¹ ኡዋው ሃኣያባ ቁዋቃኔ፣ ጆጉዬንካ ጊታይ ኣይ ዻቹጉጝ ዼቴን ዬ ኡዋው ኤታጋን ዋዝንሲዬን ኣኔኬን። ² ኡዋው ክየም ክየም ባይዳን ጉዋዩ ጫንቃል ሻሜን፤ ከእሺዻ ጠቅምዬን ኦይንካ ዋዝንሲ እሺ ኣሽክዬን ሁሉኩሼ ኡዋባ፤ ³ ክርስቶስ ካኒ ዋዝንሲኬን እሺ ኤምኑዬ፤ ኣይባዬ፤ ከእያይ ሺጜ ይሬን እን ይሬ እን ሄክሻ ዮጝ ናኒዬ ቶኮጝ ማቲባ እያይ። ⁴ ከቁዋቅትሼኔ ከወርቀት ጊታይ ውርካ ይሁኔን ኣይኔ ሌምኔኑጝ ካኣንቴ ቃቦጝ፣ ጊታባ ቶኬኬ ሌሜን ፓይላ ቶኳ ከእርርዬን ጉዋዩዬ። ⁵ ኣምላክ እን ኣዬን ቁዋቅቲዬ ሌሞጝ፤ የዻይቴያ ኢየሱስ ክርስቶስያጝ፤ ከኦካ ጫቃን ጉዩ ካኣይባ እየው መንፈስካ ክየም ማቲዬን፤ ⁶ ይንዻ ኣይኬ ሻን ክየሜ ቶግ ክየሜ፣ ከጎቢቴ ሹኔካ ኢየሱስ ክርስቶስ ታቺ እን ጉዋዩ ኣምላኬ ጊያ። ⁷ ኣኪ ካኣይሼ ባሪዮ ጎሹጝ የናሺቴ ክርስቶሱጝ፤ ናሺባ ጋጝዻ። ⁸ ቃቦካ ክያጃ እን ጋዬ ሹቡጋን ከቁዋቅትሾጝ ሺጝ ናንዳካ ኣኩሉካ ባሪዮዬ ክርስቶስ ኣዬ ውርካ ዋድማካ አይሁድ ሃሜይሼ እየውባዬ፤ ⁹ ፕርዻ ቶርሲ ባሪዮ ናንዳካ ዻዹጝኔን ኔኒ ካጎሺዮጝ ጊያ፤ ከእያይ ሺጜ እያጜ ቶኮጝ፤ «ዬ ሃጎሺባ ኦካ ጫቃንካ ኣሕዛብ፤ ናንዳካ ሮጝ ኑኑዻ ሃክውባ። ¹⁰ ፕርዻ፤ «ኣሕዛብ ዮ፤ ኣይኬ ዛርሲዬ ዋዝንዽባ። ¹¹ እንቃዻ፤ «እየው ኣሕዛብ ፓይላ ጎሺባ ታቺ እን፤ እየው ዛርሲዻ ፓይላ ይወንባ ሺጝ እያይ። ¹² ኢሳይያስዻ ፕር እያይ ሺጝ፤ «እንካ ጌጳዺ ኦካ ዛርሲ ፓይላጝ፣ ኣንቲካ እሴይ ኩንባ፤ ከእሺዻ ኣሕዛብ ኣይሼባ ቃቦ ጊዬይ። ¹³ ከእሺ ኤርምኔን ጉዩ ኣምላክ እንካ ቃቦጝ ካቋዋቅሼባ እየው ዋዛዬ ሆፎዬ ፓይላ፤ ይንዻ ከቁዋቅትካ መንፈስ ቅዱስ ሺዕሺሺ ቃቦዬ እርሼ እየወ ጊያ። {ጳውሎስ እን ኣይ ውርካ ዋድማካ ኣሕዛቡጝ} ¹⁴ ጪኒጌን፤ እየው ኤታጋን ቋቂኬ ሹቃ ኣዬኔ፣ ከኦካ ኦኬ እባጄን ፓይላ ከእያይ የቋዋቅቶጝ ክየም ካክሊዬ ኑዋ እንቃ እኑጝ የኣንቴ ካንታጝ ኣይን ኣኑጝ ሃማቲያ ኣኩሉክ። ¹⁵ ከኣይኔን እን ባሪዮ ኣዬ ኣኑጝ፤ እንቃ ካቃቢዮጝ ከኦካ ክያጃ ክየም ሃቶኩሼ እየው ጊዱጝ፤ ¹⁶ ከክያጃ ሹቃካ ባሪዮ ኦኬ ኣሽክዬን ከውርካ ቃሽ፤ ናንዳካ ዛርሲ ሃኬ ውርካ ዋድማካ ኢየሱስ ኢየሱስ ክርስቶስ ማቲዬን፤ ይንዻ ኣሕዛብ ከመንፈስ ቅዱስ ካይሁሼኔ ከታካ ባሪዮ ካኣኔ ጋላ እን ኣኔ ቦወኑጝ። ¹⁷ ዬ ናንዳካጝ ሃዋድምሺኔ ባሪዮጝ ሃቃይባ ከኢየሱስ ክርስቶስ። ¹⁸ ከኦካ ዳቢ እን ሃሓሳወዬ ሃኣሽክዬዬ ኣሕዛብ ካዋይሺኔ ባሪዮጝ፣ ክርስቶስ ኣዬኬ ኣኔ ከኦካ ጊታይ ሙኖጝ እንቃ ከሃሳወን ሃሻምኬን ጊዲ፤ ¹⁹ ይንዻ ኣዮጝ ሃኬ ቁዋቅትካ መንፈስ ቅዱስ፤ ሃኬ ኦኬ ዹዋልሺኔኔ ኦኬ ሹቃዬ፤ ከዴንታ እንዻ ቦኬ ኢየሩሳሌሜ ሌይ ኣይ ባኪ እንካ እልዋሪቅን ቱንሲካ ክያጃ ሹቃካ ክርስቶስ ሃክሊኔያ። ²⁰ ዶክ ከእያይ ፓቆጝ ሃሺጝ ካማር ሪቤኔ፤ ራቅ ጊታይ ማሬ ሮጝካ ክርስቶስ ሺወኑጝ ክያጃ ሹቃ ክሊዬን ሃኣርግማካ ሹ ጮል ናኒ፤ ²¹ ሳጊዻ፤ « ናንዳካ እሺ ጊታይ ማሬ ሜይሼን ጌይባ፣ ጊታይ ማር ዋዬኑጝ ጵቅሲባ፤ ሃኬ እያይ ሺጜ እያይኔ ቶኮጝ። ²² ከክያጃ እንዻ ካማር ሃሚን ጉዩ ኩዋወኔ ሹ ጁዋኑ ሃርጌያ ኣን። {ሮማን ኩዬ ቶዬን ቃቦካ ጳውሎስ} ²³ ዬ ጋን ከኦካ ራቅ ጊታጝ ኦይን ካኣሽክዮጝ ናንዳካጝ ማሬ ኣኔኑጝ፤ ካርሲኬ ቦን ጁዋኑዬ እየው ኩዬ ቶዬን ናንዳካጝ ሃኣኒኔ ፎሽካዺዬኑጝ፤ ²⁴ ቃቦጝ ከሹካጝ ሃኩዬ እስጳንያጝ ካሹዋጵሾጝ ኣ ሃቃቢባ። ከሹካጝ ሃሳጊዬዻ ካቶይ እየወ ካኡፍኬ እየው ሹ ጩዋማዬ ፎሽካዽዬን ናኒ ቱልያጝ ጩዋ ከጃሌን ናኒ ከኬልሺቴ ኣኑጝ ሃሻሚባ ቃቦ። ²⁵ ዬ ጋን ውርካ ይሁኔን ጊታይ ጌዬን ሃሚን ዋድምሼን ሃኣንሼን እያጝካ ኢየሩሳሌም ኩይሼን። ²⁶ ናንዳካኦ መቄዲንያዬ ኣካይያዬ፤ ከኦካ ጫቃንካ ውርካ ይሁኔን ጊታይ ኣኔን ኢየሩሳሌም ናሹጛ ጊታይ ኣይ ኩፒ ኬልሺዬኔ። ²⁷ ኬልሾ ሻሜን ናሺያ፤ ከኣኩሉክ ጋይ ውርካ ባጃ ጊዬይ። ኣሕዛብ ኣያ ኡዋኒኔንካ መንፈስ ቅዱስ አይሁድ ኣዬንያጝ፤ ኡዋኔን እንካ ዳሊ ጌዮጝ ካካሺምኔኬ ውርካ ኣይሁዱጝ ጋይ ውርካ ባጃ ጊዬይ። ²⁸ ዬ ሹዋጳ ዋድማ ኔኒዬ ጊባጃ እንካ ቦወ ካርቡ ይጝያጝ ጩዋ ሃኩይሼባ እያጝካ እስጳንያጝ፤ ከጃፍ ኩዬን ናኒ ሃቶይባ እየው። ²⁹ ሃኩንያ ሃሚን ጉዩዻያጝ፤ ካኩዋወ ከቋቄንካ ኡዋኒኔንካ ክርስቶሱጝ ሃእባጅያ። ³⁰ ጪኒጌን ናኒዮ፤ ናንዳካ ኣን ከባሪዮ ይሁኔን ካማቲቴ ናንዳካ ኒሺኔን ናኒ ክየሙጝ ከናሺማካ ኢየሱስ ክርስቶስ ታቺ እን ሃይወን እየውባ። ³¹ ከጊታይ ኣኔን ይሁዳ ከኦካ ቡዋካ ጊታይ ማር ኣምኒዬን ካባይሼዬ ከዋድማ እን ናኒ ኣኔን ኢየሩሳሌም ከኦካ ውርካ ይሁኔን ጊታይ ኣኔን ሃሚን ካጌዬ ቦውኔን ይሁሼን ኣንባ፤ ³² ይንዻ ከክያጃካ ባሪዮ ካኩዋዌ ኦጉዩ ከዋዛዬ ካማቲኬ እየውዻ ሃሊዬ ጊያ። ³³ ኣምላክ እንካ ሹቃጝ ካኣይኬ እየው ፓይላ፤ ኣሜን።