¹ ጪኒጌን ናኒዮ፤ ሃሜይሼባ ውር ጊታይ እባጅ ሕጉጝ፤ ሕግ ከኦካ ውር ክየም ካኣኔ ጌጳሞጝ፣ ኣዬ ሌይ ሃም ውር እን ኡፌኬ ዻቆጵን የእባጃኬኒ? ² ኚያጝ ክየም ካጝ እያኒሼኑጝ ከኡማ ከሕግ ካቁምኖጝ ሃሓም እሺ ሌይ ካኡፌኬ ዻቆጝ፤ ዬ ኡማ ኣርሻያጝ ከኦካ ሕግካ እያኒሽ ማቲባ ነፃ። ³ ኣይባዬ ካኒ ኡማ ኡፓ ከዻቆዬ እያኒሼና ከጁሙ እንቃያጝ ሺጝባ ኩጳሞ፤ ዬ ኡማ ኣርሻያጝ እያኒሺኒን ከጁሙ እንቃጝ፣ ከኦካ ሕግ እን ኣይባ ነፃ፤ ዋይሼኬን እሺ ኩጳሲዬና። ⁴ ዬ ጪኒጌን ናኒ ዮ፤ እየውዻ ከኣሩጝካ ክርስቶስ የኣርሻያ ናንዳካ ሕግ፤ ይንዻ ናንዳካ እንቃ፣ ናንዳካ እን ናሹጝኬ ኣርሼን ክያኑጝ የማቲያ ኔኒዬ [ሃእን ከኡፉትሽቴ ባሪዮ ካርቡጝ]። ⁵ ሃኣኒናባ ኦካ [ዶያካ] ሴሶ እን ሙኔዬ፣ [ካኡፉቲቴ ኣርሼን ካርቡጝ] ዎሼንካ ሴሶ እን ጬይሼኬ ሕጉጝ ኣኔን ኦካ ኣሩጝ ጉዋዩ ኣሽክዬን። ⁶ [ዬ ጋን እባ ከሌሜን ሃቁምንቴኬ እሹጝ ናንዳካጝ ሃኣርሽቶጝ]፣ ሃቱላያ ከኦካ ሕግ ነፃ፤ ይንዻ ማርኬ ሕግ ጌቾባ ቶኬዬኔ፣ ከጉዋርካ መንፈስ እን ኣይ ሃሉጝ ካዋድምባዬ ጊያ። {ከሴሶ ዳርጊኔን} ⁷ ኣኪ ሃሺጛ ኦ? ሕግዻ ሃሴሶይ? ክየምጵንዻ ኣይኬን፤ ኣይባዬ ማራ ከታካ ሕግ ኣዬንያጝ፣ ዋቲ ሴሶ ኣዬ ኦጝ ሃማራያ እባጄን፤ ዋቲ ሕግ ማራ ኦይ ኣንግርዺዬንያጝ፣ ዋቲ ኣንግርማ ኣዬ ኦጝ ከኣኩሉክ ሃእባጃኬን። ⁸ ዬ ሴሶ ኤርጎ ኔኒ ከባሊ እን ጌይሾጝ ጠቅምኔዬ ቲትሻ ከኦናኒ ኣርግማ ፓይላ ካሎን፤ ሴሶ ማራ ሕግ ኣኔንያጝ ሃኬና ኣርሺዬ። ⁹ ሕግዻ ማርባ ኣኔኔ ሃእያይ፤ ዬ ኤርጎ ኩኖጝ ጩዋ፣ ሴሶ ማቲያ እያይ፤ ኣንዻ ሃኣርሺያ። ¹⁰ ካኣይካ ዳቆዬ ኤርጎ እን ቃቢዬዻጝ ቦኩኔ ኣርሼኑጝ እባጅባ፤ ¹¹ ሴሶ ከኦካ ባሊ እን ጌዬኬ ኦካ ኤርጎጝ ከጠቅምዬን ቱዋና ኣን፤ ኒሻ ኣን ከኤርጎዻ። ¹² ዬ ሕግ ኬታይ ኔኒዻ ሃቅዱስ፤ ኤርጎዻ ሃቅዱሴ፣ ጫንቃሌ ሹቃዬ። ¹³ ኣኪ ኦይን ኣይ ሹቃጝ ማቲሼያይ ኣን ኣርሼን? ክየምጵንዻ ኣይኬን፤ ኣይባዬ ሴሶ ከሴሶ ኣዬን ኔኒ ካጊባጆጝ ከታካ ኦይን ኣይ ሹቃጝ ቦሼያ ኣን ኣርሼን፤ ይንዻ ሴሶ ከታካ ኤርጎ ካጁዋንቲሼ ኡዋውጝ ካኣይ ሴሶዬ ጊያ። ¹⁴ ሕግዻ ኣዬካ መንፈሱጝ ሃእባጃያ፤ ዬ ኣን ሃኣይ ውርካ ኣሩጝ እን ጉዋሩጙሼ ኬካህሲ ናንዳካ ሴሶጝ። ¹⁵ ሃእባጅኬን ኦይካ ኣሽክዮጝ፤ ሃኣሽኪኬን ኦይን ሃዎሼካ ኣሽክዬኑጝ፤ ኣይባዬ ሃኣሽኪባ እን ሃሚኖጝ። ¹⁶ ሃኦኬና ሃኣሽክዬ ኦይን ሃዎሼ ኣሽክዬንያጝ፣ ሕግ ኣዬ ኦኬ ሹቃጝ ሃማኚሺባ፤ ¹⁷ ኣያ እያይንያጝ፣ እን ኣሽኪ እኑጝ ማር ኣን ኣዬኔ፣ ሃሴሶ እን ኣኔን ኦናኒ ቱዎጝ። ¹⁸ ከኣን፣ ወይዻ ኦይን ናኒ ሙኔዬ ኣይካ ሴሶጝ ቱዎጝ ኦኬ ሹቃ ማሬ ኣኔኑጝ ሃእባጅያ፤ ኦይን ኣይ ሹቃ ኣሽክዬን ሃኣኔ ኣርግማ፤ ኣይባዬ ካሙኖጝ ሃቻሊኬን። ¹⁹ እንካ ኣሽክዮጝ ማር ኦኬ ሹቃ እን ሃዎሼ ኣሽክዬኔን፤ ኣይባዬ እን ሃዎሼ ኣሽክዬን ሃኦኬ ጋራ። ²⁰ እንካ ኣሽክዮጝ ማራ ኦይን ሃዎሼ ኣዬንያጝ፣ ኣሽኪ እን ማር ኣኔኔ፣ ካኣሽኪ ሃሴሶ እን ኣኔን ኦናኒ ቱዎጝ። ²¹ ዬ ሕግ ይጝ ኣኒኔ ኣሽክዬኑጝ ሃእባጅያ፤ ይንዻ ሃዎሽያ ኦኬ ሹቃ ኣሽክዬንያጝ፣ ኦኬ ጋራ ኣኔባ ከኣን። ²² ኬሸን ናኒ ቱዎጝ ከሕግካ ባሪዮ ሃዋዝንዺባ፤ ²³ ኣይባዬ ከኦካ ሩዋ ናኒ ቱዎጝ ናንዳካ ሴሶ ጊታይ ሃኣሽክዮጝ ሕግ ከኣን ውርካ ቁሜን ሻሜን፣ እን ባል ጋግ ከሕግ እንካ ሹቦ ናኑጝ ሕግ እንቃ ኣሽክዬን ኦካ ሩዋ ናኒ ቱዎጜ ሃጌይባ። ²⁴ ኣን ሃይ ውርካ ጋሎ ኬና ኣይ እያን/ ከኦካ ሩዋጝ ናኒ ጋይኔ ናንዳካ ኣርሼኑጝ ሃኒን ካቻሊ ኣን ዳዓሺዬኑጝ? ²⁵ ከታካ ኢየሱስ ክርስቶስ ታቺ እን ጉዋዩጝ ጎሺ ካኣይካ ባሪዮ። ኣኪ ኣን ከሹቦ ናኒ ናንዳካ ሕግካ ባሪዮ ሃማቲያ ካህሲያጝ፣ ዬ ከሩዋ እን ናኒ ሙኔካ ሴሶግጝ ናንዳካ ሕግካ ሴሶ ሃኣይ ካህሲ።