¹ ኣኪ ናንዳካጝ ሃጌይቴኬ እምነት ጫንቃሉጝ፣ ከዻርካ ኢየሱስ ክርስቶስ ታቺ እን ጉዋዩጝ ከባሪዮ ሃኣንቴ ሆፎ። ² ከዻሪ ኔኒዻ ጋን ከኣይኔን ይጝ ሃጎርቶጝ ሃቻሊያያ ከእምነት ሻወን፤ ከጎብንታካ ባሪዮዻ ቃቦ ሻሜን ሃማባ ዋዛ። ³ ማርኬ ይጝጵኔኔ ከኦካ ጋሎ ጉዋዩዻ ሃሻማባ ዋዛ፤ ናንዳካ ኦ ጋሎ ካጌይሼ ኦኬ ዶንሺዬኑጝ ሃእባጃያ። ⁴ ኦኬ ዶንሺዬን ቁዋቅቲ፣ ቁዋቅቲ ዴንታ እን ፓታኒዮጝ፣ ዴንታ እን ፓታኒዮጝ ቃቦ፤ ⁵ ቃቦ እንዻ ሻምሼኬን ኡዋው ናንዳካ ኡሲ ቦወን፤ ባሪዮ ከመንፈስ ቅዱስ እን ኣዬ ኡዋው እሪሻ ናሺማ ኔኒ ኦካ ሻን ጉዋዩ። ⁶ ካኒ ሃኣያባ ዻቹጉዬ፣ ሌይ ሹ ኔኒ ሄክሾጝ፣ ክርስቶስ ኣርሻ ናንዳካ ውርካ ሴሶዬ። ⁷ ውር እን ኣርሺ ናንዳካ ጫንቃሉጝ ጌዬን ካሎን ሻምሽባ ውር ሹቃ፤ እን ሺጚ ናንዳካ ውር ሹቃዬ ዎሽ ኣርሼኑጝ ካካጌዩጝ። ⁸ ኣይባዬ ካኒ ሃኣያባ ውርካ ሴሶዬ ክርስቶስ ኣርሻ ናንዳካ ኡዋው፤ ይንዻ ባሪዮ ዹዋልሼን ናሺማ እን ኔኒ ኣኔንኬ ኡዋው። ⁹ ጋን ሻማ ኡዋው ከኒያቡ ጫንቃልያጝ፣ ሳጊዻ ከዻር ኔኒ ሃማራ እያን ከኦካ ቁጣካ ባሪዮ ባይሼን/ ¹⁰ ሃኣያባ ውርካ ጎሬንካ ባሪዮዬ ከኣርሼንካ ውዋ ሃቃሺምናያ ከእሺያጝ፣ ሃጌያያ ቃሽያጝ ጩዋ፣ ከዻቆ ባይሼን ጉዋዩ ማር እያን ሳጊ ኣዬን/ ¹¹ ማር ይንጵኔን። ኣይባዬ ጋን ሃጌይቴ ቃሹጝ ከዻርካ ኢየሱስ ክርስቶስ ታቺ እን ጉዋዩጝ ፕር ከባሪዮ ሃሻማባ ዋዛ። {ኣርሼን ሃኬ ኣዳም፣ ዻቆ ሃኬ ክርስቶስ} ¹² ዬ ሴሶ ከታካ ውር ክየም ከእያይ ሁሉኬ ፔን ክያኒ ፓይላጝ፣ ኣርሼንዻ ሁሉካ ከታካ ሴሶ፤ ከጉዋር ኬና ኣይ እያይንዻ ኣርሼን ኩና ኦካ ውር ፓይላ፤ ናንዳካ ኦ ውር ፓይላ ኣሽክያ ሴሶ፤ ¹³ ከሌሜንካ እን ጋይኔ ሕጉጝ ሴሶ ኣኔን ፔን ክያኒ፤ ኣይባዬ ኦይን ሕግ ማሬ ኣኔኑጝ ኮምኬን ሴሶ። ¹⁴ ካኣይባዬ ቦኬ ኣዳሜ ሌይ ኣይ ሙሶጝ ጊታይ ኣኖጝ፤ ኬካ ኣዳም ከሕግ ሚኔን ኣይን ኦካ ጊታይ ማር ሴሶ ኣሽክዬንዻ ኣርሼን ጌጳዺያ፤ ከጊታይ ኣዳም ኩኖጝ ኣንሼን ሙኒኔን። ¹⁵ ኣይባዬ ኣይኔን ኔኒ ማርኬ እያይካ ሴሶዬን፤ ከኦኬ ሳስክዬንካ ውር ክየም ውር ጁዋናን ኣርሽያጝ፣ ኣይኔንካ ባሪዮዬ ከውር ክየም ይንዻ ከኣይኔን እን ኩንኬ ኣይኔንካ ኢየሱስ ክርስቶሱጝ ሻም እያን ካሳጊሲዬዬ ካሺዕሺዮጝ/ ¹⁶ ፕርዻ ኣይኔንካ ባሪዮ ማርኬ ውጤትካ ሴሶካ ውር ክየም እኔን፤ ናንዳካ ኦ ኮምሼን ዻዬ ሴሶካ ውር ክየሜ ቦኩኔያ [ኩነኔ]፤ ዬ ኣይኔን ኔኒ ዻዬ ሳስክዬን ታቺዬ ቦኩኔያ ጫንቃል። ¹⁷ ናንዳካ ሴሶካ ውር ክየም ኣርሼን ሃኦኬና ጌጳዺዬ ከውር ይጝያጝ፣ ጊታይ ቦው ኣይኔንካ ባሪዮ እንካ ሺዺዬ ኣይኔን እን ኣይ ጫንቃሌ፣ ከውር ክየም እን ከታካ ኢየሱስ ክርስቶስ ሻም እያን ሳጊሲዬ ካማሬኬ ዻቆ ጌጳዺዬኑጝ/ ¹⁸ ኣኪ ናንዳካ እን ናሹጝኬ ሴሶካ ውር ክየም ዻባሞ ኩኔ ኦካ ውር ፓይላጝ፣ ፕርዻ ከክየም እን ዋድማካ ጫንቃል ናንዳካ ውር ፓይላ ኣይኔ ዻቆጝ ጌያ። ¹⁹ ከናንዳካ ውር ክየም እን ማር ዋይሺኔኑጝ ውር ጁዋናን ኣዬ ውርካ ሴሶጝ፣ ፕር ከዋይሺኔንካ ውር ክየም እኑጝ ውር ጁዋናን ማቲባ ጫንቃል። ²⁰ ከእን ሕግ ኩኖጝ ሴሶ ጁዋኒቲሻ፤ ኣይባዬ ከኦይን ሴሶ ቋቆጝ ኣይኔን ሳጊሲዬ ማቲያ ኬናካ ሺዺ፤ ²¹ ይንዻ ኣዮጝ ሴሶ ከእያይ ጌጳዺዬ ከኣርሼን ፓይላ፣ ከታካ ኢየሱስ ክርስቶስ ፕር ካጌዬ ዻቆካ ቦን ጮሉጝ ሃእን ኣይኔን ካጌጳዽዬ ከጫንቃሉጝ።