ኦይን ዮሐንስ ጌዮጝ {ኚያጝ እጜ ዴውኔ} ¹ ኦኬ ታቺ ኬናካ ጎሺሺ ጌዬና ከፎላ ዾዮክ፤ ኚያጝ ክየም ኬና ኪሚ ሹሽ፣ ኬና ባጝሼ ትጌሽ ከኦካ ጃፍ ኔኒ ዱቡዬ ከሻምሼ ሹቦ ኔኒ ክያኒ ቢሊ ታጵ ላማ ጌዬና። ² እሺዻ ሃኬና ኣይ ኡሩኬን፤ ሺጜካ ጅሺኔንዻ እስማ ጎም እሺዬ ጫንቅዬኔ ኡቹካ። ³ ከኦይን ጩዋ ኦኬ እንቃ ጌዬና ከፎላ ኪያኒ፤ እየዎ፤ ዴውን ታቺ ኬና ኣኔ ሹቦ ሶጳዬ ኣኔ ሼይህ ታጵዬ፣ ከኦካ ሹቦ ኔኒ ክያኒዻ ኬና ኣይሼ ኣክሊል ሶጳዬ ኬና ኣይ ጫጩጉ ጌዬና ከፎላ ክያኒ። ⁴ ኩር ኔኒ ፑኡሺሼ ቢሊ ቶና ሃሚን ኔኒዬ ኡፑትሼያ ዳሊ ክያኒ፤ እሺዻ ከሹ እን ጅሺኖጝ ዎሽ ውዋ ኔኒ ቁጄኔ ዴውን እንዻ ዾራ ኦካ ሌሜንካ ኚያጝ እን ሺጝ ጅሺኔኑጝ። ⁵ ጅሻ ሃንታካ ጁሙ እንካ ሻምሼ ዛርሲ ከሴጋካ ኮይሶ ሃሚን ኔኑጝ፤ ዎቺሼያ ውዋ እንዻ ሃምካ ባሪዮዬ ሃምካ ኡፌጆሌን ኔኒዬ። ⁶ ኚያጝ እንዻ ካሻሜ እሺ ሹቃሹቃ ሹ ሺ ክየሜ ዽብ ዻወ ላታሙጝ ኩይሼያ እያጝካ ራቅ እን ባሪዮ ኣሽኪሼ እሺ ቦና ክያኑጝ። ⁷ ፎላ ክያኒዻ ኣይሼያ ፓር፤ ሚካኤሌ ውርካ ኤርጎ እኔ ባሌና ከዴውን እዕጝ፤ ዴውኔ ውርካ ኤርጎ እኔ ዋኬ ባሌኔ ከእንግን፤ ⁸ ካኣይባዬ ባሺያ እንግን፤ ካይሲያ ራቅ እን ጊዬይ ኣኔን ፎላ ክያኒዻ። ⁹ ዴውን ታቺ እንዻ፣ ፓቃ ቻች ባካ ኦባጝ፤ እሺዻ ሃእን ሺጜ ዲያብሎስ ወይ ሺጜ ኡጁጜ ሺዎጝ፤ ሃእንካ ጊያምሺሽ ውርካ ዳሊ ፓይላጝ፤ ፓቅሼያ እሺ ዳሊ ክያኒ፤ ፓቃ ውር ኤርጎ ኔኒዻ ከእሺ። ¹⁰ ከኦይን ጩዋ ናቅዲ ታቺ ኬና ሺጝ እያጝ ሃዋይያ ከፎላ ክያኒ፤ «ጋን ባይሺኔንካ ኣምላክ ጉዋዩ፣ ቁዋቅት ኔኒዬ መንግስት ኔኒዬ፣ ጌጳሞካ ክርስቶስ ኔኒዻ ኩና። ጊታኑጝ ኣኔን እንግን ከኦካ ሌሜንካ ኣምላክ ጉዋዩ ከምክሬ ሹሼ ካንሲዬኑጝ፤ ፓቃ ኑጝ ካንሲኔ ጆል ጪኒጌን ጉዋዩጝ። ¹¹ እንግንዻ ከኒያቡካ ማድር እዕጝ፣ ከማኛሞካ ክያጃ፣ ባሺያ፤ ኣይኒን ሌይካ ኣርሼኑጝ፣ ካኒ ናሺኬን ናፒሲ ጊዬይዻ። ¹² ዬ ፎላ ዮ፤ ጊታይ ኣኔን ቱዎጝዻ ዮ፣ ዋዝንዺባ፤ ዬ ዳሊዬ ኛፓሴ ሃይ/ ናንዳካ ኦ ዲያብሎስ ናንዳካጝ ሺዽሻ እሺ ቦን ጩዋማጵኑጝ ናንዳ እጝ እባጆጝ፤ ማኒሼን ካሎኔ ጎብሼያ እየው። ¹³ ከሹ እጝ ፓቅሼ ዴውን እን ዳሊ ክያኒዬ ጌዮጝ፣ ዋኬያ ኚያጝ እን ጅሺ ሃንታካ ጁሙጝ። ¹⁴ ኚያጝ እንዻ ካቻሊዬ ዋሬ ሃምካ ራቅ እን ኣይ ቦናዬ ጋሽኪሼ እሺ ኩዬኑጝ ጋያ እሺ ታቡጉ ታታቺካ ባሩንቆ፤ ይንዻ ኣዮጝ ካካምኬ ኦካ ሌሜንካ ቻች እን ዹኬ ካኡፌ ቦን ክየሙጝ፣ ካኡፑኔ ቦን ጁዋኑዬ ካኡፌ ቦን ዶክ ከሹቃዬ ጊያ። ¹⁵ ቻች እንዻ ካቦወ ኚያጝ እን ከሚሮጝ፣ ፓቅልቃ ሙዋ ኬና ሙዋካ ዳራ ከኦካ ቶግ ኔኒ። ¹⁶ ዬ ዳሊዻ ኬልሺያ ኚያጝ እዕጝ፤ ሃም ቶግ ኔኒዻዬ ቁጃ ሙዋካ ዳራ እን ዴውን እሬኬ ቶግ። ¹⁷ ዴውን እንዻ ማኒሼያ ኚያጝ እዕጝ፤ ኩያ ከሃንታ ጊታይ ኔኒ ሺዺዻ ባሊኔን፤ እንግንዻ ሃጊታይ ዻዬጆሌ ክያጃካ ባሪዮዬ ጎሚ ማኚ ኣዬንካ ኢየሱስ ሹቃጝ። ¹⁸ ዴውን እንዻ ዾሬ ኣኔባ ኦካ ላቅካ ኛፓስ።