ኦይን ዮሐንስ ጌዮጝ {ማህትም እንካ ሶጵሳዬ ጥናካ ወርቄዬ} ¹ ማድር እን ከሹ እን ቡሌ ማህትም እንካ ሶጵሳጝ፣ ዋዳካ ሰዓት ጩዋማ ዶክ ከፎላ ዾዮክ ማቲያ ሹይ ቆቤን። ² ከኦይን ጩዋ ውርካ ኤርጎካ ባሪዮ ሶጳን ጊታይ ጎሪ ኦካ ማሪካ ባሪዮጝ፤ ጋያ እንግንዻ ሜርሜር ሶጳ። ³ ውርካ ኤርጎካ ባሪዮ እንቃዻ ጎም ጥናካ ወርቄዬ ኩኔ ዾራ ኦይንካ ቆጩርካ ኦኑጝ ቡሌ ጆሌ ጋላጝ፤ እሺዻ ከኦካ ሌሜንካ ጋላ ቡሌጆሌንካ ወርቄ እን ኣኔን ኦኑጝካ ቆቤጃሌኑጝ ከኦካ ይሁኔንካ ውራን ጊታይካ ይሁኔን ፓይላ ካቦፓዬባዬ ጋያ ቁኛ ጁዋኑ። ⁴ ጩቡይካ ቁኛ እንዻ ከይሁኔንካ ውራን ጊታይካ ይሁኔን ከኦካ ቡዋካ ውርካ ኤርጎ ቱልሼያ ሃምካ ሌሜንካ ባሪዮጝ። ⁵ ውርካ ኤርጎ እንዻ ቦው ጥና እኔ ቋቁሼ ጉሁ እንካ ጋላ ቡሌኔ ባክሼያ እያጝካ ዳሉጝ፤ ማቲያ ጉጉናት፣ ናቅዲ፣ ማኬንካ ጎቴ ሁቡቡኔንካ ዳሊዬ። {ውርካ ኤርጓን ሶጳን} ⁶ ከኦይን ጩዋ ውርካ ኤርጓን ሶጳን ጊታይ ጎሚ ሜርሜራን ሶጳን ጊታይ ሼክያ ናንዳካ ትብዬን። ⁷ ውርካ ኤርጎ እንካ ሌሜን ትብያ ሜርሜር ኔኒ፤ ፓቅሼያ ሱላላ እን ሆርሜን ከኒያቡዬ ጉወ እያጝካ ዳሉጝ፤ ክየም እንካ ማክንሳካ ዳሊዻ ጉዱባ፤ ሹጩ ጊታይ ጫጉርሺዻ ጉዱባ ፓይላ። ⁸ ውርካ ኤርጎ እንካ ላንሳጝ ትብያ ሜርሜር ኔኒ፤ ኦኬ ኬና ሙኔን ጋግ ታቺ ጉድብኬ ጉወ ፓቅሼያ እያጝካ ኛፓሱጝ፤ ክየምካ ማክንሳ እንካ ኛፓስዻ ማቲያ ኒያቡ፤ ⁹ ዳቢ ጊታይ ሙኔዬ ኣኔን ኛፓስ ክያኒዻጝ ክየም እንካ ማክንሳጝ ኣርሻ፤ ጋጋንዻ ክየም እንካ ማክንሳጝ ላልሜና። ¹⁰ ውርካ ኤርጎ እንካ ማክንሳጝ ትብያ ሜርሜር ኔኒ፤ ቢሊ ታቺ ኬና ላሉጝኬ ችቦ ከኦካ ዳራን ክየም እንካ ማክንሳዬ ፓቄና ኦጉዋይ ኣኔ ሙዋጝ ከፎላ ዾዮክ፤ ¹¹ ሮጝካ ቢሊ እንዻ ሃኬና ሺጜ «እሬቶ»። ከሙዋዻ እን ኣይ ክየም እንካ ማክንሳጝ ማቲያ ጂቄ፤ ሙዋ እንዻ ከእን ናሹጝኬ እጝ ኣዬ ጂቆጝ ውር ጁዋኑዻ ኣርሻ። ¹² ውርካ ኤርጎ እንካ ኦይድሳዻጝ ትብያ ሜርሜር ኔኒ፤ ኦግታይ ጊዬይ ኣይ ሜሌሉጝ ከየም እንካ ማክንሳጝ ካድሞጝ፣ ክየም እንካ ማክንሳካ ሹሹጝ፣ ክየም እንካ ማክንሳካ ትጌሽዻ፣ ክየም እንካ ማክንሳካ ቢሊዻ ሙራ፤ ክየም እንካ ማክንሳካ ሹሽዻ፣ ክየም እንካ ማክንሳካ ምክርዻ ካማር ሜሌል ጌዬኔ ሃርጊኔያ። ¹³ ከኦይን ጩዋ ሃቶይያ፤ ባሩንቆ ክየም ኣኔን ከኦካ ጫቃንካ ፎላ ዋሬን፤ ከናቅዲ ታቺዻ ሺጝ፤ ውርካ ኤርጎ ጅያናን ጊታይ ናንዳካጝ ካትብዬ ሜርሜር ጊዬዩጝ፣ ናንዳካ እየው ጊታይ ቆቤን ዳሊ ክያኑጝ ሃይ/ ሃይዬ/ ሃዋይያ።