ኦይን ዮሐንስ ጌዮጝ {ዳቢ እን ቱልኬ ሙዋ ክያኑጝ} ¹ ከኦይን ጩዋ ዳቢ ክየም ቱልኬ ኛፓስ ክያኒዬ ሃጌይያ፤ እሺዻ ሃኬና ኣኔ ሼይህ ታጵዬ ሹቦ ሶጳዬ፤ ከኦካ ሼያን ኔኒዻ ኣኔ ዴውን ታጲ፣ ከሹቧን ኔኒዽዳ ኣኔ ሮጝካ ይሪኔን። ² ዳቢ እን ሃጌዬዻ ሃኬና ሙኔን ካሩጝ፤ ኣይባዬ ጃፓን ኔኒ ሃኬና ሙኔንካ ጓቻምባ፣ ፕር ቶግ ኔኒዻ ሃኬና ሙኔን ቶግካ ሞሆ፤ ዴውን እንዻ ኣያ ዳቢ እጝ ቁዋቅት ኔኒዬ ኦካ ኡፔን ኔኒዬ ፕርዻ ጌጳሞ ታቺ እን ኔኒዬ። ³ ከኦካ ሹቦካ ዳቢ እንዻ ክየም ሃኬና ኣኔ ጊዬ ኬና ሙኔን ኬናካ ዬክሼ ሃምካ ኣርሼኑጝ። ኣይባዬ ጊዬ እንካ ዬክሼ ሃምካ ኣርሼኑጝ ባይሻ፤ ውር ጊታይ ኣኔን ዳሊ ክያኑጝ ፓይላ ጎሺዬ ዻዬያ ዳቢ እዕጝ። ⁴ ውርዻ ይወና ዴውን እዕጝ፤ ናንዳካ ኦ ኣያ ጌጳሞ ኔኒ ዳቢ እዕጝ። ፕርዻ፣ ሃኒ ካሙኒንቴ ዳቢ እኑጝ? ሃኒን ካቻሊኬ እሺዻ ባሊኔኑጝ? ሺጝ እያይኔ ይወና ዳቢ እዕጝ። ⁵ ጋያ ዳቢ እንዻ ቶግ ኬና ኣይካ ክያጃካ ጵራጵራዬ ኬናካ ሃሳወ ክያጃካ ይሪኔኔ፤ ካኣሽኪኔ ከጌጳሞ ትጌሽ ኦይታም ላማጝ ናሺሼያ እሺ። ⁶ እሺዻ ከባሪዮ ይሬኔ ፕርዻ ሮጝ ኔኒዬ ኦካ ኡጜን ኔኒዬ፣ ሃማ ቶግ ኔኒ ካጊታይ ኣኔን ፎላ ክያኒዻ ይሬን። ⁷ ካባሊኔ ከውር ጊታይካ ይሁኔኔ ካባሺዬ እንግኑጝ ጋያ እሺ ጌጳሞ። ከኦካ ጪኒጌንካ ጋጜ ከኦካ ውራኔ፣ ከኦካ ቶጌ ከኦካ ዛርሲ ፓይላዬ ጋያ እሺ ጌጳሞ። ⁸ ካርሲኬ እባ ሙኔ ፔኔ ጊታይ ማሬ ሮጝ ጊዬይ ኦካ ወርቀትካ ዻቆካ ማድር እን ኒቄ ቶክሼኑጝ ውርካ ዳሉጝ ፓይላ ይወንባ ዳቢ እዕጝ። ⁹ ካጝ ኣኔ ናቡ ኣኔያጝ ካዋይባ። ¹⁰ ውር ክየምጵንዻ ኬናካ ሮጊ ኣኔያጝ፣ ሮጊባ እሺዻ፤ ውር ክየምጵንዻ ኬናካ ኒሺንቴኬ ኤቤል ኣኔያጝ፣ ኒሽባ እሺዻ ከኤቤል። ይንዻ ኦኬ ዶንሺዬንካ ውር ጊታይካ ይሁኔኔ እምነቴ ካጌይኖጝ ኣዬኬ ይኑጝ ግባጅባ። {ዳቢ እን ቱልኬ ዳሊ ክያኑጝ} ¹¹ ከኦይን ጩዋ ዳቢ እንቃ ቱልኬ ዳሊ ክያኒዬ ሃጌይያ፤ እሺዻ ኣኔ ሼይህ ዻ ኬካ ማድር፤ ኣይባዬ ሃኬና ሃሳወን ኬካ ዴውን። ¹² ከሮጝካ ዳቢ ባካ ሌሜን ኣኔን ከጌጳሞ ኔኒ ኣሽኪኔን፤ ዳሊዬ ከጊታይ ቆቤን ዳሊ ክያኒዬ ፓይላ፣ እን ባይሽኬ ኦካ ጊዬ እንካ ሄክሺሼ ሃምካ ኣርሼኑጝ ካይወን ዳቢ እንካ ሌሜኔ ሻማ እንግን። ¹³ ከኦካ ሌሜንካ ውር ሌይ ሃም ከፎላ ዾዮክ ካሃንቺሺሼ ጉሁ ዳሊ ክያኑጝ ዹዋልሼና ኦኬ ታታቺ። ¹⁴ ዳቢ እንካ ሌሜኑጝ ካዹዋልሺንቴ ኦኬዬ ናንዳካጝ ጋዬ እሺ ጌጳሞጝ፣ ጊያምሺሻ ውራን ጊታይ ቆቤን ዳሊ ክያኑጝ፤ እን ቆወ ከኤቤሌ ኣኔ ጊዮጝ፣ ኣይባዬ ካሪብሼ ዳቢ ጊታይ ቆቢኬ ዻቆ ሄክንሶዬ ሜይሼያ እንግን። ¹⁵ ፕርዻ ካቻሊዬ ሄክንሶካ ዳቢ እንካ ሃሳወኑጝ ካጋዬ ዳቢ እንካ ሄክንሶካ ኡሱዬ ካኒሼ ጊታይ ማር ዳቢ እንካ ሄክንሶ ይሁኔን ፓይላጝ ጋያ እሺ ጌጳሞ። ¹⁶ ፕርዻ ሃይሻይሻኔ ታታቻኔ፣ ሆዱሟኔ ኩፓኔ፣ ጊታይ ኣይ ታታቺዬ ጊታይካ ዋድማዬ ፓይላ ከቡዋ ጊዬይ ቡዎን ወይ ካቦው ከማሪ ጊዬይ ኦኬዬ ሻማ እንግን ቹቹንሺሼያ እንግን፤ ¹⁷ ይንዻ ኣዮጝ ሄክንሶ እንካ ዳቢ እኑጝ፣ እንዻ ጊታይ ኣኔ ሮጙጝ ወይ ጊታይ ማር ኮሜንካ ሮጝ ኣኔኑጝ ውር ክየምጵንዻ ካማር ኡዋሩጜን ወይ ኡዋሩጝሼን ቻሊዬኔ ጊያ። ¹⁸ ይንዻ ኣንሺሽባ ፓካልማሞ፤ ውር ክየምጵንዻ ካጝ ኣኔ ሹቦጝ፤ ካሄክንሲባ ኮሜንካ ዳቢ እዕጝ፤ ናንዳካ ኦ ኮሜን ኔኒዻ ሃኮሜንካ ውር። ኮሜን ኔኒ ሃዽብ ላወ ላታም ላወ።