¹ ዬ ጋን ጊታይ ኣይኬ ኢየሱስ ክርስቶስ ጋኔኬን [ዻብሾ]፤ ² ናንዳካኦ ሕግካ መንፈስካ ዻቆ ከኢየሱስ ክርስቶስ ከኦካ ሕግካ ሴሶዬ ኣርሼኔ ቡላ እየው ነፃ። ³ ሕግ ከእን ናሹጝኬ ዴንታካ ኣሩጝ ዻቼ እን እን ማሬ ሙኔን ቻሊዬን፣ ባሪዮ ከውዋ ኔኒ ከሄክንሶካ ውርካ ሴሶ፣ ካኣዬ ጋላካ ሴሶጝ ከይዕሲዬን ሹዋጵሻ፤ ከሴሶጝዻ ከዻባሞካ ኣሩጝ፤ ⁴ ይንዻ ማርኬ ኣሩጜኔ ከእን ሃዋካ ጆልቴኬ መንፈሱጝ ከኡዋው፣ ጫንቃል እን ሕግ ኣንሺኖጝ ፓይላ ካሙኒንቴባዬ ጊያ። ⁵ ጊታይ ቆብኬ ኣሩጙጝ ሻምሼባ ሻን ጊዬይ ኦካ ኦግታይ ኣሩጝ ዎሾጝ፤ ዬ ጊታይ ቆብኬ መንፈሱጝ ሻምሼባ ሻን ጊዬይ ኦካ ኦግታይ መንፈስ ዎሾጝ። ⁶ ኦካ ኣሩጝ ቃቢዬን ሃኣርሼን፣ ዬ ኦካ መንፈስ ቃቢዬን ሃዻቆዬ ሹቃ ቆቤኔ። ⁷ ሹቦ እን ኣይካ ሴሶጝ ሃውርካ ጎሬንካ ባሪዮ፤ ሁሉኩሼኬን ሕግካ ባሪዮ፤ ቻሊኬን ኔኒ ማቲዬንዻ። ⁸ ጊታይ ቆብኬ ዋድማካ ኣሩጝዻ ቻሊኬን ባሪዮ ዋዝንሲዬን። ⁹ ዬ እየው፣ ሃኦኬና መንፈስካ ባሪዮ ኣኒኔ ኦጉዩያጝ፣ የማራኬ ኣሩጜኔ የኣያኬ መንፈስ። ውር ክየምጵንዻ ማራ መንፈስካ ክርስቶስ ኣኔንያጝ፣ እሺ ማርካ ክርስቶሴን። ¹⁰ ኣይባዬ ክርስቶስ ኣኔያ ኦጉዩ ቱዎጝያጝ፣ ሩዋ ጉዩ እን ናሹጝኬ ሴሶጝ ኣይኒን ኬና ኣርሹጝ፣ መንፈስ ጉዩ እን ናሹጝኬ ጫንቃሉጝ ሃእያይ። ¹¹ እን ቲት ኢየሱስ ከኣርሼን ክያኑጝ መንፈስ ኔኒ ሃኦኬና ኣኔ ከእየውያጝ፣ እን ቲት ክርስቶስ ከኣርሼን ክያኑጝ፣ እን ኣኔን ኦጉዩ ቱዎጝ ከመንፈስ ኔኒ ከሩዋ እን ንጉዩ ኣይ ኣርሹጉጝ ኣይባ ዻቆ። ¹² ዬ ጪኒጌን ናኒ ዮ፤ ሃኣንቴ ጊዳሞ፤ ካኣይባዬ ካቆብቴ ኬካ ኣሩጙጝ ሃማራካ ኣሩጜን። ¹³ የቆባያ ኬካ ኣሩጝያጝ የኣርሻባዬ፤ ዬ የኒሻያ ኦይን ኣይ ጋራ ዋድማካ ኣሩጝ ከመንፈስያጝ፣ የቆባባ ከዻቆ፤ ¹⁴ ጊታይ ቆቢኬ መንፈስካ ባሪዮጝ እንግን ጋይ ሃንታካ ባሪዮዬ። ¹⁵ ፕር