¹ "Pakabalilo kala ubunyafyale bwa kumwanya to bukabe balindu teni, babo bakegha inyale shabo nu kubuka pakumushighilila umwene nyegha. ² Fayivi bakaba bakonyofu Sona fayivi bakaba ba mahala. ³ Abakonyofu bala bakegha inyale shabo, batakegha namafuta; ⁴ Lole aba mahala bala, bakegha inyale shabo namafuta gha palubafu musupa shabo. ⁵ Bwo akaba umwene nyegha ukwisa, abalindu bala bakands ukushombela nukughona utulo. ⁶ "Pabushiku pakati bakapulika ukukolela. ukuti, 'Umwene nyegha akwisa! fuma muyemumu shighilile.' ⁷ Popapo abalindu boshi bala, bakanyatuka bakakosha inyale shabo. ⁸ Abakonyofu bakati kubamahala, 'mutupekwo amafuta, pakuti inyale shitu shikushima.' ⁹ Abamahala bala, bakamula bakati, 'Nashiku, amafuta taghatuyane tweshi nashiku umwe nutwe' .Lole mubukaghe Kubo bakughulisha amafuta iye mwighulile mwibene'. ¹⁰ Pobakabukagha pakughula amafuta umweneyegha akisa. Pobo bakitendekesha, bakaya bingila nawe umweneyegha munyumba ya lusekelo lwa nyegha, kumulyango kukighuliwa. ¹¹ Panyuma abalindu fayivi abakonyofu bala bope bafika po bakati, 'Malafyale, malafyale, twighulilekwo!' ¹² Po umwenenyegha yula akamula akati, 'Naloli ngubabula nguti ndabamenye Nashiku.' ¹³ Po apa mube maso, pakuti mutakulimanya ishiku pamu akabalilo. ¹⁴ "Pakabalilo kala ubunyafyale bwa kumwanya tibukabe ngati mundu yo akaba pa ulendo bwa ku chisu chimo. Akabitisha ababombi bake nukubokolesha ichuma chake. ¹⁵ Yumo akamukolesha indalama ya matalenti fayivi, yumo babili, sona uyungi yumuywene. Akabakoleka boshi ukuyana namaka ghake. Po akabuka kuchisu ichingi. ¹⁶ Umubombi yo bakamupa amatalenti fayivi akabuka nagho, po sona akapanga nagho ichushi nukughaghaghilapo aghangi fayivi. ¹⁷ Popapo nayo akegha indalama Sha matalenti mabili wepe akaya aghaghilapo amatalenti aghangi mabili. ¹⁸ Lole umubombi yo akegha indalama ya matalenti yumuywene akaya ungila pasi nukufifa indalama ya bwana wake. ¹⁹ Bwo kakindapo akabalilo akatali ubwana wake babombi bala akisa, ukuti ikale pase nukubendela ichuma. ²⁰ Yo akegha indalama shila isha matalenti fayivi akisa sona nindalama shamatalenti aghangi fayivi Po akati, 'Bwana wangu, ukamba indalama Sha matalenti fayivi. Keta, ingongelekeshapo indalama ishamatalenti amanine Fayivi. ²¹ ubwana wake akati kukwake, 'Wabomba akisa wemubombi umwisa numusubiliwa. Wasubiliwa pa findu ifinandi, po tingubike Pamwanya pa findu ifyingi. Ingila mulusekelo lwa bwana wako.' ²² Yo akegha indalama Sha matalenti mabili wepe akisa sona akati, 'Bwana, ukangoleka indalama Sha matalenti mabili. Keta, apa ingongelekeshapo indalama Sha matalenti aghangi mabili.' ²³ Ubwana wake akati, 'Wabomba akisa we mubombi umwisa nu musubiliwa. Wasubiliwa pa findu ifinandi Po tingubike pamwanya pa findu ifyingi. Ingilagha mu lusekelo lwa bwana wako.' ²⁴ Yo akegha italenti yumuywene wepe akisa nukuti, 'Bwana, ingumanye