ኦይን ዮሐንስ ጌዮጝ {ውርካ ኤርጎ እጜ ወርቀት ዽታኬ እጜ} ¹ ከኦይን ጩዋ ውርካ ኤርጎ እንቃ ኬና ኣይ ቁዋቃ ከፎላ ክያኒ ጎቤ ኩንኬ ሉፌ ሃጌይያ፤ ሹቦ ኔኒ ክያኒዻ ኣኔ ዝሊ። ማሪ ኔኒዻ ሃኬና ዊ ሹሽ፣ ጃፓን ኔኒዻ ሃኬና ዊ ጱጱቶካ ጉሁ። ² ጎምኬ ቡዋ ኔኒዻ ወርቀት ዽታኬ ኬና ኣይ ቱፑምኔኔ ጊያ፤ ጃፍ ኔኒ ቡዎን ሻምሼ ኛፓስ ክያኒ፣ ጃፍ ኔኒ ዋርካታ ሻምሼ ዳሊ ክያኒ፤ ³ ሻም ናቅዲ ኔኒ ኬሞሆ ኮኑጝ ኦቆረኒዬ ኡቹካ፤ ከሹ እን ኡቹኬዻ ናቅዲካ ጉጉናት ሶጳን ጊታይ ሃሳወና። ⁴ ጉጉናታን ሶጳን ከሹ እን ሃሳውኖጝ፣ ሄሽክሼያ ወርቀት ቶኬን፤ ኣይባዬ፣ ጉጉናታን ሶጳን ጊታይ ሃሳዎጝ ሃዋይ ናቅዲ ኬና ከፎላ ሺጝ ሃጌባ ከማህትም ዬ ኦይ ቶኬን። ⁵ ከኦይን ጩዋ ውርካ ኤርጎ እን ዾር ኛፓስ ክያኒዬ ሃጌዮጝ ቲትሼያ ቡዋ ኔኒ ቡዎን ፎላ ዾዮክ፤ ⁶ እሺዻ ከእንካ ኡፍኬ ቦንካ ቦኑጝ፣ ጊታይ ኣኔን ፎላ ክያኒዬ ኣኔን ኦኔኒ ቱዎጙጝ፣ ጊታይ ኣኔን ዳሊ ክያኒዬ ጊታይ ኣኔን ዳሊ ቱዎጝ፣ ጊታይ ኣኔን ኛፓስ ክያኒዬ ጊታይ ኣኔን ኛፓስ ቱዎጜ፣ ቱምያ ከእሺ እን ሙኑጝ፤ ፕርዻ ሺጝ እያጝ፤ ካርሲኬ ጋኔ ሌምኔን ኣኔኬን፤ ⁷ ኣይባዬ ውርካ ኤርጎ እንካ ሶጵሳ ከሹዋን ጊታይካ ትብዬ ሜርሜራን ኔኑጝ፣ ከእያይ ዹዋልሼ ውርካ ዋድማን ከእያይ ዹዋልሼ ውርካ ቶካ ባሪዮዋን ኦካ ድኬንካ ባሪዮ ሙኔንባ። ⁸ ከኦይን ናቅዲ ኬና ሃዋዬኬ ፎላ ዾዮክ ፕር እንቃ ሺጝ እያጜ ሜይሼያ ኣን፤ «ካሜ፤ ከኦካ ውርካ ኤርጎ እን ዾሪ ኛፓስ ክያኒዬ ዳሊ ክያኑጝ ቦባ ወርቀት ቱፑምኔን እን ኣኔን ቡዋ ኔኒ ክያኑጝ። ⁹ ኣንዻ ሃኩይ ሃምካ ውርካ ኤርጎ እኔ ካኣዬ ኣን ወርቀት ዽታኬ እን ኣይ ቱፑምኔኑጝ ሃኣንሼንያ፤ እሺዻ ዋይሼ ኣን ቦወ ቃውባ፤ ጅቅትሽባ ክያጝ ኑኑ ክያኒ፤ ዬ ኦካ ቶግ ኑኑ ጩዋንባ ከይትሬ። ¹⁰ ሃቦው ወርቀት ዽታኬ እን ከኦካ ቡዋካ ውርካ እርጎ እንዻዬ ሃቃውያ፤ ጩዋና ቶግ ናኒ ክያኒዻ ከይትሬ፤ ዬ ሃቃወዻጝ ጩዋ ጅቅትሻ ክያጝ ናኒ ክያኒ፤ ¹¹ ከኦይን ጩዋ ዋይሼ ኣን ናንዳካ ዛርሲ ጁዋኑ፣ ናንዳካ ውራን ኑኑ፣ ናንዳካ ቶግ ጁዋኑዬ ናንዳካ ቢታኔ ፕር እንቃ ከሃሳወ ትንብቱጝ ሁሉኩሼ እንባ።