¹ ዬ እን እጝ ኮምሼ ውር እንቃጝ፣ የኣኔኬን ኦንካ ቃይዮጝ፤ ኦይንኬ ኮምሼ ውር እንቃ ፓይላ፣ [የኮኒንባይ] እን ኤምኑ፤ እን እጝ ማቲ ውርካ ኮምሼን የሻምባ ኦግታይኔ። ² ከኦካ ጊታይ ኣሽክዬን እያይዻ ኮምሺኔንካ ባሪዮ ኣዬ ሊኩጝ ሃእባጃያ። ³ ኣኪ እን ውር የኮምሼ ውር እንቃዬ፣ ሃኦኬና የሻሜ እንያጝ የዋሽኬ ኦኮኑጝ የዻቄኬ ኦካ ኮምሺኔንካ ባሪዮኪ? ⁴ ሞ ሌሞ ኣዬካ ባሪዮ ካእያኒሼ እን ሃምካ ይሁኔን የካኔ ቃቢኬኔ፣ የቦውባይ ሌሞ ኣዬን ኔኒ፣ ሹቃ ኣዬን ኔኒ፣ ሆድሞ ኣዬንካ ኦኬ ዶንሺዬን ኔኒ? ⁵ ኣይባዬ ከክያጃካ ዹዺ ኣዬን ኑኑዬ ኬሸን እን ኑኑ ማር ይሁኔን ሁሉኬኔ ዹዋልሼና ኮምሼንካ ኣኩሉክያጝ ከባሪዮ ከሹካ ቁጣ የፑኡሺሼባ እን ኤምኑ ቁጣ። ⁶ ባሪዮ ናንዳካ ውር ክየም ክየም ኣይባ ከእያይ ጋሽክዬዬ፤ ⁷ ኦይን ኣይ ሹቃ ከቁዋቅቲሼ ኣሽክዬን ጎቢንታ፣ ጎጳሞዬ ጊታይ ዎሼን ቦን ጮል ቆቤኔ ኣይባ ዻቆካ ቦን ጮል። ⁸ ኣይባዬ ከእንግን ኤታጋን ናሺዬን፣ ጊታይ ኦይዲ ኣኩሉክ እኔ ዻዬ ጋራ እኑጝ ኮምሼኔ ቁጣዬ የክሽ እንግንባ። ⁹ ከኦካ ጊታይ ኣሽክዬን ኦኬ ጋራጝ ኣይን ውር ኬና ኣይ እያኑጝ፣ ሌምሼ ከኦካ አይሁድ ጩዋ ከኦካ ኣሕዛብ ማቲባ ጋሎዬ ጫኒቂዬኔ፤ ¹⁰ ኣይባዬ ናንዳካ እን ኣሽክዬን ኦኬ ሹቃጝ ኣይን ውር ኬና ኣይ እያኑጝ፣ ሌምሼ ከኦካ አይሁድ ጩዋ ከኦካ ኣሕዛብ ማቲሼባ ጎቢንታ፣ ጌጳሞዬ ሆፎዬ፤ ¹¹ ባሪዮ ጁንሼኬን ውር ክየምጵንዻዬ። ¹² ጊታይ ማር ሕግ ኣኔኔ ኣሽኪ ሴሶ ፓይላ ሕግ ኣኔኬኔ ካህባ፤ ጊታይ ኣኔ ሕግዬ ኣሽኪ ሴሶጝ ኮምሼ እንግንባ ከሕግ፤ ¹³ ናንዳካ ኦ ከኦካ ሌሜንካ ባሪዮ ጊታይ ሺጜ ጫንቃሉጝ ሃጊታኬናካ ዋይሺንቴ ሕግ ዬ፤ ማር ጊታኬናካ ዋይ ሕጌን። ¹⁴ ኣሕዛብ ጊታይ ማር ሕግ ኣኔኑጝ ኦግታይ ጌርጊቶጝ ሻማ ከኦግታይ ሙኔያጝ፣ ማርኒን ሕግ ኣኔኑጝ እንግን ጋይሼ እንግን ኤታጋን ሕግ። ¹⁵ [ኅሊና] ጊዬይ ናንዳካጝ ካማኝሺዮጝ ቃቦ ጊዬይ ናንዳካጝ ካካሲሲዬ እንግኑጝ፣ ፕርዻ ናንዳካጝ ካሃርጌ እንግኑጝ ኤርግንቶካ ሕግ ቶኩሼ ኦካ ሻን ጊዬዩጝ ዹዋልሼንባ። ¹⁶ ይንዻ ከእያይ ካእርርሲዬ ከክያጃ ሹቃጝ ባሪዮ ኦይን ራሼን ኦካ ሻንካ ውሩጝ ከዻርካ ክርስቶስ ከሹካጝ ካኮምሾጝ ማቲባ ጃ። {ሕጌ ኣይሁዴ} ¹⁷ እን የሺጚያ ሃኣይ ይሁዳያጝ፣ ከእን የኤርምኔ ከሕጌ የቃይዬኬ ጌይኔን እን ኑኑ ኣኔንኬ ባሪዮጝ፥ ¹⁸ ከሕጊ ኩዬን ኑኑ የእባጅ ክያጃ ኔኒዬ እን ኣይ ካሎን የሻሚ ዋናዬ የጎምያያጝ፣ ¹⁹ ናንዳካ ውር ጊታይ እያኒሼ ጆሌ ሙሙዻን፣ ናንዳካ ጊታይ ኣኔን ዲሙጉ ክያኑጝ የኣዬ ኦሜሌሉጝ የኣይያ ኣኩሉክያጝ፣ ²⁰ ከኦኬ እባጄን እን የጌዬኬ ሕግዬ እን ናሹጝኬ ኣኩሉኩጝ ከኦካ እን ማር እባጄን ውርካ ክሊማ፣ የማቲያ ውርካ እርርሲኔንካ ሃንታያጝ፣ ²¹ ኣኪ እን እጝ እርርሲዬን ውር እንቃጝ፣ የእርርሲኬኒ እን ኤምኑ? እን እጝ ሺጚ ኦይዲ ኦጉርኔኔ ሜይሼኑጝ የኦጎረንባይ? ²² እን ሺጚ ውርካ ማር ኩጳሞ ኣሽክዬኑጝ፣ የኩጳሲዬንባይ? እን እጝ ሚኔ ኦግታይ ኣይኬ ኦካ ባሪዮ ሹኑኩጝ፣ የቡሪባይ ቶኦካ ይሁኔን? ²³ እን ይጝ ቃይዬንኬ ሕጉጝ፣ ከሕግ ሳስክዬን የቦውሲባይ ባሪዮ? ²⁴ ይንዻ ከክያጃ ጉዩ ይርባ ሮጝካ ባሪዮ ከታካ ኣሕዛብ» ሃኬ እን ሺጜ እያይኔ ቶኮጝ። ²⁵ ሃኦኬና የሹዋጵሽቴ ሕግያጝ ቆርኔን ኣኔ ዋጋ፤ ዬ ሃኦኬና የሳስክቴ ሕግያጝ የማቲባ ከእኮኑጝ የማሬ ቆርኔኑጝ። ²⁶ ጊታይ ማር ቆርኔን እን ሕግ ክያጆጝ ሃጊታኬና ኣሽክያጝ፣ ኮምሼኬን ከኦኮኑጝ ቆርኖጝ? ²⁷ እን ሕግ እጝ ቶኮጝ፣ ከኣኔ ቆርኔኑጝ፣ ከእን የሳስክዬ ሕጉጝ፣ እን ማሬኬ ኣሩጝ ቆሬኑጝ ከእን ማሬኬ ሕግ ዋይሺኔኑጝ ኮምሼባ። ²⁸ ውር ክየም ማርኒን ሙኒኔኑጝ ከሹኑክጵን ሻጛ ካኣይ ይሁዳያጝ ማቲኬን ይሁዳ፤ ቆርኔን እንካ ኣኩሉክዻ ማር ዳንቢ እንካ ሹኑኬ ኣሩጜን። ²⁹ ኣይባዬ ውር ክየም ካኣዬ ይሁዳጝ ከቱዎጝ ኒን ኣዬን ኔኒ ማቲ ይሁዳዬ ጌዬንያጝ ጊያ። ቆርኔንዻ ካኣዬ ቆርኔኑጝ ማርኬ ሕግ እን ቶኬዬኔ፣ ከመንፈስ ኣኔ ቆርኔንካ ሻንያጝ ጊያ። ውር እን ኣይ እያይኑጝ ጎሺ ማርኬ ኦካ ውሬኔ ሃኬ ታካ ባሪዮ።