ukuti we mupalapala nukuti ukufuna napo utakapesa, ukughobola namwo utakapesa. ²⁵ Pakuba nubwogha, ngabuka nuya pakufifa indalama Sha talenti wako pakukumbila pilongwi. Keta, ale ichuma chako ichi. ²⁶ Lole ubwana wake akamwamula akati, 'We mubombi umubibi numukata uwe! utamenye ukuti ngufuna napo ndaka pesa Sona ngughobola napo ndakabyalapo? ²⁷ Po ngali ukabikagha indalama syangu kubandu ba ku banki, Popapo lumo ngali nayaghilakwo niya pamwanya. ²⁸ Po mumupoke italenti uyo nukumupa yo ali nindalama sha matalenti teni. ²⁹ Papo weshi yo ali nafyo tise ongeleshiwepo ifyingi ngani. Lole yo atanafyo tise apokiwe nako alinako. ³⁰ Mumutaghe umubombi umusita mbombo uyu pase muchisi, mwotise mube ukukuta nu kusheketula amino. ³¹ "Nandi umwana wamundu akwisa mubushisha bwake nabandumi* boshi pamupene nawe, popapo tise ikale pa chitengo chabushisha bwake. ³² Uluko lwabandu boshi tise lubungane pandashi pake. Tise apaghulanie pabili ngati isamwa umutimi akapaghulila ing'oshi no mbushi. ³³ Ing'oshi tise ashibike kukakono kake akamwisa, sona imbushi tise ashibike kukakono kake akashomi. ³⁴ Popapo umalafyale tise ababule babo balikukakono kake akamwisa, "Isagha umwe uTata abasayite ukuti mupyanile ubunyafyale bubo bakabatendekesha ukufuma kokubwandilo bwa chisu. ³⁵ Pakuti po ngaba nisala, mukamba ichakulya, po ngaba niyota, mukamba amishi ngang'wa, po ngaba mugheni, mukanyambilila, ³⁶ Ngaba ngule, mukafwika. Ngaba mubine, mukisa mwangeta. Ngaba mujela, mukisa mwangeta. ³⁷ Popapo abelu tise bamule, ukuti, 'Malafyale, lighi lyo tukisa twakuketa po ukaba nisala, sona po tukakukupa ichakulya? pamu po ukaba ni nyota tukakupa amishi? ³⁸ Sona po tukakuketa ukaba mugheni, sona tukakwambilila munyumba shitu? Pamu ukaba ngule tukakupa ichakufwala? ³⁹ Lighi lyo ukaba mubine pamu ukaba mujele, tukisa twakuketa?' ⁴⁰ Umalafyale tise abamule ati, 'Naloli ngubabula nguti poshi po mukamubombela yumo wabakamu banandi aba bwo mukamubombela une.' ⁴¹ "Popapo umalafyale takababushe bo bali kukakono akashomi ukuti, 'Fumako kwangu mwe baghuniwa umwe, mubukaghe kumulilo uwa bwila na bwila gho bamutendekeshile usatano* nabandumi bake. ⁴² Bwo indi nisala mutakamba ichakulya nashiku, po ngaba ninyota mutakamba amishi nashiku. ⁴³ Po ngaba mugheni, mutakanyambilila nashiku. Po ngaba mubine napo ngaba mu jele, mutakisa mwangeta.' ⁴⁴ Po bope tise bati, 'Malafyale, lighi lyo tukakuketapo ukaba nisala, pamu po ukaba ninyota pamu po ukaba mugheni, pamu po ukaba ngule, pamu ukabina, pamu ukaba munjela, Po tutakakubombela nashiku?' ⁴⁵ Popapo umalafyale tise abamule nu kubabusha ukuti, 'Naloli ngubabula nguti poshi po mutakamubombela yumo uwa bakamu bangu abanandi aba, kokuti mutakamubombela Nene.' ⁴⁶ Abene bababa tise babukaghe kulufundo lwa bwila na bwila lole abagholofu bo tise babukaghe ku bwumi bwa bwila na bwila.