¹ ውር ክየምጵንዻ ናንዳካ ውር ጊታይ ጌጳሲዮጝ ዋድምሺኔን ሁሉኩሼባ፤ ማራ ከታካ ባሪዮ ኣዬንያጝ ክየምጵንዻ ጌጳሞ ኣኔኬኔ፤ ውር ታታቻን ጊታይ ኣኔዻ ሃጊታይ ባሪዮ ጌጳሲዮጝ። ² ዬ ውር እን ኣሽክሼ ውር ጊታይ ጌጳሲዬ ክያኒ ሴሶጝ፤ ከኦካ ክያጃካ ባሪዮ ሃእን ኣሽኪ ሴሶጝ፤ ውር ጊታይ ኣሽኪ እንዻ ቦሼባ እንግን ኤታጋን ኮምሼን። ³ ጊታይ ጌጳሲዮጝ ናንዳካ ጊታይ ኣሽኪ ጋራጝ ዬ ናንዳካ ጊታይ ኣሽኪ ሹቃጝ ማር ጊታኬና ካሪግሺሼን። ካሪግሺኔ ውር ጊታይ ጌጳሲዮጝ የዎሻባይ? ኣኪ ኣሽኪ ኦኬ ሹቃጵን፤ እሺዻ ጎሺሼ እንባ፤ ⁴ እሺ ናንዳካ እን ሹቃ እጝ ኣሽክዬን ሃውርካ ዋድማካ ባሪዮዬ። ኣይባዬ የኣሽክያ ኦኬ ጋራያጝ ሪግሺንቴባ፤ ናንዳካ ኦ የካኔ ቁምኬን ኤቤልካ ማም እያይ፤ እን ኣሽኪ ጋራጝ ቀጥዬ እን ኣይ ኦካ ቀጥኔኑጝ፤ ሃውርካ ዋድማካ ባሪዮ። ⁵ ዬ ማርኬ ቅጣትጵን ሪግሺኔኔ፤ ሺጝ ናንዳካ ቦኩንዾያጝ ውር ጊታይ ጌጳሲዮጝ ሪግሺኔን ሁሉኩሼባ። ⁶ ፕር ካሺዬ ግቢርዻ ሃናንዳካ እዕጝ፤ ውር ጊታይ ጌጳሲዮጝ፤ ካኣዬ ኦካ ኦግታይ ሃጊታኬና ኣይ ውርካ ዋድማካ ባሪዮዬ፤ ⁷ እንካ ሁሉኩሼ እንግን ክየም ክየሙጝ ኣይባ፤ ሃጊቢሪያጝ ጊቢሪ፣ ሃቀረጥያጝ ቀረጥ፤ እን ሪግሺኔን ካሁሉኩሾጝ ሪግሼንባ፤ እን ጎቢንታ ካሁሉኩሾጝ ጎቢባ። {ሹዋን ሄክሻዌ ናሺ ጋጝባ} ⁸ ከጋጝ ናሺዬን እንቃ ባጃካ ውር ክየምጵንዻ ካማር ኦጉዩ ኣኔን፤ እን ናሺ ባይዳ ኔኑጝ እሺ ሹዋጵሽባ ክያጃዬ። ⁹ ኦይ ኩጳሲዬን፣ ኦይ ኒሼን፣ ኦይ ኦጉሬን፣ ኦይ ኣርግንዽዬን፤ ጊታይ ሺጚ እያይኔ ኤርጎ እንቃ ኣኔዻያጝ፤ ባይዳ ኑኑ ሻምኬ እን ኤምኑዬ ናሺባ ሺጝ እያይ ከኦካ ክያጃ ክየም ይጝ ፑሪያ። ¹⁰ ናሺማ ሻምሼኬን ባይዳ ክያኒ ኦኬ ጋራ፤ ዬ ናሺማ ሃቱንሲካ ክያጃ። ¹¹ ከቦን ጶቅሲዬን ሻሚባ ይጝ፤ ሹ እን ከጬይንቴ ከኦካ ሩዋቱኩጝ ሃጋን፤ ባይሼን ጉዋዩ ከሌሜን ሃኣምኒቶጝ ሳጊ ጋን ድያውሻ ኦጉዋዩዬ። ¹² ምክርዻ ካሳግዮጝ፤ ሹሽዻ ሺጝካ ካርሲዬን። ዬ ካፓቅ ክያጃካ ምክሬ ካክም ኣንቲቲካ ፓርካ ኤቤሌል። ¹³ ከእያይ ሃጃላ ጆልቴ ከሹሹጝ ካጃላጆልኬ ሊኪ፤ ካማርኬ ይያሪዬ ጮዩዬ ኣዬን፣ ካማርኬ ኩጳሞዬ ጋጝ ራጵሼን ኣዬን፤ ካማርኬ ዜርማዬ ቦውንታዻ ኣዬን። ¹⁴ ከሳጊዻ ኪሚ ኢየሱስ ክርስቶስ ታቺ እን፤ ከሹዋጵሽ ኣርግማዬ ናንዳካ ኣሩጝ ኦይድኬ ቃቦ ጉዩ ኣግሲቴን።