¹ ኣኪ አይሁድ ኣዬን ጥቅም ኔና ኦ? ቆርኔንካ ኣና ኦ? ² ከጉዋር ኬና ኣይ እያንዻ ጥቅም ኔኒ ሃጁዋ፤ ከሌሜንካ ፓይላ ክያጃካ ባሪዮ ኤልቅምኖጝ ሃናንዳካ እንግን። ³ ኤ ውር ክየም ክየም ማር እምነት ኣኔንያጝ? እን እንግን ማሬ ኣምኒዬን ሹቃ ኣዬንካ ባሪዮ ካይሲሲባይ ዋጋ? ⁴ ክየምጵንዻ ኣይኬን/ ውር ፓይላ ካኣይካ ሾሮ፣ ዬ ባሪዮ ካኣይካ ኣኩሉክ፤ ሺጝ እያይጜ ቶኳዬ፤ «እን ናሹጝኬ ክያጃ ኑኑጝ ኣኩሉክ፣ ከኦካ ሌሜንካ ኮምሼንዻ የማቲባ [ረቺ]። ⁵ ሴሶ ጉዋዩ ሃኬናካ ዹዋልሺንቴ ጫንቃል ኣዬንካ ባሪዮያጝ፣ ሃቻሊያ እያን ሺጜን? ከእያይካ ውር ዜርምኔን ባሪዮ ካቦሼ ኡዋው ቁጣጝ ማር ሊኪዬን እያጝኪ? ሃሺጚ የቃቢያ ከውር እያጝያጝ። ⁶ ከኣኩሉክ ካኣዬ እያይ ቻሊሜንኬን፤ ዋንቲ ኣያ እያይንያጝ ባሪዮ ሻም እያን ካቻሊዬ ፔን ክያኒ ኮምሼኑጝ? ⁷ ውርካ ሾሮ ኣዬን ናኒ ኦኬና ካጁዋንቲሽ ኣኩሉክ ኣዬንካ ባሪዮዬ፣ ሃኦኬና ካሌሜ ጎቢንታዻያጝ፣ ዋይሼ ኣን ውርካ ሴሶዬ ኮምሼ ኣን እያን ሌይ ጋን? ከእያይ ሺጜን ውር ኬና ካቻሊ ዜርምኔን ካኣኖጝ ኣኔባ። ⁸ ይንዻ ኦኬ ሹቃ ካኩዋዎጝ ካማር ኦኬ ጋራ ኣሽክዬን» ሺጝ እያይ ከእያይ ሺጜን ውር ክየም ክየም ሻምካ ኡዋው ጁግ ሻሜን፤ ኮምሼን እንካ ሄክሽ ውር ጊታይ ሃሊኪ። {ውር ክየምጵንዻ ማር ጫንቃሌን} ⁹ ኣኪ ሃሺጛ እያን? ኡዋው ሃሳጊያይ ከኦግዬይ? ክየምጵንዻ፤ ኣይኒን ኣይሁዱጝ ኣይኒን ኣሕዛቡጝ፣ ፓይላ ካጋዬኬ ኦካ ሴሶ ዱቡጝ ሃሌምሻዬ ሃካሲሲያ እንግን። ¹⁰ ከእያይ ሺጜ እያጜ ቶኮጝ፤ «ጫንቃል ውር ክየምጵንዻ ኣኔኬን፤ ኣይን ውር ክየምጵንዻ፤ ¹¹ ኬናካ ጶቅሲ ኦኬ ኣኔኬን፤ ኬናካ ዎሽ ባሪዮ ክየምጵንዻ ኣኔኬን። ¹² እንግን ፓይላ ጊያምሻ፤ ጋይኬ ጋጜ ማቲያ ጊታኬና ካማር ጠቅምዬን፤ ውር ክየምጵንዻ ኬና ኣሽኪ ኦኬ ሹቃ ኣኔኬን፤ ኣይን ክየምጵንዻ። ¹³ ቡላ ቆሩጝ ጊዬይያጝ ሃሌሲ፤ ቶግ ጊዬይዻ ሃሳወን ሹ ጮል፤ «ከኦካ ፎዾሮካ ቶግ ጊዬይ ኣኔ ዼሻካ ቻች። ¹⁴ ቶግ ጊዬይ ቆቃ ከኣሽሞዬ ዻርቲሞዬ። ¹⁵ ጃፍ ጊዬይዻ ናንዳካ ኒያቡ እርሺሼን ሃቤርቢ፤ ¹⁶ ከኦካ ጉዋር ጊዬይ ካዮዬ ኦኬ ጋራዬ ጌዬንባ፤ ¹⁷ ጊባጅኬን ጉዋር እን ኣይ ሹቃዻ። ¹⁸ ከኦካ ሌሜንካ ካርቡ ጊዬይ ባሪዮ ሪግሺኔን ኣኔኬን። ¹⁹ ኣኪ ቶግ ፓይላ ካሃጌዬ ውርካ ፔኑጝ ፓይላ ካኣዬ ባሪዮ ዋሼኑጝ እን ሕግ ክያጆጝ ፓይላ ኣዬ ጊታይ ኣይኬ ኦካ ሕግ ዱቡጝ፣ ሃእባጃያ፤ ²⁰ ዬ ከሕግ ዻዬን ውር ክየምጵንዻ ከኦካ ሌሜን ኔኒ ካሺጜ ሃጫንቃሉጝ ቻሊሜንኬን፤ ሳጊዻ ከታካ ሕግ ሃእባጃ {ጫንቃል ጌዬን እን ጌዬኬ ይሁኔን} ²¹ ዬ ጋን እን ሕጌ ውርካ ቶካ ባሪዮዬ ማኝሺዮጝ፤ እን ኣይኬ ኦካ ሕግ ሹኑኩጝ፣ ዹዋልሼና ጫንቃልካ ባሪዮ። ²² ጫንቃል ይንካ ባሪዮዻ ሃጫንቃል ኬናካ ጌዬኬ ኢየሱስ ክርስቶስ ኣምኒዬን። ኦኬና ኣይ ዋና ኣኔኬን፤ ²³ ናንዳካ ኦ ውር ፓይላ ኣሽክያ ሴሶ፤ ጎቢንታካ ባሪዮዻ ጆክሼያ እንግን፤ ²⁴ [ከቤዛነት] እን ኣይኬ ኢየሱስ ክርስቶስ ጌያ እያይ ከኣይኔን ጫንቃል፤ ²⁵ ከእምነት እን ኣይኬ ኒያቡዻ፣ ሻም ጋላካ ባሪዮ ጶቅሲዬኔ ቦፓይኔያ፤ ሻሜ ይንዻ ሴሶ እን ጋሽክዬኬ ሌሜኑጝ ካኒ ቀጥኬኔ ከዶንሺዬ ሳጊዬን ሃካ ጫንቃል እን ዹዋልሺኔን፤ ²⁶ ከቦን ይንካ ጋኑጝ ውር እን ሻሚ እኑጝ፣ ጫንቃልዻ እሺ ኤምኑዻ ማቲ ጫንቃሌ፣ እን ኣምኒኬ ኢየሱስ ካጌዬ ጫንቃሉጝ ሃናንዳካ ዹዋልሺኔን። ²⁷ ኣኪ [ትምክሕት] ኣኔን ኦን? ሃእሺያጝ ሺዺያ። ከሕግ ና? ሃኬ ሕግካ ዋድማይ? እዕጝ፤ ሃኬ ሕግካ እምነት ዬ። ²⁸ ውር ክየምጵንዻ ማር ሕግ ሹዋጵሼኔ። ካጌዬኬ እምነት ጫንቃሉጝ ሃእባጃያ። ²⁹ ባሪዮ ሃኣምላካ አይሁድጲኒ? ኤማር ኣምላካ ኣሕዛብዻዬኒ? ይንጌ፤ ሃኣምላካ ኣሕዛብዻ፤ ³⁰ እን ቆሮጝ ከእምነት፣ እን ማሬ ቆሬኑጝ ካጌዬኬ እምነት እን ጫንቃሉጝ ሃባሪዮ ክየምጵኔ። ³¹ ኣኪ ኣያ እያይንያጝ እን ናሹጝኬ እምነቱጝ ካሻሚ ሕግ ኦኬና ማር ዋጋ ኣኔን እያጝኪ? ክየምጵንዻ ሻምኬን፤ ሃቁዋቅትሻባ ሕግዻ ዬ።