ኦይን ዮሐንስ ጌዮጝ {እን ካቴ እንግን ከማህትም ዽብ ክየሜ ሺ ኦይታም ኦይዱጝ} ¹ ከኦይን ጩዋ ውርካ ኤርጎካ ባሪዮ ኣሁር ጎርኬ ዳሊ ሄካዬ ሃጌይያ፤ እንግንዻ ፑጉ ካማር ዳሊ ክያኒ ወይ ኛፓስ ክያኒ ወይ ከኦካ ኦኬ ክየምጵንዻ ፑጌኔ ጎሜ ጊሽክያ ፑጋን ኣሁራን። ² ከኦይን ጩዋ ኣምላክ እን ኣይ እያይ ውርካ ኤርጎካ ባሪዮ እንቃ ኬና ኣኔ ማህትም ኩንኬ ታጝ ሹሽ ቱሌዬ ሃጌይያ፤ እንግንዻ ጊታይ ጋዬ ጌጳሞካ ዳሊዬ ኛፓሴ ካህሲዬን ዋይሼ ውርካ ኤርጓን ኣሁራን ከናቅዲ ታቺ እያጝ፤ ³ ከኣምላክ ጉዋዩ ሌይ ሃምካ ካቴ ማሪካ ውርካ ዋድማን ከማህትሙጝ፣ ኦይዲ ዳሊ ወይ ኛፓስ ወይ ሻራን ጊያምሽቴን። ⁴ ሃዋይያ ጁዋንትካ ውራን ጊታይ ካቴኬ ማህትምዻ፤ እንግንዻ ከኦካ ውርካ እስራኤል ፓይላ ጋይ ዽብ ክየሜ ሺ ኦይታም ኦይድዬ፤ ⁵ ከኦካ ውርካ ይሁዳ ሺ ታጲ ላማ፣ ከኦካ ውርካ ሮቤል ሺ ታጲ ላማ፣ ከኦካ ውርካ ጋድ ሺ ታጲ ላማ፣ ⁶ ከኦካ ውርካ ኣሴር ሺ ታጲ ላማ፣ ከኦካ ውርካ ንፍታሌም ሺ ታጲ ላማ፣ ከኦካ ውርካ ምናሴ ሺ ታጲ ላማ፣ ⁷ ከኦካ ውርካ ስምዖን ሺ ታጲ ኦይዲ፣ ከኦካ ውርካ ሌዊ ሺ ታጲ ላማ፣ ከኦካ ውርካ ይሳኮር ሺ ታጲ ላማ፣ ⁸ ከኦካ ውርካ ዛብሎን ሺ ታጲ ላማ፣ ከኦካ ውርካ ዮሴፍ ሺ ታጲ ላማ፣ ከኦካ ብንያም ካታ ውር ሺ ታጲ ላማ ከማህትም። {ዛር ጁዋኑ ጊታኬና ኪሚ ኣፓላ ፎልቼን} ⁹ ጩዋ ከኦይን ሃጌይያ፤ እየዎ፤ ከኦካ ሌሜንካ ኦይንካ ቆቤኔ ከኦካ ሌሜንካ ማድር እኔ ውር ክየምጵንዻ ካማሬ ኮሜን ቻሊዬኑጝ ከኦካ ዛርሲ፣ ከኦካ ጭኒጌንካ ጋጝ፣ ከውር፣ ከኦካ ቶግዻ ፓይላ ዛርሲ ጊታኬና ካሎን ኣይ ጁዋኑ ጎሬ ኣኔባ፤ እንግንዻ ኪም ኣፓላ ፎልቼኔ፤ ጎም ኣንቲካ ሻሪዻ ከቡዋ ጊዬይዬ ጊያ። ¹⁰ ከናቅዲ ኬና ኣይ ታቺዻ ሺጝ እያጜ ጉቹካ፤ «ባይሼን ከኦካ እን ኡፌን ኦይንካ ቆቦጝ፣ ሃካ ኣምላክ ጉዋዩዬ ካማድር እኔ። ¹¹ ውርካ ባሪዮዻ ፓይላ ከኦካ ኦይንካ ቆቤኔ ከጌጵሹጋኔ፣ ኦካ ማራማራካ ባዳን ኣሁራን ጊታይ ሙኔዬ ኣይ እያይንዻ ጎሬ ጋኔባ፤ ቡድኬ ማሪ ጊዬይ ኦይንካ ቆቤንዻዬ ይወና ባሪዮ፤ ¹² ጋኔን እያጝዻ ሺጚኔን፤ «ኣሜን፤ ጌጳሲዬኔ ጎቢንታዬ፣ ፓካልማሞ፣ ጎሺዬ፣ ጌጳሞዬ፣ ቁዋቅትዬ ቁዋቅሼንዻዬ፣ ከቦን ሌይ ኣይ ቦን ጮሉጝ ካኣይካ ኣምላክ ጉዋዩ፤ ኣሜን። ¹³ ከኦይንዳ ከኦካ ውር ጌጵጋን ክየም ዋይሼ ኣን፣ ጊታጝ ኪሚ ኣፓላ ፎልቼኑጝ ሃጊታጝካ ኒን? ፓዬንኬ ኦንዻ? ¹⁴ ኣንዻ ሃሺጝ ታቹጝ ዮ፤ እን የእባጅያ። እሺዻ ዋይሼ ኣን እያጝ፤ ጊታጝ ሃጊታይ ፓዬንኬ ሃምካ ጋሎ ታቺ እዕጝ፤ ጉዋን ኣፓላ ጊዬይ ከኒያቡካ ማድር እንዻዬ ሻማ ጫንቃል። ¹⁵ ዬ፣ ጋኔን ኦካ ሌሜንካ ኦካ ኡፌንካ ባሪዮዬ፣ ዋድምዬንባ ከሹሼ ከምክሬ ኦካ ቶኦካ ይሁኔን፤ ዱንካ እን ኣኔን ኦይንካ ቆቤንዻ ሻምሼባ እንግን ፋር፤ ¹⁶ ካርሲኬ ሹ እኔ ካሽ ቃውኬን እንግን፤ ከኦይን ጩዋ ኮርጉ ቃውኬን እንግን፤ ሹሽዻ ኡሽኬን እንግን፤ ቄጪትካ ሹሽዻ ፓይላ ሼሊኬን እንግን፤ ¹⁷ ናንዳካኦ ማድር እን ኣኔን ኦካ ጫቃንካ ኦይንካ ቆቤኑጝ ማቲባ ውርካ ዻውኔን ጊዬይ፤ እያንሼባ እንግን ሃምካ ሙዋካ ዻቆጝ፤ ባሪዮ ቋጭባ ጪራው ጊዬይ ፓይላ ከኦካ ካርቡ ጊዬይ።