¹ ኣኪ ከኣሩጝ እን ኣይ ሹኔ ጉዋዩ ባካ ሌሜን ኣብርሃም ከዳቡጝ ሃሺጛ ጌይ ኦ? ² ዋንቲ ኣብርሃም ጌያ ከዋድማ ጫንቃልያጝ፣ ኣኔ ኦይንካ ቃይዮጝ፤ ኣይባዬ ቻሊኬን ከኦካ ሌሜንካ ባሪዮ ቃይዬን። ³ ወርቀት ሺጝ እያን? «ኣብርሃም ኣምኒያ ባሪዮ፤ ማቲ ጫንቃልዻዬ ኮማ። ⁴ ውር ክየም ኣሽክያ ዋድማያጝ እንካ ካሺሼ እሺ ማርኬ ኣይኔኔ ኮምሼ እሺባ ከዋጋ እንካ ሁሉኩሾጝ። ⁵ ኣይባዬ ናንዳካ እን ማር ኣሽክዬን፣ ውር እንካ ሴሶጝ ከሹ እን ሻሜ ጫንቃሉጝ ከውር እን ኣምኒኬ ባሪዮጝ፣ እምነት ኔኒ ማቲ ጫንቃሌ ኮምሼባ። ⁶ ዳዊትዻ ውር እን ኣኔ ዋድማ ጫንቃሌ ኮምሾጝ ጫንቃል ኣዬን ኔኒ ሺጛ እያጝ፤ ⁷ ጊታይ ዋይሼ ሳጊዬ ጆሌን ጊዬይ ካሺዺባጝ፣ ጊታይ ሺዕሺሼ ሴሶ ጊዬይዻ፣ ጋይ ጫንቃል። ⁸ ውር እን ታቺ እን ማርሼ ሴሶ ኔኒ ክየምጵንዻ ኮምሼኑጝ ሃጫንቃል። ⁹ ጫንቃል ይጝ ሃኬ ውር ጊታይ ቆሬጵን ሞ ከኦካ ውር ጊታይ ማሬ ቆሬንዻ? እምነትካ ኣብርሃም ሺጝሺያ ኡዋው ማቲ ጫንቃሌ ኮማ። ¹⁰ ኣኪ ሻም እያን ኮሞጝ? ቆሬ ጊያሞ ከሌሜንካ ቆሬን? ኮምሾጝ ማር ኦይን ቆሬ እሺዬኔ ሃኬ ሌሜንካ እን ማሬ እሺ ቆሬኑጝ። ¹¹ ካኒ ቆርኬኔ እምነት እን ኣኖጝ ጫንቃል ጌዬን እን ጌዮጝ፣ ዹዋልሺኔንካ ቆርኔንዻ ሃኣጝ ቦዋ ማኅታምካ ውር ጫንቃላን፤ ዬ ከኦይን ጋምኒዮጝ ኣይባዬ ጊታይ ማሬ ቆሬኑጝ ካኮምሼ እንግን ጫንቃሉጝ ሃሹኔኬካ ፓይላ። ¹² እሺ ሃሹኔካ ጊታይ ቆሬዻ፤ ማር ቆርኔንጵኔኔ፤ ሹኔ ጉዋዩ ኣብርሃም ከሌሜንካ ቆርኔን ዎሽባ እምነት እን ኣኖጝ ሃጊታይ ፓይላ ዻይሾጝ። ¹³ እሺ ካኣዬ ውር ኬናካ ሆርምንቴ ፔኑጝ ኣብርሃሜ ቢዛ ኔኒዬ ቦወ ቃቦጝ ማርኬ ታካ ሕጌን፤ ኣይባዬ ሃኬ እምነት እን ኣይኬ ጫንቃሉጝ። ¹⁴ ማቲያ ውርካ ሮጉምኔን ጊታይ ኣይኬ ሕግያጝ፣ እምነት ሃኬና ማር ጠቅምዬን፣ ቃቦዻ ዋቲ ሃማም እያይ፤ ¹⁵ ቦኩኔባ ቁጣካ ሕግ፤ ዬ ከኦይን ሕግ ማሬ ኣኔኑጝ ሳስክዬን ኣኔኬን። ¹⁶ ዬ ቃቦ ኩና ከእምነት፤ ቃቦ እንዻ ካኣዬኬ ኣይኔኔ ናንዳካ ቢዛካ ኣብርሃም ፓይላ ካኣዬ ዋስትናጝ፤ ይንዻ ከሕግ ካማር ጊታይካ ኣይ ኔኒጵኔ፤ ከእምነት ሃካ ጊታይ ኣይካ ኣብርሃም፤ እሺዻ ሃሹኔካ ኡዋው ፓይላ፤ ¹⁷ ይንዻ ሃኬ እያይ ሺጜ ሃሻሚ እን ሹኔካ ጁዋናኔ ቶኮጝ፤ እሺዻ ናንዳካ ጊታይ ኣርሹጝ ከሹካጝ ኣዬ ዻቆጝ፣ ጊታይ ማር ኣኔንዻ ከእያይ ኣኖጝ ከሹካጝ ሻሞጝ፣ ከኦካ ሌሜንካ ኣምላክ እን ሃኣምኒቶጝ ሃሹኔ ጉዋዩ። ¹⁸ ቢዛ ኑኑዻ ማቲባ እያጝ ከእያይ ሺጜ እያይኔ ሜይሼ እሹጝ፣ ከኦይን ቃቦ ማሬ ኣኔኑጝ፣ ኣብርሃም ኣምኒኬ ቃቦዬ ማቲያ ሹኔካ ዛርሲ ጁዋኑ። ¹⁹ እሺ ኣይባ ውር ኬና ቦን ኣይ ዽቤ ኣኔባዬ፣ ኣይኔን ሩዋ ኔኑጝ ኣይኒን ፒሳካ ሣራ ዻቾጝ እባጅባዬ ካኒ ዻችኬን ከእምነት። ²⁰ ሳጊዻ ከእምነት ቁዋቅትሼን ኣይ ባሪዮ ጎብንታ ዬ፣ ካኒ ቃጋዽኬን ቃቦካ ባሪዮ፤ ²¹ ቃቦ እን ባሪዮ ኣይኖጝ ካሹዋጵሾጝ ኬሸን ጋዛ ሃኣኩሉክ። ²² ዬ፣ ማቲ ጫንቃሌ ኮማ። ²³ ክያጃ እን ሺጜ ማቲ ጫንቃሌ ኮማጝ ቶኮጝ ማር ናንዳካ እሺጵኔን፤ ²⁴ ኣይባዬ ባሪዮ ሻም ጫንቃሌ ካኮምሼ ኡዋው፣ ከኢየሱስ ታቺ እን ጉዋዩ ቲቴኬ ኣርሼን ክያኑጝ ሃኬ ኡዋው ጊታይ ኣምኒኬ እሺዻጝ ፓይላ። ²⁵ እሺ ካኣርሼ ናንዳካ ሴሶ ጉዋዩጝ ሳጊዬ ጋዬና፤ ኡዋው ጫንቃል ሻሜ ቦኩኔን ናሹጛ ከኣርሼን ክያኒ።