እንቃ ማር መንፈስ እንካ ሻም እየው ካህሲካ ሪግዬኔ፣ እን የሺጝቴ «ኣባ፣ ባባዬ» የሺውቶጝ የቦዋያ መንፈስካ ውዋ ኔኒ ማቲዬኔ፤ ¹⁶ ሃኣይቴ ሃንታካ ባሪዮጝ መንፈስ እን ኣይኬ መንፈስ ጉዋዩዬ ማኚሼባ ኡዋው። ¹⁷ ሃኣያ ሃንታ ኔኒያጝ ፕር ሃኣያ ጊታኬናካ ሻው፤ ካኣይቴ ጊታኬናካ ካሺምንቴ ጎቢንታ ኔኑጝ ከኣኩሉክ ሃኣያያ ጊታኬናካ ካሺምንቴ ጋሎ ኔኒያጝ፣ ጊታይካ ሻው ሃምካ ባሪዮ፣ ሃኣያኬ ክርስቶሴ ሃኣያ ጊታኬናካ ሻው። {ጎቢንታ እንካ ኩዋው} ¹⁸ ከቦን እንካ ጋኑጝ ከታካ ሌሜን ዹዋልሼና ጋሎ ጉዋዩያጝ ሄክንሲያ ከጎቢንታ እን ቦሼ ኡዋውያጝ ሃኮምሼ ከእያይ ማሬኬ ኦኬ ኣዬኑጝ። ¹⁹ ኦግታይ ሙኔ ፓይላ ካዹዋልሺኔ ሃንታካ ባሪዮጝ ጋኔን ፎሽካዽዬ ካሊዬን። ²⁰ ኦግታይ ሙኔ ፓይላ ሻማ ከኦካ ማም፤ ይንዻ ማርኬ [ምርጫ ኔኒዬኔ]፣ ካኣይካ ቃቦ ኔኒዬ ከእን ሻሞጝ ሃኬ እን ናሹጝኬ ክያጃ ኔኑጝ። ²¹ ይንዻ ኦግታይ ሙኖጝ ከኦካ ካህሳሞካ ጫፒዬን ቱል ነፃዬ ከሃም ኣይካ ሃንታካ ባሪዮጝ ካሄክሽ ሃምካ ነጻነት እን ጎቢዬዬ ጊያ። ²² ሌይ ኣይ ጋኑጝ ኦግታይ ሙኖጝ ፓይላ ኬካ ጋሎ እን ኣይካ ሹካ እሲማጝ ካጌይኔ [ጋሎ] ክያኑጝ ሃባጃያ። ²³ ማር እን ጵኔኔ፣ ከሌሜን ካርቡካ መንፈስ ካጌዬ ኡዋዌ ኡዋው ኤታጋን እን ኣይ [ቤዛካ] ሩዋ ጉዋዩጝ ሃንታ ኔኒ ኣዬን ጉዋዩ ሃካሊና ከፎሽካዽዬኔ ከቱዎጝ ጉዋዩ [ሃጋሊያባ]። ²⁴ ሃባይሻያ ከቃቦጝ፤ ዬ ቃቦ ኔኒ ሃኦኬና ጌይኔያጝ ማር ቃቦዬን፤ ሃኒን ካሻም ቃቦ እንካ ጌይንቶጝ? ²⁵ ኣይባዬ ሃሻማያ ቃቦ እን ካኒ ማር ጌይኔንያጝ፣ ሃካሊያባ ከዶንሺዬን። ²⁶ ፕርዻ መንፈስ ኬልሺ ኡዋውባ ከኦካ ዻቾ ጉዋዩ፤ ካሁሉኩሻ ኡዋው ይሁኔን ኬና ኣኔን እያኑጝ ሃእባጃኬን፤ ዬ መንፈስ ዹዋልሼና ከክያጃንያጝ [ካመቃተት] እን ማሬ ቻሊዬን ሉፑሼባ ኡዋው። ²⁷ እንካ ቶይ ሻን ጉዋዩዻ እሺ እባጅባ ቃቦካ መንፈስ፤ ናንዳካ መንፈስ ኬካ ክያጃካ ባሪዮ ሉፑሼባ ውር ጊታይካ ይሁኔኔ። {ከኦካ ሳጋን ዼግ ኣዬን} ²⁸ ባሪዮ፣ ናንዳካ ጊታይ ናሺዬ ሺወ ኬካ ቃቦ ኔኒዬ፣ ኦኬ ፓይላ ጎም ጋጜ ካጋሽክዬ ናንዳካ ሹቃጝ ካሻምሼ እንግኑጝ ሃባጃያ። ²⁹ ባሪዮ እን ሌምሼ እባጆጝ ካሙኒኔ ዴንታካ ውዋጝ ሌምሼ ቱምያ፤ ይንዻ ከኦካ ጫቃንካ ጪኒጌን ጁዋናን እሺ ካኣይ ቶይዲዬ ጊያ። ³⁰ ሺዋ ጊታይ ሌምሼ ቱምዬዻ፤ ሻማ ጊታይ ሺወዻ ጫንቃል፤ ጊታይ ሻሜ ጫንቃልዻ ጎቢያ። ³¹ ኣኪ ናንዳካ ይጝ ሃሺጛ ኦ? ባሪዮ ሃኦኬና ኣዬኬ ኡዋውያጝ፣ ሃኒን ካቻሊ ኡዋው ኖክዬኑጝ? ³² እን ማሬኬ ውዋ ኔኒ ዻዹጝኔን፣ ኣይባዬ እን ሳስክዬ ኣዬ ኡዋው ፓይላጝ እሺ፣ ኦኬ ፓይላካ ሃኦ ካማሬኬ ከእሺ ክየምጵን ኣዬኑጝ? ³³ ሃኒን ካካሲሲ ጊታይ ባሪዮ እድዮጝ? ካሻም ጫንቃሉጝ ሃባሪዮ፤ ³⁴ ኣኪ ሃኒን ካዻቢሺ? እን ኣርሹጝ፣ ፕርዻ እን ናሹጝኬ ኣርሼን ክያኑጝ፣ ኢየሱስ ክርስቶስ እን ኡፊ ኦካ ሹኔ ቡዎኑጝ፣ ሉፑሼባ ናንዳካ ኡዋው። ³⁵ ከኦካ ናሺማካ ክርስቶስ ሃኒን ካሻም ኡዋው ዋናጝ? ሃኦኬ ጋራ ሞ ጋሎ፣ ሞ ዋክኔን፣ ሞ ካሽ፣ ሞ ቡንዱርቆ ኣዬን፣ ሞ ኦኬ ጋራ ክያኒ ሻወን፣ ሞ ኤቤል? ³⁶ ይንዻ፣ ናንዳካ እን ሹ ፓይላ ሃዳርጊያባ ከኣርሼን፤ «ከእያይ ሺጜ ኮማ ኡዋው ከማድርካ ኒቄኔ ቶኮጝ። ³⁷ ኦኬ ክየምጵንዻ ኬና ሻም ኡዋው ዋና ኣኔኬን፤ ከይን ፓይላ ከእን ናሺ ኡዋው ከእሺ ከኦካ ሳጋን ሃኣይባ ሳጊ። ³⁸ ሃእባጅያ ይጝ፤ ካኣይባ ኣርሼንዻ ካኣይባ ዻቆዻ፣ ካኣይባ ውርካ ኤርጎዻ ካኣይባ ቤሮዻ፣ ካኣይባ እን ኣኔዻ ካኣይባ እንካ ኩዋውዻ፣ ወይ ኣይኒን ቁዋቅቲ ኬና ኣኔን እያኑጝ፣ ³⁹ ካኣይባ ኦዼግዻ ካኣይባ ኦቱሌዻ፣ ወይ ኣይንኒን ኦግታይ ሙኖጝ ጊታይ ኣይኬ ኢየሱስ ክርስቶስ ታቺ እን ጉዋዩጝ ቻሊኬን ኡዋው ከኦካ ናሺማካ ባሪዮ ዋና ሻሜን።