¹ ኣኪ ጪኒጌን ናኒ ዮ፤ ሩዋ ጉዩ ከይሁኔን ከዋዝንሲዬ ባሪዮጝ ከሻምቴ ጋላዬ ከቦፓይቶጝ ከሹቃቲካ ባሪዮ ሃይወን እየውባ፤ ይን ከውርካ ቃቦ ከቦፓይቶጝ ሃይሁኔን ጉዩ። ² ሹቃ፣ እንካ ዋዝንሲዬ ኣይ ካሎን ክያጃካ ባሪዮ ኣዬ ኦጝ ከፈተኒቴዬ ከእባጅባዬ ከሹቦ ጉዩ ሃሊ ሻሜን ማቲባ ዋናዬ ኦይዲ ፔኑጝ ሙኒኔን። ³ ባሪዮ ከይሁኔን እን ኣዬ እየው ክየም ክየም ቶይባ እየው ኤታጋን ሊኪዬ፤ ከኦይ የኣይቴ ሳጊ ከሻም እየው ኤታጋን ዼጌ ከቃብቶጝ ከኣይኔን እን ጋዬ ኣን ሃክሊባ እየው ክየም ክየም። ⁴ ኡዋው ክየም ክየም ከኦካ ሩዋ ክየም እን ጉዋዩጝ ሃኣንቴ ሩዋ ጁዋኑጝ፤ ሩዋ ጊታይዻ ከእያይ ማሬ ዋድማ ሃይነት ክየም ኣኔን ፓይላ፤ ⁵ ፕር ኡዋው ሃኣያያ ጁዋኑያጝ ከክርስቶስ ሃኣያ ክየም። ኡዋው ክየም ክየም ሃኣያ ሩዋካ ውር እንቃ እን። ⁶ ከኣይነት እን ጋዬ ኡዋው ሃኣንቴ ኣይኔን ዋና ዋና፤ ናንዳካ ክየም ኣይኔን እን ጋይኖጝ ኣያ ሃሳዋ ሃሳውኔንያጝ፤ ከእያይ ኣምኒዮጝ ሊኪ ካሃሳውባ። ⁷ ኣያካ ዋድማያጝ ካዋድሚባ፤ ኣያካ እርርሲዬንያጝ ካእርርሲባ፤ ⁸ ኣያካ ካክሊማያጝ ካክሊህንቴባ፣ ኣያካ እንቃ ኣምሺሼንያጝ ካጁዋንቲሼ ካኣምሽባ፣ ኣያካ ኣስተዳደሪዬንያጝ ካኣስተዳደሪባ ከቁዋቅቲ፣ ኣያካ ሺዕሺዬንያጝ ካሺዕሺባ ከዋዛ። {ናሺማ} ⁹ ናሺማ ጉዩ ካማርኬ ሙኒሺሼን ኣዬን፤ እን ኣይ ጋራጝ ፓይላ ማንቴባ ከኦይን ኣይ ሹቃጝ ፓይላ ኣይባ ከጋጝ። ¹⁰ እየው ከጋጝ ከጪኒጌንካ ጋጝ ናሺዬን ናሺባ ጋጝ ካሎን፤ ክየም ከኦኔኒ ሳጊ ሻሜን ሪግሼንባ ጋጝ። ¹¹ ታቺ እን ዋድምሼን ማቲ ጊታኬና ኣይኬ መንፈሴ ከኦካ ቁዋቅትሼን ይጝ ኦይድ ሁር ዋክቴን። ¹² ከቃቦ ሹቃ ኣይ ውርካ ዋዛ፤ ከጋሎ ዶንሺባ፤ ከይሁኔን ቁዋቅትሽባ። ¹³ ውርካ ባሪዮ ጊታይ ኣይካ ጋሎ ኣኔያጝ ካሺቴ እንግንባ፤ ቾችንሺባ ኳማና። ¹⁴ ናንዳካ ጊታይ ዋኬ እየው ኡዋኒ እንግንባ፣ ኡዋኒባ ዬ ኦይዲ ኣሺቴን። ¹⁵ ናንዳካ ጊታይ ኣይሼ እየው ሹቃጝ ካኣይሼ እየውባ ሹቃ፤ ጊታይ ኣይ ሞይካዹጝ ሞይካዺባ ከጋጝ። ¹⁶ ቆቢባ ከጋጝ ዋይሺኔን፣ ከጊታይ ቆቤን ዱቡ ክያኑጝ ከእንግን ናሺባ ዬ ኦይዲ ቃይቴን፤ ኦይዲ ከእየው ኤታጋን ቃይቴን። ¹⁷ ናንዳካ ውር ክየምጵንዻ ጋራ እን ኦይድኬ ጋራ ዋሽቴን፤ ኦካ ውር ፓይላ ኦሹቃ እን ኣሽክዬን ቁዋቅትሺባ። ¹⁸ የቻሊያዻያጝ ከታጉዩ ከውር ፓይላ ኣይ ሹቃ። ¹⁹ ውርካ ናሺዺ ናኒ ዮ፤ ኣይ ባሪዮ ባልካ ማኒት ዬ ኦይ ባጃ ቡሌን፤ «ባጃ ቡሌን ሃናኒ፤ ኣን ሃዋሽባ ብድራን ታቺ እን ሺጛ፤ ሺጝ እያይኔ ቶኳዬ። ²⁰ ሳጊካ፤ «ኣምሽባ ጋል ኑኑ ከኦካ ካሽ፣ ኮርጉ ቃዋ እሺዻያጝ ማቲሽባ። የሻምያ እንዻያጝ ሼሊሚኔንካ ጉሁ የፑኡሺሼኬን እን ኤምኑ። ²¹ ጋራ እን ካውኬ ሹቃ ዬ ኦይድኬ ጋራ ካወን።