyo bobukwitishiwa Getsemani. Bo bali kulakula, uYesu akati kwabo, "Mwikale panupanu, une ngubuka kula pakwiputa." ³⁷ akamwegha uPeteri pamupene nabana ba zebediya babili, po akanda ukisulumania nu kulalamuka indumbula. ³⁸ Po Akababula akati, 'Umoyo wangu ghusulumanishe ubusulumanie bwa bufwe; po mube panupanu mube maso pamupene nune." ³⁹ Akati endapo ukuya pandashi panandi akawa akafulama nukwiputa akati, "Tata, nandi chali cha kwitikishiwa ifinga iyi iya butolwe yati yitilepo pangu. Bobule boma ubwighane bwangu lole ubwako . ⁴⁰ Popapo akisa po pakaba abamanyili akabagha baghonite utulo; akamubula uPeteri akati, "Ngimba mwapotwa ukuba maso nune akabalilo kamukene? ⁴¹ mube maso muputaghe ukuti manye mukingile mungelo; umbepo wa mukati yo itikite lole umubili ghomonywa". ⁴² akabuka sona ulwabubili, akiputa akati, "We Tata nandi ifinga yabutolwe iyi yitabaghile ukupulusanie pangu ukuti manye injambilile, ubwighane bwako bobubombiwange." ⁴³ Bwo akwisa sona akaghe bagonite utulo pakuti amaso ghabo ghakaba mang'wamu nutulo. ⁴⁴ Akabaleka, akabuka sona pakwiputa akabutatu; akayugha sona amasyu ghaghagho. ⁴⁵ popapo akisa po pakaba abamanyili, akababula akati, "Mukali mughonite utulo mukutusha! keta, akabalilo kalipipi umwana wamundu akuya pakubikiwa mutukono twabatulanongwa. ⁴⁶ Nyatuka tubukaghe, keta, yo akuya pakumubika mutukono twabalughu ali pipi." ⁴⁷ Bwo uYesu akali akuyugha, uyudasi uwabamu bandu tweluvu akisa nichilundilo chabandu ichikulu bo bakatumiwa na baputi abasongo na bosongo baba yuda, bwo ba banyatuile abopanga nongomo. ⁴⁸ Lole umwene yo akamubikagha mutukono twabalughu, abapile ichimanyilo atili, "Nandi yo ngumufipa bwo weyuyu; ise mumukolaghe." ⁴⁹ Umwa lubilo abayuda bakabukagha kwa Yesu, akayugha akati, "Ngukulamuka Rabi!" Po akamufyomba. ⁵⁰ Umwene Yesu akamubula akati, "Weya bomba sho wisile," popapo abandu bala bakisa bamukola u Yesu. ⁵¹ Po yumo uwabamu bo bakaba nu Yesu, yumo akegha upanga nukumubika uwambombo wa muputi usongo ikutu. ⁵² Po uYesu akamubula akati, "Ghalukisha papo upanga wako pabuyo bwake; pakuti boshi babo bakwegha upanga tise bafwe nu panga. ⁵³ Ngimba mutakumanya ukuti ningasuma kwa Tata lululu ulu ukuti andumile abandumi* ababwite ukukinda tweluvu? ⁵⁴ Ngimba papa shingaba bulele sho amasimbo ghakuyugha ukuti shibaghile ukuba bunobuno?" ⁵⁵ Pa kabalilo kala u Yesu akachibula ichilundilo chila akati, "Ngimba mwisa pakungola na bopanga ningomo ngati po indi mwifi? ishikunishiku ingikalagha mu nyumba ya Chala nukumanyisha loli mutakangolagha nashiku. ⁵⁶ Lole fyoshi fififi fyabombiwa ukuti amasimbo ghakwanilishiwe.' Popapo abamanyili boshi bakamuleka nukukinda ⁵⁷ Abene lole bakamukola u Yesu bakabukagha nawe kwa kayafa, umuputi u songo, ko abamanya ndaghilo babayuda bakabungana. ⁵⁸ Lole u Peteli akamukonga pabutaliko mupaka akaya afika palupaso lwa nyumba ya muputi u songo, akingila mukati nukwikala pamupene nabo malonda ukuti akete namwo tighamalile amashu. ⁵⁹ Popapo abaputi abosongo na boshi bo bakakomana pamupene nukumulonda ubwo kaboni ubwabumiashi ukuti bamukomelele u Yesu . ⁶⁰ Lole batakabwagha nashiku, Pobule abokaboni babumiashi bakisa . pabumalilo bakisa abandu babili, ⁶¹ Bakati, ''Umundu uyu akayugha ukuti imenye ukuwisha inyumba ya Chala nukuyisenga sona amashiku matatu." ⁶² Umuputi u songo akimilila nukumubushikisha u Yesu akati, "Ngimba utakwamula nakamu koni ko bakukobela uwe?" ⁶³ Popapo u Yesu akabashe myiee Po umuputi u songo akamubulasona akati , "Mungamu ya Chala umwumi ngukubika mulufingo utubule nandi we kirisitu mwana wa Chala." ⁶⁴ umwene u Yesu akamula akati, "Wewe mwo wayughila, lole ngubabula umwe nguti ukwanda umusughu tise mumubone umwana wa mundu ikile kukakono akamwisa akamwene maka ghoshi, akwisa mumabingu gha kumwanya." ⁶⁵ Popapo umuputi usongo akanyapulania umuselekesha wake akayugha akati, "Agha gho mahelu! potukalitukubalonda baki abaketi? ⁶⁶ Keta apa mwaghapulikite amahelu; bule mukutiki umwe abene bakamula bakati, "Yo abaghile afwange." ⁶⁷ Popapo bakamufwinila amati kumaso, bakamukoma namafayiti, bamu bakamukoma namapi, ⁶⁸ bakati, "Uwe Mesiya, ulisolola ngimba wini yo akukoma namapi?" ⁶⁹ Po uPeteri akikala kuse palupaso; Popapo akisa yumo umubombi umulindu, Akayugha akati, "Nuwe wali pamupene nu Yesu uwakuGalileya." ⁷⁰ Umwene uPeteri akakana pamaso pa boshi akati, "Ndashimenye sho ukuyugha." ⁷¹ Umubombi uyungi akamubona bwo akafuma pamulyango, "Umundu uyu wepe ali pamupene nu Yesu uwa mukaya ka Nazaleti." ⁷² umwene uPeteri akamukana sona nukulapa akati, "Ndamumenye Umundu uyu!" ⁷³ Bwo pakindapo panandi, bo bakima palapala bakisa kwa Peteri bakati, "Shanaloli uwe we munine, keta ninjugha yako yikukulangisha pabwelu." ⁷⁴ Popapo uPeteri akanda ukwighuna nukulapa akati, "Ndamumenye Umundu uyu." Mwalubilo umukolwe akalila. ⁷⁵ Po uPeteri akakumbukila ishu lyo akayugha uYesu Po atingi, "Bwo umukolwe atalilite, tise ukane kwangu katatu," Po akafuma kuse akalila ngani.