ኦይን ዮሐንስ ጌዮጝ {ማኚ ዻዋን} ¹ ከኦይን ጩዋ ጋያ ኣን ሴጋካ ኦኬ ክንድዬን ኬና ሙኔን ሸምባቆ፤ ዋይሼ ኣን እያጝዻ፤ ካሜ ክንድባ ቶኦካ ይሁኔንካ ባሪዮዬ ኦካ ጋላ ቡሌ ጆሌኔ፤ ኳምባ ጊታይ ይወን ቱዎጝዻ። ² ዬ ኦይድባ ጳል እንካ ሹኑኩጝ፤ ኦይ ክንድዬን፤ ሃኬና ውር ጊታይ ኦይኬ ኦካ ባሪዮ ሹኑኩጝ፤ እንግን ባጝባ ከተማ እን ይሁሼኔ ቶጌሽ ኦይታም ላማ። ³ ሃኣይባ ማኚ ዻዋን ጊታይ ናኒ ቁዋቅቲ፤ እንግንዻ ኪም ኣፓላ ታቺ እንዻዬ ሃሳወንባ ትንቢት ሹ ሺ ክየሜ ዽብ ዻወ ላታሜ። ⁴ ጊታጝ ጎሪ ኦካ ሌሜንካ ታታቻንካ ዳሉጝዻ ጋይ ሻሪካ ወይራ ዻወ መቅረዛን ዻዋኔ። ⁵ ውር ክየምጵንዻ ዎሻ እንግን ጊያምሼንያጝ፣ ጉሁ ቱልኬ ኦካ ቶግ ጊዬይዬ ካይሲባ ጋላን ጊዬይ፤ ጊታይ ዎሺ እንግን ፓይላ ካጋርሾጝ ሃኬ ሃይነት ኬና ኣኔን እያጝ። ⁶ ውራን ጊታጝ ከትጌሻን ጊታካጝ ሃሳወ ትንቢቱጝ ጎት ካማር ቢወኔ ጋኔ ጌጳሞካ ፎላ ሃጌን፤ ፕርዻ ሙዋዋን ኒያቡ ሻሜን ከሹ እን ዎሾጝ እንግን ፓይላ ውርካ ዳሉጝ ከኦኬ ጋራ ኬና ኣይ እያንዻ ሙሬን ጋኔ ጌጳሞ። ⁷ ሹዋጳ ማኛሞ ጊዬይያጝ ጩዋ ዳቢ እንካ ቱልኬ ኦይን ኣይ ቱሎጝ ቶኳ እንግን፤ ባሺባ እንግንዻ፤ ኒሽባ እንግንዻ። ⁸ ጊታይ ኣርሺዻ ጉፑትሼባ ኦካ ጳልካ ከተማ ታቺ እዕጝ፤ ከተማ እንዻ ሺጝሼ ሶዶሜ ግብፄ ሃኬ እን ሺወኬ ሄክንሶዬ ሃኦይን ጻጵዬ ታቺ እን ጊዬዩጝ። ⁹ ጊታይ ፓዬን ከውራን ጊዬይዻ፣ ጊታይ ፓዬን ከኦካ ጪኒጌንካ ጋጝዻ፣ ጊታይ ፓይቴንኬ ቶጌ ከኦካ ዛርሱጝ ቶይባ ኣርሼን ጊዬይ ሹ ጅያኔ ከቶግ፤ ካማር ጊታይ ኣርሺዻ ቱቱኬኔ ሃርጊኔባ። ¹⁰ ውርካ ቶካ ባሪዮ ዻዋን ጊታጝ ናንዳካጝ ጋኒኔ ውር ጊታይ ኣኔን ዳሊ ክያኒ ጋሊንሺዬኑጝ፣ ውራን ጊታይ ኣኔን ዳሊ ክያኒዻ ናንዳካ ጋሎ እን ሄክሺ እንግኑጝ ዋዝንዽያ፤ ጋኔን ጋጝዻ ኦኬ ኣዬን። ¹¹ ዬ ከሹ ጅያን ከቶግ ጩዋ፣ ኡሲካ ዻቆ ኩንኬ ኦካ ባሪዮዬ ሁሉካ ኦግዬይ፤ እንግንዻ ናሹጜ ጎራ ከጃፍ ጊዬይ፤ ውር ጊታና ኣኔን እንግን ቶዬንዻ ታርቅና። ¹² ከኦይን ጩዋ፤ ከፎላ ዾዮክ ዋያ ናቅዲ ታቺ ኬና ዋይሼ እንግን ቱል ዮጝ/ ጋላን ጊዬይ ጋኔንባ እንግን ቶዬኔ ከሉፍ ፓይሼያ እያጝካ ፎላጝ። ¹³ ከሹ እንዻ ማትያ ሁጃሁጅኔን ታቺ ዳሊ ክያኒ፤ ከኦካ ከተማ እንዻ ጉል ቶና ኮሲሜና፤ ከሁጃሁጅኔንካ ዳሊዻ ኣርሻ ውር ሺ ሶጳ፤ ጊታይ ዻቅዻ ሪጊ ጎማ እንግን፤ ጎቢያ ኣምላክ እንካ ፎላዻ። ¹⁴ ጊዕሾ እንካ ላንሳጝ ሳጊያ፤ እየዎ፤ ጊዕሾ እንካ ማክንሳጝ ኩንባ ይሪካ። {ውርካ ኤርጎ እንካ ሶጳሳጝ} ¹⁵ ውርካ ኤርጎ እንካ ሶጵሳዻ ትብያ ሜርሜር ኔኒ፤ ከፎላ ዾዮክዻ ናቅዲ ታታቺ ጊታኬና ሺጜን እያጝ ዋዬና፤ «መንግስትካ ፔኑጝ፣ ማትያ መንግስትካ ታቺ እን ጉዋዩዬ ካክርስቶስ ኔኒዬ፤ እሺዻ ማቲባ ቢትካ ቦንካ ቦን።» ¹⁶ ከኦካ ሌሜንካ ባሪዮዻ ውር ጌጵሹጋን ላማታም ኦይዳን ጊታይ ኣኔን ኦካ ቆቤን ጊዬዩጝ ቶኬ ማሪ ጊዬይ ዳሊ ክያኒዬ ይወና ባሪዮ፤ v 17 ¹⁷ ሺጛ እያጝዻ፤ «ባካ ሌሜኔ እን ኣኔዬ፣ እን እባጅ ፓይላጝ፤ ባሪዮ ታቹጝ ዮ፤ ሃጎሺያያ እን፤ ናንዳካ ኦ እን የጎሚ ቁዋቅቲ ታቺ እን ኑኑዬ የማትዬያ ቢቲ። ¹⁸ ውር ጊታይ ኣኔን ከኦካ ባሪዮ ሹኑክዻ ማንሻ፤ ማኒት ኑኑዻ ኩና፤ ጊታይ ከኮምሼ ኦካ ኣርሼኑጝ፤ ናንዳካ ውርካ ዋድማ ኑኑ ናንዳካ ውርካ ቶካ ባሪዮ፣ ናንዳካ ውር ጊታይካ ይሁኔኔ ናንዳ ጊታይ ሪግሼን ሮጝ ኑኑዬ፣ ከሹ እን ከኣዬ ጊታይ ኣይ ሃይሻይሺዬ ታታቻኔ ዋጋጝ፤ ቦን እንኬ ካይሲዬ ጊታይ ካይሲኔጆል ውርካ ዳሉጝ ኩና። ¹⁹ ከኦይን ጩዋ ቦዋ ቶኦካ ይሁኔንካ ባሪዮ እን ኣኔን ፎላ ዾዮክ ሃም፤ ከኦካ ቶኦካ ይሁኔንዻ ቱዎጝ ታቦት እን ኣኔ ክያጃካ ባሪዮጝ ጌዬና፤ ማትያ ማኬንካ ኪራ፣ ኣይሼያ ናቅዲዻ፣ ማትያ እርጊዬንካ ጉጉናትዻ፣ ማትያ ሁጃሁጅኔንካ ዳሊዬ ሱሉላ ታቺዬ።