¹ ሃኤልቅምሼንያ እየው ጪኔ ጉዋዩ ፌቤን እን ኣይ ውርካ ዋድማካ ቶኦካ ይሁኔንካ ክንክራኦሱጝ። ² ናንዳካ ውር ጊታይካ ይሁኔን ፓይላ ከቾችንሺዬን ኬና ኣይ ልኪ ከታቺ እን ከቦቴ እሺዬ ኬልሾ እን ዎሼ ከኦጉዩዻ ከኣሽክቴ እሺባዬ ሃሜይሼባ እየው፤ ናንዳካ ውር ጁዋኑዬ ከኣንዻ ፓይላ ኣኔ ኮልሾ ታቺዬ። ³ ከኢየሱስ ክርስቶስ ጊታይ ሃዋድምቴ ከጋጝ ናንዳካ ጵርስቅላዬ ኣቂላዬ ቦቴ ኣንባ ሆፎ። ⁴ እንግንዻ ሺጝ ናንዳካ ኣኔ ዻቆ ጊዬይ ዹዋልሼኔ ጋራ ኦኬ ጋራ፤ ማር ኣንጵኔኔ ከቶኦካ ይሁኔንካ ኣሕዛብዻ ፓይላ ጎሺ እንግንባ። ⁵ ከኦካ ጶሮክ ጊዬይ ጊታይ ኣኔን ሃምካ ቶኦካ ይሁኔን ቦቴ ኣንባ ሆፎ። ከኦካ ፔንካ እስያ ከሌሜንካ ጊታይ ዋክሼ ሃምካ ክርስቶስ፤ ናንዳካ ውርካ ናሺዺ ናኒ ኣጤኔጦን ቦቴ ኣንባ ሆፎ። ⁶ ማርያ እን ናንዳካ እየው ዻቺ ጁዋኑጝ ቦቴ ኣንባ ሆፎ። ⁷ ኤዳን ጊታባ ናኒ ቁሜኬ ኣኑጝ ናንዳካ ኣንዲራኒቆንዬ ዩልያኔ ቦቴ ኣንባ ሆፎ፤ እንግን ከኦካ ጫቃንካ ሐዋርያ ጊታይ ሮጝ ኣይ ሹቃዬ ከክርስቶስ ኣምኒዬን ሃጊታይ ሌሚ ኣኑጝ። ⁸ እን ሃናሺዬ ከታቺ እጝ ናንዳካ ጵልያጦን ቦቴ ኣንባ ሆፎ። ⁹ ከክርስቶስ ጊታይ ሃኣሽክቴ ከጋጝ ናንዳካ ኢሩባኖኔ ውርካ ናሺዺ ናኒ ቁዋቃ እን ስንጣክኔ ቦቴ ኣንባ ሆፎ። ¹⁰ ከይሁኔን እን ኔኑጝ ኔኒ ኣኔን ከክርስቶስ ፓታንሲዬ እን ጎሺዮጝ ናንዳካ ኤጣሌን ቦቴ ኣንባ ሆፎ፤ ናንዳካ ውር ጊታይ ኣኔን ኦካ ጶሮካ ኣርስጣባሉዻጝ ቦቴ ኣንባ ሆፎ። ¹¹ ናንዳካ ኤዳ ናኒ ሄሮድዮና ቦቴ ኣንባ ሆፎ፤ ናንዳካ ውርካ ጶሮካ ንቀርሱ ጊታይ ኣኔን ከታቺ እን ቦቴ ኣንባ ሆፎ። ¹² ጊታይ ኣይኬ ታቺ እኔ ሃኣጚ ጊታይ ኣሽክዬን ከቁዋቅትሼንካ ናንዳካ ፕሮፊሞናዬ ጢሮፊሞሳዬ ቦቴ ኣንባ ሆፎ፤ እን ኣይኬ ታቺ እኔ ኚያጝ እን ካሎን ዻቺሼ ሃኣጚ እንቃጝ፤ ናንዳካ ጠርሲዳ እን ናሺዮጝ ቦቴ ኣንባ ሆፎ። ¹³ እን ጊድዬ ከታቺ እን ናንዳካ ሩፎኔ ናንዳካ እን ኣይ ጁዋኔ ናንዻጝ ናንዳካ ጁዋኔ ቦቴ ኣንባ ሆፎ። ¹⁴ ናንዳካ ኣስቀሪጦኔ ኣፍላስንጳዬ፣ ናንዳካ ሄሮሜኔ፣ ናንዳካ ጳጥሮባኔ፣ ናንዳካ ሮማኔ፣ ከጪኒጌን ጊታይ ጉዩ የኣይቴ ከጋጜ ቦቴ ኣንባ ሆፎ። ¹⁵ ናንዳካ ፍሌጎን፣ ናንዳካ ዩልያ፣ ናንዳካ ኔርያዬ ናንዳካ ጪኔዬ፣ ፕር ናንዳካ ኤልንጦን፣ ውርካ ይሁኔን ጊታይ ኣኔን ከእንግንዻ ቦቴ ኣንባ ሆፎ። ¹⁶ ከጌሶካ ሹንቄን ኬና ይሁሺኔ ኣይ ጋጝባ። ቶኦካ ይሁኔንካ ክርስቶስ ፓይላ ቦዋ እየው ሆፎ። ¹⁷ ጪኒጌን ናኒ ዮ፤ ከጊታይ ቦፓይኔ ላልምኔኔ እርሮ እን የኣኒንቴ እርርዬኔ ከምኔን ከኦካ ጃሌን ጉዩ ጊታይ ሻምሼ እየው ካቲምኔን ከኣጅቶጝ ሃሜይሼባ እየው፤ ፓይባ ከኦግዬይዻ ዹክ። ¹⁸ ውር ጊታይ ኣይኬ ጊታይ ዋድምሾጝ ማርሼ ኢየሱስ ክርስቶስ ታቺ እን ጉዋዩዬ፤ ሃናንዳካ ክያጃ እን ¹⁹ ከኤርጎ ቦወን ጉዩ ፓይላ ዋያ፤ ኣንዻ ሃዋዝንዽያ። ኣይባዻዬ ከኦካ ኦይን ኣይ ሹቃጝ ኣይካ ቃቦ፤ ናንዳካ ኦይን ኣይ ጋራጝ ከኣይቴ ሌሞጝ ሃዎሺያ። ²⁰ ኣምላክ እንካ ሹቃጝ፤ ሙርባ እጁጝ ይሪካ ከኦካ ጃፍ ጉዩ ዱቡ። ኣይኔንካ ኢየሱስ ታቺ እን ጉዋዩጝ ካኣይኬ እየው። ²¹ ጢሞቴዎስ እን ኣሽክዬን ከኣን፣ ፕርዻ ጊታይ ኣይ ኤዳ ናኒ ሉቂዮስ፣ ኢያሶኔ ሱሲጴጥሮሴ ቦቴ ኣንባ ሆፎ። ²² ሜርሜሩጝ ሃቶኮጝ ኣን ጤርጥዮስ፣ ሆፎካ ታቺ እን ሃቦሼ እየውባ። ²³ ከቾቺንሺኔን ሹቃ ኣኔ ውር ፓይላ ጊታይ ጌዬን ኦካ ቶኦካ ይሁኔን ይጜ ጋይዮስ እን ዋዝንሲ ኡዋው ቦዋ እየው ሆፎ። እን ኣይ ታቺካ ቶኦካ ኣማ ኦካ ከተማጝ ኤርሳጦስ፣ ጪኒጌን ጉዋዩዻ ቁኣስጥሮስ ቦዋ እየው ሆፎ። ²⁴ ኣይኔንካ ኢየሱስ ክርስቶስ ታቺ እን ጉዋዩጝ ካኣይኬ እየው ፓይላ፤ ኣሜን። ^{25 26} ከኤርጎካ ኣምላክ እንካ ቦን ጮል ዛርሲ ፓይላ ካኣምኒዬ ካዋይሺኖጝ፣ ከወርቀትካ ውርካ ቶካ ባሪዮ ጋን ከእን ዹዋልሺኖጝ፣ ከቦን ጁዋኑ ጊታባ ሳጊ ኦካ ራሼን እን ድኬ ኣኖጝ ካዹዋልሺኖጝ፣ ከክያጃ ሹቃ እን ሃእርርሲዬዬ ከኢየሱስ ክርስቶስ ውር ሜይሼኔ እንካ ቻሊዬ እየው ሌንሲዬን። ²⁷ ኣምላክ እን ኣይ እሺጵንካ ፓካልማሞጝ፤ ከታካ ኢየሱስ ክርስቶስ ካጎቢባ ቦን ጮል፤ ኣሜን።