ኦይን ዮሐንስ ጌዮጝ {ማድርእጜ ውር ሺ ዽብ ክየሜ ኦይታም ኦይዳኔ} ¹ ከኦይን ጩዋ ሃጌይያ፤ እየዎ፤ ማድር እጝ ዾሬ ኣኔባ ኦካ ጋግካ ጽዮን፤ ጊታይ ኣይኬ እሺዬ ቶኩሼ ኦካ ማሪ ጊዬይ ሮጝ ኔኒዬ ሮካ ሹኔዬ ኣና ውር ሺ ዽብ ክየሜ ኦይታም ኦይድዬ። ² ከፎላ ዾዮክዻ ሃዋይያ ናቅዲ ኬና ሙኔንካ ሙዋዌ ኬና ሙኔን ናቅዲካ ጉጉናቴ፤ ናቅዲ እን ሃዋዬዻ ሃኬካ ሃይነትካ ውር ጊታይ ካትኔጆል ቾንጉጝ። ³ እንግንዻ ከኦካ ሌሜንካ ኦይንካ ቆቤጃሌኑጝ፣ ከኦካ ዳባን ኣሁራን ጊታይ ሙኔዬ ኣይ እያይኔ ከኦካ ሌሜንካ ውር ጌጵሹጋኔ ኪዋ ይያሪካ ባሪዮ ሃሊ። ከኦካ ጊታይ ኩኪዬ ዳሊ ክያኑጝ ከኦካ ውራን ሺ ዽብ ክየሜ ኦይታም ኦይዳኔ እንቃ ውር ክየምጵንዻ ካኒ ቻሊኬን ይያሪካ ባሪዮ እጝ እርርዬን። ⁴ እንግንዻ ሃጊታይ ማር እንግን ኤታጋን ከሃኣጚ ጊያምሺሼኑጝ፤ ሻማ እንግን ኤታጋን ጫንቃልዻዬ፤ ዻዬባ ኦጉዋይ ማድር እጝ ኩዬጆሎጝ ፓይላ፤ ካጋዬ ቶይድካ ባሪዮዬ ማድር እጜ ከኦካ ጫቃንካ ውር ሃጊታይ ኩኪዮጝ። ⁵ ከኦካ ቶግ ጊዬይዻ ካኒ ጌይኬን ሾሮ ክየምጵንዻ፤ ጋኔኬን ዻባሞዻ። {ውርካ ኤርጓን ጂያናን} ⁶ ከኦይን ጩዋ ውርካ ኤርጎ እንቃ ዋርኬ ኦካ ጫቃንካ ፎላዬ ሃጌይያ፤ እሺዻ ናንዳካ ጊታይ ቆቤን ዳሊ ክያኑጝ ናንዳ ዛርሲ፣ ናንዳ ጪኒጌንካ ጋጝ፣ ናንዳ ቶጓኔ ናንዳ ውራን ኔኒዬ ፓይላ ቦው ክያጃ ሹቃ እንካ ሜይሺኔ ቦንካ ቦኔ ጊያ፤ ⁷ ከናቅዲ ታቺዻ ሺጝ፣ ሪግሼንባ ባሪዮ፤ ጎቢባዻ፤ ናንዳካ ኦ ሹካ ኮምሺኔን ኔኒ ዬክሻ፤ ይወንባ እን ሙኒ ፎላዬ ዳሊዬ ኛፓሴ ቂያናንዻዬ። v ⁸ እንቃዻ ውርካ ኤርጎ እንካ ላንሳጝ፣ ሺጜን «ዛርሲ ፓይላ ከማኒትካ ኩጳሞ ካማት ኣላላዬ ባቢሎን ታቺ እጝ ሻሙጝ ቡዳ/ ቡዳዬ ዻዬያ። ⁹ ውርካ ኤርጎ እንካ ማክንሳዻ ሺጝ እያጜ ዻዬያ እንግን ከናቅዲ ታቺ፤ ውር ክየምጵንዻ ካጝ ይወን ዳቢ እጜ ኦይን ጋሽክዬ ከቡዋዌ፣ ውር ኬና ኣይሼ ኦካ ማሪ ኔኒ ወይ ኦካ ቡዋ ኔኒ ቃንዺ ኣኔያያጝ፣ ¹⁰ ፕር እሺዻ ካማር ኦኬ ክየምጵንዻ ሆርሲዬኔ እን ቋቁሼ ኦካ ዞንጶካ ማኒቱጝ ማትባ ኣላላካ ማኒትካ ባሪዮ። ከኦካ ሌሜንካ ውራንካ ኤርጎዬ ከኦካ ሌሜንካ ማድሬ ጋሊዬንባ ጉሁ ክያኒዬ ጱጱቶ ክያኒዬ። ¹¹ ጩቡይካ ጋሎ ጊዬይዻ ጉዱምሼንባ ዾዮክ ከቦንካ ቦን፤ ጊታይ ይወን ዳቢ እኔ ኦግታይ ጋሽክዬ ከቡዋዌ ወይ ጊታይ ኣይሼ እንግን ኤታጋን ቃንዺካ ሮጝ ኔኑጝ ፓይላ ቦኬን ኡሲ ከሹሼ ምክሬ። ¹² ውርካ ይሁኔን ጊታይ ዻዬ ክያጃካ ባሪዮዬ ናንዳካ ኢየሱስ ጊታይ ኣይ ሹቃዬ ቁዋቅትሽ ከኦኬ ዶንሺዬኑጝ ጊባጅኬ ይዕጝ። ¹³ ከኦይን ጩዋ ሃዋይያ ናቅዲ ከፎላ ክያኒ ኬና ዋይሼ ኣን ሺጝ እያጜ ቶኳ፣ ካርሲ ከጋኔ ጊታይ ኣይኬ ታቺ እጜ ካኣርሹጝ ጋይ ጫንቃል። መንፈስዻ ሺጝ፣ «ይንጌ፣ ናንዳካጝ ዋድማ ጊዬይ ዻዬ እንግኑጝ ቦባ ኡሲ ከኦካ ዻቾ ጊዬይ» {ዋዳካ ባርጊን} ¹⁴ ሃጌይያ፤ እየዎ፤ ከኦካ ሌሜን ናኒ ኣና ሉፍ ፎልቼን፤ ከኦካ ሉፍ እንዻ፣ ኡፌ ኣና ኦኬ ኬና ሙኔን ሃንታካ ውር፤ እሺዻ ኣይሼ ሾቦ ኔኒ ክያኒ ጌጳሞካ ወርቄዻዬ ጊያ፤ ከቡዋ ኔኒዻ ጎም ማጭድ ኬና ኣይ ጫሪ። ¹⁵ ውርካ ኤርጎ እንቃዻ ቱልኬ ኦካ ቶኦካ ይሁኔኔ ኡፌያ ሉፍ፣ ሹካ ሹጫን ሃዼንዻ ናንዳካጝ ሄክሾጝ፣ ሺጝ ቦው ማጭዴ ሃዽባ፤ ዋዳካ ባርጊንዻ ዬክሻዬ ኡቹካ ከናቅዲ ታቺ። ¹⁶ ዬ ውርካ ኤርጎ እን ኡፍ ሉፍ ክያኑጝ ይዕሲሼያ ማጭድ ዳሊ ክያኒ፤ ሃዻ ሹጩካ ዳሊዻ። ¹⁷ ውርካ ኤርጎ እንቃዻ ቱላ ከኦካ ቶኦካ ይሁኔን እን ኣኔን ፎላ ዾዮኩጝ፤ እሺዻ ኣኔ ማጭድ ጫሪ ኬና ኣኔን እያይ፤ ¹⁸ እን ጌጳሞ ኣኔን ጉሁ ክያኑጝ ውርካ ኤርጎ እንቃ ቱልኬ ኦይን ቡሌ ጆሌ ጋላዬ ዋይሼ እን ጎሚ ማጭድ ጫሪ እጝ፣ {ዘለላ ናንዳካጝ} እግሾጝ፣ ቦው ማጭድ ጫሪ እን ኑኑዬ ፑኡሺባ {ዘለልካ ወይን ጊታይ ኣኔን} ዳሊ ክያኒዬ ኡቹካ ከናቅዲ ታቺ። ¹⁹ ውርካ ኤርጎ እንዻ ይዕሲሼያ ማጭድ ኔኒ ዳሊ ክያኒ፤ ፑኡሺ {ዘለላንካ ወይን ጊታይ ኣኔን} ዳሊ ክያኒዬ ፓቅሼያ ሃምካ ታቺ እዕጝ ሃምካ ቷንዳ እን ቱርጵሼጃሌ ኣላላካ ማኒትካ ባሪዮጝ። ²⁰ ወይን እንዻ ከኦካ ከተማ እጝ ሹኑክ ባጝሼያ ኦይን ቱርጵሼጆሌ ኣላላጝ፤ ጌጳሞ ኔኒ ሌይ ሃምካ ኣራሮካ ፓርዳጝ፣ ራጅምቲ ኔኒ ከኪሎ ሚትር ዽብ ጅያን ኒያቡ ቱላ ከኦይን ቱርጵሼጆሌ ኣላላጝ።