ኦይን ዮሐንስ ጌዮጝ ¹ ውርካ ኤርጎ እንካ ዶጝሳዻ ትብያ ሜርሜር ኔኒ፤ ሃጌይያ ቢሊ እን ፓቄንኬ ፎላ ዾዮኬ ሙር ዳሊ ክያኑጝ፤ ጋያ ቢሊ እንዻ ቁሉፍካ ይግን እን ኣይ ቱሎጝ። ² ከሹ እን ቦወ ይግን እን ኣይ ቱሌዻ፣ ከቱዎጝዻ ቱላ ጩቡይ ኮኑጝ ቱልኬ ኦካ ምሶ ታቹጝ። ከጩቡይ እን ቱልኬ ኦካ ይግንዻ ድምሻ ሹሼ ፎላዬ። ³ ካፍታዻ ቱልኬ ኦይንካ ጩቡዬ ጎብሼያ ዳሊ ክያኒ፤ ጋያ እንግን ጌጳሞ ከናቁርካ ዳሊ። ⁴ እንግንዻ ካማር ሹጩካ ዳሊ ወይ ኣይኒን ሻሪ ጊታይ ዾቅዬዬ ኣይ ጫጉሮጝ ወይ ሻሪ ጊታይ ጎሩጝ ካማር ቃወኔ፣ ኣይባዬ ካቃወ ውር ጊታይ ማህትምካ ባሪዮ ማሬ ማሪ ጊዬይ ክያኒጲን ኣኔኔ ሜይሼያ እንግን፤ ⁵ እንግንዻ ካጋሊንሺዬ እንግን ናንዳካ ክያጝካ ትጌሽ ቾንጵኑጝ ዬ ካኒሼ እንግኑጝ ካኒ ጋይኬን እንግን ጌጳ፤ ጋሎ እንካ ጋሊንሺዬ እንግንዻ ሃኬካ ሃይነትካ ጋሎ ኮኑጝ ናቁር እንዻ ውርያጝ ካጋሊንሺዮጝ። ⁶ ከሹዋን ጊታይ ውር ዎሽባ ኣርሼን፤ ኣይባዬ ጌይኬን፤ ጋርግንዽባካ ኣርሼንዻ፤ ኣይባዬ ኣርሼን ሪሽባ ከኦጊዬይ። ⁷ ካፍታንዻ ሙኔን ፓርዳ ጊታኬና ሼኪካ ሃምካ ፓር ፓዬኑጝ፤ ጋይሼያ ሹቦ ጊዬይ ክያንዻ ኦኬና ሙኔን ወርቄ፤ ማሪ ጊዬይዻ ሃኬና ሙኔን ማሪካ ውር፤ ⁸ ጪራሺ ጊዬይ ሃኬና ሙኔን ጪራሽካ ሃኣጚ፣ ኒጊ ጊዬይዻ ሃኬና ሙኔን ኒጊካ ሞሆ። ⁹ ጋኔ ኣፓላ ታቺ ኬና ሙኔን ኣፓላካ ኮይሶ፤ ናቅዲካ ታቡጉ ጊዬይዻ ሃኬና ሙኔን ናቅድካ ግሮካ ፓርዻ ጁዋኑ ጊታኬና ፓይሼ እያጝካ ፓሩጝ። ¹⁰ ጋኔ ኩር ኬካ ናቁሬ ጋኔ ኦካ እንዺኔንዻ፤ ፕርዻ ቁዋቅት እንካ ጋሊንሺዬ ውር ከክያጝካ ትጌሽ ቾኑጝ ኣኔን ኩር ጊዬይ ክያኒ። ¹¹ ጋኔ ቢቲ ኬና ጊዬይ ኣይ ሳጊዻ፤ እሺዻ ሃእንካ ኤርጎካ ይግን እን ኣይ ቱሎጝ፤ ሮጝ ኔኒዻ ከቶካ ዕብራይስጥ ሺጝ «ኣብዶን» ፕር ከቶኳ ግሪክ ሺጝ «ኣጶልዮን» ¹² ጊዕሾ እንካ ሌሜን ሳጊያ፤ እየዎ ፕር ጩዋ ከኦጝ እንቃ ጊዕሾ ዻ ፓዬንባ። ¹³ ውርካ ኤርጎ እንካ ላይሳጝ ትብያ ሜርሜር ኔኒ፤ ናቅድካ ሼይካ ኦካ ጋላ ቡሌን እን ጋሺክዬ ከወርቄዬ ኣኔን ኦካ ሌሜንካ ባሪዮጝ ኩኔ ሃዋይያ፤ ¹⁴ ናቅዲ እንዻ ሜርሜር እንካ ላይሳ ውርካ ኤርጎ ጎሞጝ፣ ሺጝ ዳራ ታቺ እን ቁሜኬ ኤፍራጥሱጝ ቡሊባ ውርካ ኤርጎ ኣሁራን ጊታይ። ¹⁵ ከኦካ ቢዛካ ውር ካኒሼ ኦካ እንካ ማክንሳጝ፣ ከዋዳ እኔ ሳምንቴ ፕርዻ ከኦካ ትጌሽ እኔ ቦኔ ቡላ ውርካ ኤርጎ ኣሁራን ጊታይ ኣይ ሼክምዬ ቆቡጝ። ¹⁶ ፓፃኗን ጊታይካ ፓርዳጝ ጁዋንቲ ጊዬይ ሃሚሊዮን ዽብ ዻ፤ ሃዋይያ ኮመን ጊዬይዻ። ¹⁷ ፓርዳ ጊታይ ሃጌዬኬ ሹካካ ናኒዬ ውር ጊታይ ቆቤ እንግን ዾዮኬ ሃጊታኬና ሙኔን ጊታይ፤ ኣፓላ ጊዬይዻ ሃኬና ኣይካ ጉሁ ጫጫጉ፣ ሃኬና ኣይኬ ያክንት ሱራዬ ሃኬና ኣይኬ ዲን ማካሌዬ፤ ሹቦካ ፓርዳንዻ ሃኬና ሙኔን ሹቦካ ሞሆ። ከኦካ ቶግ ጊዬይዻ ኣኒና ጉወ ጩቡዬ፣ ዲንዻዬ ቱሌን። ¹⁸ ከኦካ ጋራ ጅያናን ጊታይ ቱልኬ ኦካ ቶ ጊዬዩጝ፣ ከጉ ወይ ከጩቡይ ወይ ከዲን ከኦካ ቢዛካ ውር ኒሻ እንካ ማክንሳጝ። ¹⁹ ናንዳካኦ ቁዋቅትካ ፓርዳን ኣኔን ኦካ ቶግ ጊዬዬ ኦካ ኩር ጊዬይዬ፤ ኩር ጊዬይዻ ሃኬና ሙኔን ቻች፤ ናንዳካጝ ማሬ ሹቡ ኣኔኑጝ ካዬክሼሾ ውሩጝ ሃኬ እዕጝ። ²⁰ ውር ጊታይ ማርኬ ኦካ ኦኬ ጋራ ጊታይ ኒሼኔ ሺዺውጝ ካንዻ ከኦካ ዋድማካ ቡዋ ጊዬይ ካኒ ሁሉኬን ይሁኔን፤ ቤሮዻ ከእያይ ማሬ ጌዬን ወይ ዋዬን ወይ ፓዬን ቻሊዬኑጝ፣ ካኒ ጎይድኬን ኦግታይ ጋሽክዬ ከወርቄዬ፣ ክቢሬዬ፣ ከናሴ፣ ከባዬ ከሻሪዬ ኣይኬ ኦካ ባሪዮ ሹኑኩጝ ይሁኔን። ²¹ ፕርዻ ከእን ኒሺኔ ጆሌ ናፒሲካ ውሩጝ፣ ከኦካ ዋድማካ ጋትማ ጊዬይ፣ ከኦካ ሴሶካ ኩጳሞ ኣሽክዬን ጊዬይ፣ ወይ ከኦካ ዴንታካ ጎር ጊዬይ ካኒ ሁሉኬን ሃምካ ይሁኔኑጝ።