¹ ኣኪ ሃሺጛ ኦ? ኣይኔን ካጁዋትሼ ኡዋው ካኣሽክዬን ሴሶዬ ካቆቢባይ? ² ክየምጵንዻ ማር እያይኔን፤ ሃኣርሻያ ናንዳካ ሴሶ፤ ኣኪ ሃሻማያ እያን ካርሲኬ ጋኔ ካቆብቴኬ እሹጝ? ³ ካኣይቴኬ ኢየሱስ ክርስቶስ ክየሙጝ ሃዱቅይንቶጝ፣ ከኣርሼን ክያንዻ ካኣይቴ ክየሙጝ ሃዱቅይንቶጝ የካኔ እባጃኬኒ? ⁴ ዬ ክርስቶስ ከጎቢንታካ ሹኔ ከእያይ ናሹጜ ከኣርሼን ክያኑጝ፣ ኡዋውዻ ካቆብቴ እያይ ከዻቆ ሃሉጝ ከዱቅኔን ሃኣርሻዬ ቱቱካ ኡዋው ከጋጝ። ⁵ ከኣርሼን ሃኣያያ እያይ ከጋጝያጝ፣ ፕር ከናሹጜንዻ ከኣኩሉክ ሃኣያባ ከጋጝ። ⁶ ካርሲኬ ጋኔ ካማርቴ ካህሲካ ሴሶ ኣዬኑጝ፣ ካጎይዴ ሩዋ እንካ ሴሶጝ ውር ጌቹዋን ከእያይ ፃጵዬ ከእሹጝ ሃእባጃያ፤ ⁷ ናንዳካኦ እን ኣርሹጝ ቱላ ከኦካ ሴሶ ነፃ። ⁸ ሃኦኬና ሃኣርቴኬ ክርስቶስያጝ፣ ካቆብቴኬ እሹጝ ሃኣምኒያባ። ⁹ ክርስቶስ ናሹጛ ከኣርሼን ክያኒዬ፣ ካማሬ እንቃ ኣርሼኑጝ ሃእባጃያዬ፤ ኣርሼን ካርሲኬ ጋኔ ኣይሼኬን ካንታ ኦኔኒ። ¹⁰ ከሹካ ኣርሼን፣ ናንዳካ ሹ ክየሜ ቱንሲዬ ኣርሻ ናንዳካ ሴሶ፤ ኣይባዬ ከዻቆ ኡፌን ኔኒ ኡፓ ናንዳካ ባሪዮ። ¹¹ ከእያይ የኣርቴኬ ሴሶ እያጙጝ፣ ኣይባዬ ከኢየሱስ ክርስቶስ ናንዳካ ባሪዮ ከኣይቴ እያይኔ ከቆብቶጝ ኮምባ እየው ኤታጋን። ¹² ዬ ዎሺኔን ጋራጝ ከሹዋጵሽቶጝ ከኦካ ኣሩጝ ኣርሹጉ እን ጉዩጝ ካጌጳሲዬ ሴሶጝ ኣይዲ ሻምቴን። ¹³ ሩዋ ጉዩ ኦይድካ ኦኬ ጋራ ሻሜ ናንዳካ ሴሶ ቦፓይንቴን፤ ሳጊዻ ሻምኬ ውር ጊታይ ከኦካ ኣርሼን ቁዋልሼን ሃምካ ዻቆዬ ቦቴ እየው ኤታጋን ባሪዮ፤ ሩዋ ጉዩ ሻም ኦካ ጫንቃሌ ቦቴባ ባሪዮ። ¹⁴ ከኦካ ኣይኔን ዱቡ ዬ ናንዳካጝ የማርቴኬ ኦካ ሕግ ዱቡ ኣዬኑጝ፣ ሴሶ ኡዋሩጝኬን እየወ። {ካህሲ ጊታይካ ጫንቃሉጝ} ¹⁵ ኣኪ ካኣይ ኦ? ማርኬ ኦካ ሕግ ዱቡ ኣዬኔ፣ ከኦካ ኣይኔን ዱቡ ኣዬን ጉዋዩ ካኣሽኪ ሴሶይ? ክየምጵንዻ ሁሉኩሼኬን/ ¹⁶ የሻማ እየው ኤታጋን ከካህሲዬ የፓይናያጝ፣ ከዋይሺቶጝ ሃናንዳካ እሺ፣ ይንዻ ሃምካ ጉዋር እንካ ቦሼ ሃምካ ኣርሼን ናንዳካ ሴሶ ወይ ናንዳካ እንካ ሄክሺሼ ሃምካ ጫንቃል ናንዳካ ዋይሺኔን የኣይቴ ካህሱጝ የእባጃኬኒ? ¹⁷ ኣይባዬ ኣይኒን ጊታይ ኣይ ካህሲካ ሴሶጝ፣ ከእርሮ እን ጋዬ እየው የኣይቴ ጊታይ ዋይሼን ኬሸን ጋዛጝ፣ ባሪዮ ካኣይ ኬናካ ጎሺዬ፤ ¹⁸ ቱልኬ ኦካ ሴሶ ነፃዬ፣ የማቲያያ ካህሲካ ጫንቃል። ¹⁹ ከሙኒኔንዻ ናንዳካጝ የኣይቴ ዻቹጉጝ፣ ከቶካ ውር ሃክያጅባ ይዕጝ፤ ሩዋ ጉዩ ከካህሳሞ ናንዳካ ሴሶ ናንዳካ ኦኬ ጋራ እን ጁዋንቲሼ ኩይዬ የቦፓይንቶጝ፣ ፕር ጋን ሻም ካህሲ ጫንቃል እንካ ቦሼ ሃምካ ይሁኔኔ ቦፓይንቴባ። ²⁰ የኣያባ ካህሲካ ሴሶዬ ከጫንቃል የኣያ ነፃ። ²¹ ጋን ከኦካ ኦግታይ የፑኡሺቶጝ ከሹ እን የጌያ ኦኬና ኣይ እያን? [ውጤትካ] ኦይን ሃኣርሼን። ²² ዬ ጋን የቱላ ከኦካ ሴሶ ነፃዬ የማቲያያ ውርካ ዋድማካ ባሪዮ፤ ከኦካ ኦግታይ የፑኡሺቴዻ እያኒሼ እየውባ ሃምካ ይሁኔን፤ ቱንሲ ኔኒዻ ሃዻቆካ ቦን ጮል። ²³ [ዳሙስካ] ሴሶ ሃኣርሼኔ፤ ዬ ኣይኔንካ ባሪዮ ከኢየሱስ ክርስቶስ ታቺ እን ጉዋዩጝ